Shoprite Usave anuwa a landitha iinima ya yonuka

0
24

Maria Namupala

ONDANGWA-Omukalimo gomondoolopa yaNdangwa okwa holola okuuva nayi kwe, sho a landa iikulya ya yonuka mositola ya Usave Shoprite tayi adhika pOmwandi momudhingoloko gOndangwa oshiwike sha piti. Nestry Toivo okwati shika okweshi mono konima sho a landa etete lyo Jungle Oats, tati okwasli uuvite nayi “ondali ndeshi mono konima sho ndayi megumbo notwali twa patulula okapakete tu teleke, kakele ondaka mona kutya olya yonuka sho twaadhamo uupuka wontuko nowa ninga omakuma mokapakete akehe,” tati ngaaka.
Ta gwedhapo kutya okwali a tokola a shuneko nokulandako okapakete kamwe, ashike sho eya megumbo natango konima yokuka patulula okwa mono kutya nako okena uupuka ngaashi okakwawo hoka a landa tango, ko okali kuudha uupuka nayi.

Sho a pulwa a tyesha omukuluntu gwa Usave Shoprite Karen Smith, okwati ka yali ya nongela oshinima shoka, molwaashoka opo yali ya yakula ostoka ompe yomatete ngoka yaadhika ya tula moolaka ashike inaya mona ngele oga felefala.
Smith okwa gandja ombili tati epuko ndyoka itali endululwawe, “Oshinima sha puka shili okulanditha iinima ya yonuka no tatu indile tu dhiminwepo mwaashoka, ondahala okukwashilipaleka mpaka kutya oomatete agehe otwega kuthamo moolaka opo tuga shune hoka twega landele,” tati ngaaka.

Omupopiliko gwelelo lyondoolopa yaNdangwa Petrina Shitalangaho okwati kutya oshinima shoka inashi thika momakutsi gelelo lyondoolopa, tati elelo lyondoolopa olina owala omuniilonga guundjolowele gumwe, konima sho gumwe a tulamo eindilo lyopenzela lyokuyele.

Kakele kwaashoka okwati inaya yakula enyenyeto ndyoka, ta tsikile nokugwedhako kutya omunambelewa oha talelepo oositola adhihe dhili momudhingoloko gondoolopa oshiwike kehe noku tala iikulya mbi ya yonuka, nokuyi kuthamo.

Toivo okwati konima sho a mono oka pakete oka tiyali kena omapuka okwali a tokola opo a shune komukuluntu gostola ndjoka, kakele okwali a gandja ombili nokufuta iimaliwa ye meendelelo, tati nonande ali uuvite nayi okwa ka mona kutya oositola odhindji ohashi vulika tadhi landitha iinima ya yonuka mokwaahashiwo.

“Otashi etitha ohenda molwaashoka haantu ayehe taya vulu okugalukila kositola kehe nenge okugalula oshinima uuna ya mona ha yonuka, notashi etitha ohenda, oshiwanawa ooyene yoositola ya kale taya tala nokukonakona nawa iilandithomwa yawo omanga inaaeyi tula moolaka,” osho Toivo a ti.

Toivo okwa ti okugandja ombili nokufuta iimaliwa yomulandi itashi mbilipalele, molwaashoka okwa hepitha ethimbo lye, noshikulya omuntu ineshi lyawe ethimbo ndyoka ali a hala, tati ohashi vulika aantu yalya iinima ya yonuka ya kwatwe nokomikithi mkokwaahashiwo kwawo.

Toivo okwa ti sho a tala esiku lyokufelefala kokapakete olyali omasiku 2 Maalitsa nuumvo, nokonima yaashoka elelo lyositola olyali lya kuthamo okapakete hoka moolaka, opo ya kwashilipaleke kutya itaya landithawe iinima ya yonuka kaalandi.
Shitalanghaho okwa kunkilile ooyene yoositola ya kwashilipaleke kutya iinima mbyoka ya yonuka oya kuthwamo moolaka, noya yande okulanditha iikulya ya felefala molwaashoka aantu ngele oyali iikulya ya yonuka ohaya kwatwa komikithi.

LEAVE A REPLY

Please enter your comment!
Please enter your name here