Ya pandula Geingob sho a kwatela mo omaudhano moshipopiwa she

0
28

Shipi Elago

OSHAKATI-Omuplesitende Hage Geingob ngoka a li a gandja olopota yonkalo yoshigwana yomumvo 2018 oshikando shika okwa li a popi wo kombinga yomaudhano moka a li a holola nkene omaudhano taga vulu okunawapeka onkalo yeliko noonkalamwenyo dhaagundjuka moshilongo ngele oga kwatwa nawa.

Geingob okwa li a totha mo omaudhano gwopashigwana ngoka taga ka dhanwa moshilandopangelo nuumvo, ta ti ndjika oyi li onkatu ombwaanawa oku eta omaudhano kaanyasha nota shi kwathele ondjodhi yethaneko lyepangelo yoHarambee ndjoka tayi igidha kutya kapu na ngoka ta ka liwa okapondamusita.

Onkalo yomaudhano moshilongo oyi li tayi ende tayi shongola naashika osha etitha opo nokuli omaudhano galwe ga kale ga tula mo ombiliki sigo okeluwa ndika.

Kundana okwa li a yi moonkundathana naatseyi yomaudhano okuuva nkene yu uvite sho omuplesitende a li a kwatele mo omaudhano molopota ye yomumvo nguka.

Sam Nekwaya, omukwatakanithi gwa-NFA mOshana na oku li wo gumwe gwaamboka ye hole okulandula omaudhano, nokwa li a holola enyanyu lye sho omaudhano ge li ga talika ko kepangelo onga oshinima sha simana unene tuu mokuhumitha komeho eliko lyoshilongo noonkalamwenyo dhaanyasha moshilongo.

“Oshili tashi etitha oonkondo kutse mboka hatu kala pomaudhano ngele tatu uvu oohapu dha tya ngawo tadhi zi mokana kepangelo oshoka otu uvite kutya omaudhano oga kala ga patelwa kondje unene ngele otashi ya koompangela dhepangelo, nongele epangelo olya pashula omeho galyo okutala omaudhano nena otu uvite kutya onakuyiwa yomaudhano oyi li momake omawanawa,” Nekwaya ta ti.
Ashike okwa li u ulike uutile we sho a ti omuplesitende ina ya muule woshinima, ta ti komaudhano okwa li ashike a gumuko kashona nokwa fa e ya goga omahoka komilungu.

“Onge aaholi yomaudhano otwa li tu uvite kutya omplesitende ina popya ko sha gwana komaudhano oshoka ina popya ombahu nokawawa kutya oopolohalama ndhoka dha nuninwa omaudhano otadhi ti ngiini nota dhi ka kala dha fa peni, otwa li tu na ondjuulukwe yoku uva ngele ontengenekothaneko yomaudhano otayi ka gwedhelwa , nenge epangelo otali ka tula oshimaliwa sha gwedhwa po mokutunga uupale nokudheula aadheuli moshilongo mboka taya ka andjaganeka ontseyo yomaudhano moshilongo,” Nekwaya ta gwedha po.
Okwa ti omaudhano oge li taga liwa oshipungo nolundji mboka ye hole omaudhano oye li taya longitha oonzo dhawo esiku nesiku opo ya kwathele uunona woshilongo shika wu wape okudhana momawudhano ga yooloka.

“Otwa li wo twa tegelela omuplesitende e tu kuthile ko nkene omaudhao moosikola moka omo mu na ekota lyaadhani ta gaka kwathelwa na nkene oosikola tadhi ka kwathelwa okutunga po iikwathitho niilongitho yomaudhano yi li pamuthika gwopashinanena,” Nekwaya ta tsikile ko.

Johannes Shekutamba Mathew oku li omupeviplesitende gwoAthletics Namibia naye oku li omutseyi gwomawudhano nokwa li a holola kutya olopota yaGeingob oya pa aadhani naaholi yomaudhano etimwaumbwile lya kola nando wo a li a holola kutya itayi holola nkene omaudhano taga ka mona uuwanawa nuunake.

“Oshi li sha simana sho epangelo lya dhimbulula nkene omaudhano taga vulu okukwathela mekandulepo lyoluhepo neyopaleko lyoonkalamwenyo dhaantu moshilongo, ashike ondi uvite kutya Geingob okwa fa e tu goga ashike omahoka komilungu oshoka ine tu pa uuyelele wa yela nkene ta kambadhala okuhumitha omaudhano komeho,” Mathew ta ti.

Okwati omaudhano oge li taga liwa okapondamusita notaga ende gu uka kuuwinayi esiku nesiku molwa omutengenekwathaneko omushona ngoka haga pewa.

“Otu li tu na etegameno notwa ligamena koshipala shepangelo okutala nkene tali ka tula omilandu dhawo dha guma omaudhano miilonga,” Nambala ta gwedha po.

Geingob okwa li a pewa oombedhi omumvo gwa za ko kaaholi yomaudhano sho a li a thigi ko omaudhano molopota ye yonkalo yoshigwana noshi li tashi ulike omundilo omwaanawa ngele oku na oompangela oombwaanawa dhehumitho komeho lyomaudhano nonando ina ulika nkene oompangela tadhi ka tulwa miilonga.

LEAVE A REPLY

Please enter your comment!
Please enter your name here