Albertine Johannes a thigwa po kosheendo tashi yi koSouth Africa

0
19

Shipi Elago

Oshakati-Okakadhona hoka ke li ka nika oshiponga muudhano woateletika hoka ka yambukile koshitopolwa shaShana itaka kalela po we Namibia muudhano woateletika mboka wu li koSouth Africa ehuliloshiwike ndika konima sho ka li ka kuthwa mo momusholondondo gwaamatuki yosipana yopashigwana kuyele oshiwike shika.

Albertine Johannes ngoka e li okakadhona okagundjuka lela okwa li a haluthwa konkundana ndjika ta ti oshi li she mu uvitha nayi oshoka okwa li a tula mo ethimbo niimaliwa oyindji mokwiilongekidhila uudhano mbuka ashike okwa li a kuthwa mo momusholondondo komunute gwahugunina.

“Onda li nda matuka ethimbo ewanawa muudhano woCoca Cola Championship mOshakati nOtjiwarongo naashika osho sha li sha tulandje momusholondondo gwosipana ashike ohaluka tandi lombwelwa anuwa onda kuthwamo momusholondondo nonda pingenwa po kuDe Sousa Sade,” Albertine ngoka e li kohi yomimvo 17 ta ti nomeho taga polidha.

“Kandi na uudhigu ngele otaya tula moDe Sousa mosipana oshoka ondishi kutya naye okakadhona haka kutha oonkali pepata ashike uupyakadhi owu li ashike mpaka kutya ngame onda matuka ethimbo ewanawa na kapu na omalimbililo onda li ndi na oku ka kalela po oshilongo shandje momawudhano ngaka oshoka onda li wo nda longo nuudhiginini, aakuluntu yandje oya li ya longitha oonzo dhawo okulongekidha ndje, onda li nda ningilwa opasporta yomeendelelo moka aantu ya longitha iimaliwa yawo ashike lwahugunina otandi lombwelwa kutya itandi yi we nosha teya ndje omukumo,” Albertine ta ti.

Omupeviplesidente gwoAteletika Namibia Mathew Johannes okwa li a ti oshinima shoka oku li ashike e shi uvite tashi kwelengendja mombepo ashike ke shi kutya etokolo olya ningwa kulye nomolwashike oshoka ngele omudhani okwa adha ethimbo lyokudhana methigathano nena na pewe ashike ompito nongele opwe ya ishewe gumwe e na ethimbo ehwepo puye nena mbaka yaali oya li ye na oku ka kalela po oshilongo ayehe.

“Otandi kambadhala okuninga omakwatathano opo ndi tale kutya olye a ninga etokolo lyatya ngaaka opo ndi tale kutya omukundu ogwe etithwa naana koshike oshoka etokolo ndyoka olya li li na okuningwa kelelo lyoAteletika Namibia ashike hakomuntu koohandimwe,”Mathew ta ti.

De Sousa oku li shili ha matuka nawa ashike okwa li wo tu uvite kutya uudhano mbuka owa li uuwanawa kokakadhona okagundjuka hoka ke li kohi yomimvo 17 opo ka mone ontseyo yomawudhano pamuthika gwopawuyuni kuyele.

Albertina okwa za mOshana nohamatuka iinano ngaashi 100m, 200m nosho wo 400m noha kambadhala wo 1500 noku li eendja mo mboka ya kala nokupangela uudhano mbuka monakuziwa.

Oshitopolwa shaShana oshi li tashi ti pii muudhano woateletika noshi na aadhani oyendji ya mona omapole muudhano wa li ko mOveduka ehuliloshiwike lya zi ko moka naAlbertine a li u ulukile oyendji komutse gwondjamba ashike okwa ti ka li a matuka lela a mana mo oshoka okwa li e na uudhano wokoSouth Africa momutse onkene ka li ta vulu okumatuka lela a mana mo oshoka ka li a hala okwiivulitha omanga e na uudhano wa simana andola ehuliloshiwike ndika.

LEAVE A REPLY

Please enter your comment!
Please enter your name here