Etambuleko lyaGerman lyiinakugwanitwa yiilonga a longa monakuziwa kali na omalimbililo

0
143

Kae Matundu-Tjiparuro

Ovenduka-“Ehukamugongo lyuukoloni lyokumonitha aantu iihuna. Kehe mpoka tatu tala mondjokonona yuukoloni mule woomvula omathele gatatu ga pita, ohatu mono omiyonena tadhi ningilwa omihoko, nenge tadhi dhimwa po thilu. Noshi osha kala ashike okumona oshingoli, oshingoli, noshingoli.”

August Babel okwa li a popi ndhika momasiku 26 Januali 1889, pethimbo lyoBerlin Reichstag onga oshilyo shongundu yoSocial Democratic Party (SDP). Moomvula dhi li ne dha tetekela omumvo nguka, iilongo iyali iinankondo yaGerman oya li ya tsakanene pomutumba tagu ithanwa Berlin West Africa Conference mo 1888 moka German a li ta unganeke okutopola Africa. “Moshipopiwa shaBabel okwa li a fa ta e shi wete noku li ontega niita iilulu mbyoka ya ningilwa aaHerero naaNama komatanga gaakwiita guukoloni gaGerman moGerman South West Africa okuza momumumvo 1904-1908,” oshilyo shongundu yo-SDP moHamburg omundohotola Carsten Brosda ta ti . Brosda okwa li ta taambako aaNAmibia mboka ya li ye ya komutumba tagu ithanwa Second Transformational Ovaherero and Nama Congress, ngoka gwa li gwa kuutumba moBerlin okuza momasiku 6-8 Apilili. Aakuthimbinga momutumba nguka oya li ya za kiilongo ya yooloka- Namibia, America osho wo United Kingdom, ya li ye ya okutala ondjokonona yaHamburg, nedhanonkandangala yetuliloskepa medhipago lyaaHerero naaNama. Brosda, ngoka e li omukalelipo gomithigululwakalo niikundaneki yaHamburg, ta ti konima iita sho ya hulu, Babel okwa li a pe uusama omatanga gepangelo lyuukoloni lyaGerman molwonkalo yawo yokuhunga iita, onkalo ndjoka ya li itaayi tsu kumwe noveta yopaigwana.

Brosda ta ti kali shi elalakano lye okutumbaleka Babel onge omukuni gwenenedhilaadhilo ndyoka tali ungaunga nonkalo yokonima yiita, oshoka naye ombepo yuukoloni yethimbo lyawo oya li tayi pepe muye. Ashike osha simana okudhimbulukwa iitya ye yi na ongushu ngaashi tayi ulike shoka aaNamibia ya kala nokukondjela uule woomvula 100. AaNamibia oya kala nokukondjela opo German a dhimbulule olugodhi lwawo; kutya yo oye li ompoinge niikulumuna ya longwelwa ooyinakulu komatanga gaGerman kohi lyewiliko lyondjayi yiita Lothar Von Throtha; Kutya German naNamibia ya ninge onkambadhala yedhiminathanopo, osho wo kutya German oku na oshinakugwanithwa sheopaleko lyuuyuuki nokuyambidhidha Namibia.

Brosda ta popi kutya pandjokonona omapekaapeko oge shi ulika kutya iita yokudhimapo omihoko dhimwe moGerman South West Africa (manga evi i naa li itha nwa Namibia) oga li ga humbata omiyonena dhomiita nomadhipago, noshitsa shika otashi ulikwa momusindalandu gwepangelo lyaGerman okuza momumvo 2015. Ta ti uule woomvula noomvula, German okwa kala nokulyatela pevi noku ipatana omiyonena dhiita moNamibia niilanduli yawo tayi kenyaneke. “Otwa li twa yi mondjuulukwe yuukoloni nale tu uka momimvo dho 1970 nasha. Shoka sha li sha landulwa kokotha mo uukoloni muuluyi wetu thiluthilu, ashike nando ongawo okudhimbwa hoka otaku ende taku kanitha ondjundo omolwa omaidhopo mo gomahangano ge na sha nonkalonawa yaakwashigwana osho wo omapekaapeko gopauakademi,” Brosda ta ti.

Osha pula ashike oshituthidhimbuluthu shoomvula ethele sholugodhi lopOhamakari momumvo 2004 opo ngoka a li nale Ominista
Yomahumokomeho yaGerman Heidemarie Wieczorel-Zeul pethimbo a li ta talele po Namibia opo a ninge edhimbululoiteelo nokugandja ombili, nokwa li a ningi omunambelewa gotango mepangelo lyaGerman a li a ningi ngaaka. Aanambelewa yamwe yaGerman ngaashi Omupresidente goBundestag, Norbert Lammert, okwa li a landula moompadhi dha Zeul. “Etaambeko lyaGerman lyoshinakugwanithwa shawo shopapolitika noshuuyuuki kali na omalimbililo ngashingeyi,” Brosda ta ti.

Ashike epangelo lyaGerman naantu yalyo olya pumbwa okuyamukula omapulo ga simana. Nguka ogo omukalo gu uka nogwa gwana egandjo lyombili, edhiminathanopo, iifuta nedhimbulutho. Ngele otashi ya komuthigululwakalo gwedhimbulutho, Brosda okwa ti oongundu mepangelo lyaGerman lyuukumwe oya tsa ya thithe kutya German okwa zimina okulonga nonkalo ye yonakuziwa yuukoloni. “Okuza ngashingeyi epulo lyonakuziwa yuukoloni oli li oshitopolwa shuudemokoli wetu. Olyo ehiyo lyokumanga uukuni kumwe nokutunga po onakuyiwa ohwepo,” Brosda osho a ti

LEAVE A REPLY

Please enter your comment!
Please enter your name here