Ewiliko lyuudhano woVolleyball monooli otali tege uudhila tali kotha

0
17

Shipi Elago

Ongwediva-Uudhano mboka wa li wa dhana onkandangala mule womukokomoko gwomimvo dha zi ko monooli owu li tau iyadha wa tindila momutumba molwelelo ndyoka li li ta li tege uudhila ta li kotha.

Konyala omimvo ne dha piti uudhano wovolleyball owa li owo wumwe womuudhano wa li tau dhana onkandangala monooli nowa li wu na aamati naakadhona taya longo omutenya nuusiku okukaleka po uudhano mboka wa kala nokuliwa oshipungo monakuziwa.
Pethimbo twa li moonkundathana naAmushangandjayi gwehangano lyoVolleyball monooli Maria Herculles okwa li a holola kutya oye li yi iyadha pokati koshilaleko nonukonda mokuwilika iilonga yoVolleyball molwa aaleli yawo aakulu mboka ya li ya thigi po iilonga okuya pehulilo lyomumvo gwoVolleyball gwa zi ko.

“Nando olukateko olupe ohalu kombo nawa, elelo epe oli li tali kwata ethimbo ele okutula iinima pomahala yo oliha ndjika yi pule komeho pwaa na omalimbililo, ashike molwa otseyo ndjoka yi li pevi natango nomayipyakidhilo giilonga mokati kaawiliki oyendji oshi li she tu ningila oshidhigu opo tu gwanithe po iinakugwanithwa yetu yesiku moliha, ashike otu na omukumo kutya ngele otwa manguluka kiilonga yetu ayihe otayi ka kala ya nakandjegele,” Maria ta ti.

Okwa ti oye li wo ya dhengwa ondhimbo kompumbwe yoshimaliwa moka ngashiingeyi taya iyadha kaye na omukwashilipaleki naashika otashi eta opo ya kale taya nana nondatu.

Ashike okwa ti oye li taya longo omutenya nuusiku opo ya galule omasiku omawanawa gwoVolleyball koshigwana, molwompumbwe yoshimaliwa inaya vula we okukala notonamende yepatululo lyoliha ngaashi shito onkene oya li ya tameke owala noliha pwaa na epatululo ngaashi sha kala omuthigululwakalo gwethigathano ndika moka oosipana dhimwe dha dhana owala uudhano tau yalulwa ,omanga dhimwe nkene tuu oliha ya tamekele dhi ye mokapale.

Onkundana yimwe ya guma omaudhano oyo ndjoka yoshiputudhilo shoAfrican Dream Project shoka ngashiingeyi sha ninga eputu konima sho sha li sha si po kuyele omvula ya za ko molwoshimaliwa shoka kasha po shokufala opolohalama yomapendulepo komeho.

Oshiputudhilo shoAfrican Dream Project osha li okanona kongongahangano yoVolleyball muAfrica ndjoka ya li ya dhika omandiki miilongo ya hogololwa muAfrica, moka Namibia naye a li a kwatelwa mo nelalakano okukwathela okupendula po omaudhano goVolleyball.
Oshiputudhilo shoAfrican Dream Project osha li shi na oshinakugwanithwa shokutekulila uunona uushona uudhano woVolley noku ya pa wo ohokwe yo ku taandeleka uudhano mbuka.

Oshiputudhilo shika osha li shi na omandiki gokudheula uunona ge li gaheyali moshilongo ashihe ashike molwonzo yoshimaliwa ndjoka yi li ngashiingeyi ihayi gandja we oshimaliwa nena omandiki ngaka oga ninga iipilili yomeya.

Nando uudhano mbuka owuli wa shuna monima onkundana ombwaanawa oyo ndjoka kutya aahikihiya ye li yahamano oye li taya mono omadhewo moshilandopangelo moka ya tegelelwa opo ya ka kwathele mependulepo lyuudhano mbuka moNooli ngele ya mana omadhewo gawo.
Joseph Hamunyela oku li gumwe gwaamboka taya mono omadhewo nokwa li a holola nkene e na ehalo opo e ye a longe aahikihiya ooyakwawo mboka inaya mona ethimbo lyokuya komadhewo oompango oompe dhoVolleyball nosho tuu okukwathela mokuhika uudhano woliha.

Okwa ti oye li wo ya tula po oopolohalama odhindji dhokupendula po ovolleyball moka mwa kwatelwa nuudhano wovolleyball yokemunkulofuta ndjoka hayi ithanwa beach volleyball , moka a ti oye na nale okapale ke li kOshakati Independence Stadium hoka oko taya kala haya dhanene uudhano mbuka hau dhanenwa kominkulofuta hoka ku na eheke olindji.
Okwati oye li wo oye na oshiwike showina shomapukululo gwobeach volleyball monooli okukwathela mokufatululila aantu ooveta dhobeach volleyball.

LEAVE A REPLY

Please enter your comment!
Please enter your name here