Gwelulu ote ki ipelwa kohungi yomagongo

0
13

Loide Jason

OVENDUKA-Ohungi yomagongo ndjoka ya li ya unganekelwa moshilandopangelo ehuliloshiwike lya zi ko oya yambuka po noongombe ntano, ongalangombe yimwe noshowo osino.

Shika osha li sha kolekwa komundohotola Albertina Shilongo ngoka oye e li omunashipundi gwokangundu hoka taka ungaunga nomalongekidho noshowo egongelo lyoshimaliwa shoshituthi shoka shomagongo .

Omundohotola Shilongo okwa ti ka kele kiimuna mbyoka ya gandja pethimbo ndyoka, okwali woo kwa gandjwa uushako wu li omilongo ndatu wiihakautu, iikalata yi li omulongo niiyali yomatama noshowo oshimaliwa koomuma shoka sha thika poondola 180 000.

“Shika otashi ulike kutya aakwashigwana oye na ohokwe yokuyambidhidha iituthi yopamuthigululwakalo ngaashi naanaa shika . Otwa pandula noonkondo oshoka natango ope na woo mboka taya dhenge oongodhi ya hala okuthikitha omayambidhidho gawo,” Osho omundohotola a hokolola ngaaka sho ta ulike nkene ya tambulako omayambidhidho ngoka.

Oshituthi shomagongo ohashi dhanwa aluhe kehe omumvo nohashi dhanenwa komagumbo gwapamuthigululwakalo nonuumvo oshitunda shUukwaluudhi osho shin a olufo.

Oshitunda shoka ngashingeyi otashi lelwa komukwaniilwa ngoka e li omu-12 gwomaakwaniilwa yomoshilongo shoka.
Hosea Shikongo Taapopi oku li gumwe gwomaakwaniilwa mboka ya lela olule moshilongo shoka sho a landula Mwaala Gwanashilongo ngoka a li hekulu nokwa li a kululwa ko keso.

Taapopi okuhole ehumokomeho lyoshilongo, onkene okwa gandja omavi koshigwana opo shi ga longithe ooprojeka ndhoka tadhi humitha oshilongo komeho.

Dhimwe dhoomopoloyeka ndhoka ongaashi uushana wiimuna yopaushitwe wu li uutatu mboka wu li moshitunda shUukwaluudhi.
Mohungi omo tuu moka omwa li mwa ningwa oshimaliwa koomuma shoka tashi ka kwathela moku enditha nawa omalongekidho gomagongo.
Omathano gaaleli aakuluntu yomoshitunda moka oga li ga landithwa. Ethano lyaMwaala Gwanashilongo olya li lya landithwa koondola omayovi ge li omulongo nomakwawo oga landithwa woo koondando dhi li nawa.

Omunashipundi gokangundu hoka omundohotola Albertina Shilongo okwa ti kutya omwaalu ngoka gwa gongelwa moshituthi moka inagu tseyika natango onkene nduno taya ka kala omutumba opo ya ka tule kumwe yo yawape okutseyithila oshigwana.

LEAVE A REPLY

Please enter your comment!
Please enter your name here