Komuthiya otaku ka tya pwaka mehuliloshiwike ndika… oMbidi nenge oRukoro?

0
25

Shipi Elago

Ongwediva-Kwa kalelelwa ku na sha ko kwa ziwa ku na omulombo, aaNamibia oyendji unene tuu aaholi yokatanga kokoompadhi oye li ya tula onguti puuya ya tegelela oshizemo shoshigongimutima shaNFA shoka ta shitameke ehuliloshiwike ndika mOmuthiya gwIipundi.
Oomwedhi dha piti egumbo lyokatanga kokoomapdhi moNamibia olya li lya kala nokutsina olwithi konima sho she ya puuyelele kutya ekwatathano pokati komitse dhongongahangano yokatanga kokoompadhi moNamibiam, tali fufupikwa NFA lya li lya teka po, shoka sha li sha eta okalamauka megumbo lyokulela okatanga.

Osha li she ya puuyelele kuyele omwedhi gwa za ko kutya ope na iita pokati komuPresidentee gwolutu talu lele okatanga kokoompadhi moshilongo Frans Mbidi naamushangandjayi gwo-NFA Barry Rukoro konima sho Mbidi a li a tokola opo ka gwedhele we okondalaka yaRukoro onga amushangandjayi gwo-NFA, moka Mbidi a li a yi kiikundaneki noku yi hololela kutya ke na ehalo okupa Rukoro okondalaka ompe yiilonga mo-NFA.

Iikundaneki oyindji oya li ya shanga kutya omukalo ngoka Mbidi a longitha ogwa nika oshiponga na kagu li pamulandu oshoka oonkondo dhokutidha Rukoro odhi li mokangundumutima kopombanda mo-NFA hoka oko ke na oonkondo noko ke na okupa omupresidente eziminino opo a ninge omatokolo ge li ngawo.

Oonkambadhala adhihe ndhoka Mbidi a li a ningi opo a tidhe Rukoro odha li dha huulile muunyengwi nonkene ehuliloshiwike ndika NFA ota ningi oshigongi oshinene momuthiya moka oyendji ya tegelela kutya otamu ka ningwa etokolo lya guma onakuyiwa yaMbidi naRukoro.
Kundana okwa li a yi moonkundathana nomutseyinawa gwomaudhano monooli Hafeni Asino ngoka a li e tu vongokononene kombinga yoshigongi shika.

Asino oku uvite kutya egumbo lya-NFA oli na iinima oyindji ya puka nopethimbo ndika oyendji oya tegelela lela oshigongi shika shi ka ninge omatokolo ngoka ge li ga tegelelwa, oshoka okangundumutima ko-NFA moka mwa kwatelwa Fras Mbidi ngoka e li omuPresidente naBarry ngoka e li amushangandjayi oye li ya fa ya ndhindhilika kutya iiyuma ya-NFA oya pumbwa okusiikililathana oshoka ngele inayi ninga ngeyi nena oyo owala taya iteya po.

“Oshiholelwa oshiwanawa osho shika kutya ekotampango lya-NFA ota li ti ngele omuntu okwa kala melelo lyokangundumutima oomvula dha konda pomulongo nena ita vulu oku ka kutha ombinga momahogololo, pampito ndjika iilyo oyindji mokangundumutima ka-NFA oyi li ya kalamo omimvo dha konda pomulongo nethimbo lyawo olya kusha, ashike onga okangundumutima oye na oonkondo dhokulundulula ekotampango opo ya pitike mboka ethimbo lyawo lyakusha ya pewe ishewe oonkondo kekotampango ya kuthe ombinga momahogololo,” Asino ta ti.

“Shika otashi ti ngiini? Otashi ti pakathimbo haka iilyo yokangundumutima ko-NFA oya pumbwathana opo yi itaagulukithe omulonga onkene moshigongi shika ino tegelela naana Barry Rukoro a ka tidhwe nenge okangundu ka ka umbe ko Frans Mbidi koshipundi ngaashi sha li sha popiwa momukanda ngoka gwa li gwa shangwa kuRoger Kambatuka moka a li i ithana opo iilyo yokangundumutima yi ninge shoka ha shi ithanwa Melaka lyoshitakumi ‘Vote of no Confindence’ muMbidi, ano oku ulika kutya oya kanitha eyinekelo lyawo muMbidi, shoka ngeno tashi ke mu kutha oonkondo dhuuPresidente.

Pahapu dhaAsino shika ita shi ka ningwa nando oshoka ayehe kaya li ya dhilaadhila muule oshizemo shomatokolo gawo.
Asino ota ti okuza mosoondaha sho oshigongi shika tashi ka tameka owa tegelela Barry Rukorro a ka kale a pewa okondalaka nando oyomvula yimwe, ye Frans ta kala noshipundi she shuuPresidente,okangundumutima hoka ke na iilyo yi li pokukusha otashi vulika taka ka lundulula okatendo hoka taka popi kutya ngele iilyo oya kala nokuyakula mokangundu uule womimvo dha konda pomulongo inayi ya we momahogololo noku yi pa natango oonkondo yi tsikile noku kala melelo.

“Nando ngaka oge li owala omadhilaadhilo gandje gwopawumwene na itandi ti osho lela tashi ka ningwa ashike ondi uvite kutya ombepo osho yi li ya fa ta yi pepe ngaaka mo-NFA notu li twa tegelela lela omalunduluko omashona taga ka etwa mo-NFA koshigongi shika,Hafeni Asino ta tsikile.

Ekuyunguto ndyoka li li melelo lya-NFA oli li lya pumbwa oku ya pehulilo oshoka olya guma nayi onkalo yokatanga kokoompadhi moshilongo.

NFA oku li oye thimba yi na ongodhi mokatanga kokoompadhi moNamibia sho e li ena iitayi oyindji ya yama kuye, ngaashi oosipana dhokatanga kokoompadhi dhopashigwana yaamati noyaakadhona oosipana dho U20/U17, Ooliha dhopashigwana mbali NPL no First Division, oku li wo e na oopolohalama dhomapendulepo gomawudhano, okutumbula po ashike yilwe.

LEAVE A REPLY

Please enter your comment!
Please enter your name here