Maria Kristof oye Kadenga mokunduluka po oidjalomwa yopashinanena moLuderitz

0
15

Tuulikki Abraham

Lüderitz-Maria Kristof, mwene wongeshefa yedina N & M Design Boutique i li modoolopa yaLüderitz moshitopolwa sha//Kharas, ota tumbula kutya ongeshefa yaye yokuhondja okwe lineekela otai ka likola sha kola moshivilo shoipindi shokomudo shomakolofishi osho sha hovela onghela modoolopa yokomunghulofuta yoLüderitz.

Kristof ota tumbula kutya odula yoneudo okwa nduluka oidjalomwa ya yooloka oyo tai endele pamwe nefimbo. Meenghundafano odo a ninga naKundana, Kristof okwa tumbula kutya odula yoneudo okwa nduluka oidjalomwa ihapu nokwafaneka tai ka mona ovalandi momaulikilo oipindi, oo a hovela 26 Apilili notaa ka hula 02 Mayi 2018.

“Nonande efimbo lihapu ohatu kala twe lipyakidila nokuhondja oidjalomwa yeekastoma odo hadiholoka efiku nefiku, ohapa holoka ngaho omafiku amwe omo eekastoma hadi kala itadi ende naana nawa, nefimbo olo leekastoma da mwena olo efimbo olo hatu dulu okunduluka oidjalomwa ya yooloka, oyo hatu leke mongeshefa yetu.

Ope na ngaashi omwedi Januali oo hau kala wa mwena wa tya filu, nao yoo ohau tu pe omhito ya wana lela opo tu nduluke oidjalomwa oyo nokuli hatu landifa pefimbo eli loipindi yokomudo.” Kristof osho a tumbula.
Kristof okwa tumbula kutya odoolopa yaLüderitz ohai mono ovatalelipo vahapu have uya neembautu okutalelapo odoolopa, nokwa tumbula kutya, ovatalelipo ava luhapu ohava fuuka komidjalo dopamifyuululwakalo odo Kristof a tumbula kutya ihava dulu okukala vehe di na mongeshefa yavo.

Etimaumbwile lomunangeshefa ou, oli li opo kutya, ponhele opo ha landifile poLüderitz Waterfront, opo alushe hapa kala oshivilo shoipindi shokodula shoCrayfish Festival. “Fyee out li ovanelao shili shaashi ovanageshefa vakwetu ovo hava landifilel keenhele neenhele, modoolopa, ohave uya vali okukonga outala opo va ete oilandifomwa yavo, ashike fyee out li ashike monhele yetu omo hatu hondjele i li pondingandinga yoLüderitz Waterfront opo hapa kala omauliko oipindi.” Kristof ta yelifa.

Kristof ota ti okwa hovela ongeshefa yaye yokuhondja modula 2002 konima eshi a mana omadeulo aye okuhondja moshiputudilo shokudeulila ovanhu okuhondja shaRossing Foundation mOndangwa, omo a deulwa oule weehani di li hamano modula 2001.
Modula 2005 okwa mona onhele yokulandifila poLüderitz Waterfront omo eli ta hondjele fiyo onena.

Mongeshefa yaye okwa kuta ovanailonga ve li vatatu. Nomongeshefa yavo ei yo-N&M Design Boutique ohava hondjo oikutu yomaludi aeshe, mwa kwatelwa eedede dovafuko, eembulukweva dovalumenhu, eembaikifa osho yo oikutu yopamifyuululwakalo, oikutu yoshinanena, noikutu yomakoleko nomashasho.

Kristof oku na etumwalaka e li yukifa moshiwana, opo shikale nokuyambidida oilongomwa yomoshilongo ndele vaha kale ashike tava yambidida oilongomwa yokondje yoshilongo. “Mokuyambidida oilongomwa yomoshilongo, otashi ngushupaleke oilongomwa, unene tuu oidjalomwa, notashi etele ovahondji omukumo mokunduluka oidjalomwa oyo tai endele pamwe nefimbo.”Kristof osho a yelifa.

LEAVE A REPLY

Please enter your comment!
Please enter your name here