Okuhe na oilonga omukundu woshili moNamibia

0
21

Onghalo yokuhe na oilonga oi li omukundu munene wa taalela Namibia neenghatu domeendelelo oda pumbwa okukatukwa opo ku talike kutya otau kandulwa po ngahelipi.

Nonande onghalo yokuhe na oilonga oya palamena epangelo meyukililo, inashi kala oshinakuwanifwa shepangelo olo alike okulwifa nokukandula po okuhe na oilonga.

Monakudiwa okuhe na oilonga okwa kala kwa taalela unene vanhu ovo ina ve li honga nokumona eedjapo okudilila koiputudilo yopombada. Ashike mopaife ngaha, novahongwanhu ve na eedjapo dopombada ngaashi eenghatu deedigree neemasters’ degree navo omo ve li momapandaanda vehe na oilonga.

Eshi otashi ulike kutya onghalamwenyo apa ya li oya lunduluka po, onghee nafye otwa pumbwa oku i li humbatela sha yooloka, ngaashi Omwiingilisha ta ti onghalamwenyo ina i kala ongeshefa ngaashi ya kala. Nafye otwa pumbwa okulundulula.

Monakudiwa epangelo nomahangano a nyama kepangelo okwa kala oo unene ovayandji voilonga kovahongwanhu. Opeemhito dinini ovo va dja kouniversity to hange va hengumukila momahangano opaumwene. Ashike eshi onghalo tai ende tai lunduluka ile ya lunduluka nokuli, eli olo efimbo la wapala opo omahangano opaumwene a tambule ko kutya ehololepo leemhito doilonga kali fi ashike oshinakuwanifwa shepangelo ashike osha pumbwa okukala oshinakuwanifwa shavo yoo.

Epangelo nalo ola pumbwa okunghonopeka oshikondo shopaumwene opo omahangano opaumwene a totwe oo a dule okuyandja oilonga kwaavo tava di moiputudilo yopombada vehe na oilonga.

Luhapu oto hange ovanhu tava ti ovaNamibia inava hala okudilaadila ile ova tala ashike mepangelo opo li va pe oilonga. Etumbulo eli oli na oukwashili kombinga imwe ashike kombinga imwe halo naanaa li na oshili.

Shaashi ngeenge owa tala ovanyasha ovo va mana eefikola, otashi dulika shili vamwe vomuvo ve na omadilaadilo mawa okweeta po ongeshefa nokukuta vakwao noku kwafa okuxumima komesho eliko loshilongo, ashike ovanyasha ava kave na nande okafilinga kasha koku va yambidida.

Omunhu ite shi ningile nowina a ye nande okeembaanga moshilongo a ka pule omukuli shaashi okushishi kutya kape na nande oyou te mu pupu. Ashike moshilongo omu otu na mo ngoo ouministeli Woipindi nEefabulika oo u li le po ovanangeshefa. Ouministeli ou owa pumbwa okunghonopekwa opo ponhele yokuyambidida ashike ovanangeshefa ovo va fikama po nale, ngeno otau kwafele unenenene ovanyasha ovo va hala oku ya mongeshefa. Ngeno eyambidido tali di pondodo yopeduelela ngaashi okutunga po omadilaadilo ongeshefa hano obusiness plan, okukumika, okulonga nokudeula shi na sha nongeshefa nosho yo okutala kutya eengeshefa dovanyasha odi li ngoo momulandu okudja petameko.

MoNamibia ngeenge omunhu okwe li longela oupangi, edilaadilo oku ka longa ashike moshipangelo shepangelo, ile moipangelo yopaumwene. Ashike mounyuni omu na ovapangi hava ka fila ovanaudu oshisho komaumbo, hava ka yandja omiti noku ka mangulula oipute, hashi ningilwa unene ovanaudu ovo ve na omikifi doinamenana, inava pumbwa unene va kale moipangelo nosho yo ovanenenhu. Nekwafo lepangelo okutota okulanda eetuwa noilongifo yopetameko okutota po omahangano a tya ngaha moshilongo ashishe.

Oupangi owe li fa ashike naavo ve li longela ounamapya navo eteelelo lavo linene okumona ashike oilonga mepangelo, ashike oshilongo shetu onghene tashi e ta mo oikulya ihapu okudja kondje yoilongo, naayo hatu dulu okulonga. Omeva moishana onghee ngoo taa pwiinine inaa longa sha. Ashike ngeenge okwa yambididwa ovanyasha ava ve li momapandaanda ve na eedjapo otava dulu okukonga omukalo wokwoongela omeva nokutota po eepoloyeka dounamapya. Pamukalo oo, komuvalu wovanyasha ava ve na eedjapo naava vehe di na ve li momapandaanda otaku di. Sho oshilongo nasho tashi xupifwa okukalanda oilongomwa kondje yoshilongo inashi pumbiwa.

LEAVE A REPLY

Please enter your comment!
Please enter your name here