Okwa lopotwa aantu yahamano ya hulitha mehuliloshiwike lya piti

0
23

Maria Namupala

ONDANGWA-Opolisi moshilongo oya lopota aantu yahamano ya hulitha miiningwanima ya yooloka nomiitopolwa ya yooloka moshilongo mehuliloshiwike lya piti.

Olopota yopolisi ya pitithwa komupopiliko gopolisi moshilongo Chief Inspector Kauna Shikwambi oya koleke iiningwanima mbyoka ihamano. Molopota yotango Shikwambi okwa ti okwa lopotwa omulumentu gomimvo 20 a hulitha konima ya li taya dhana omeya nookuume ke momuthima gomeya komukunda Olukeno moshitopolwa shaShikoto.

Nakusa okwa tongololwa oye Awene Oupa Tuna-Omukwathi, olutu lwe olwa kuthwa mo kopolisi mOlyomakaya. Moshiningwanima sha fa oshikwawo natango opolisi oya lopota okanona koomvula ntano (5), ka hulitha sho ka gwile mokanaala komeya Etitano.
Kuuyelele mboka wa pitithwa kuShikwambi owa ti nakusa Lasarus Fillemon okwa li ta takamitha iimuna popepi nokanaala hoka pethimbo lyoshiningwanima, okwa li a kana nokwe ki itsuwa lwanima moka a hulitha nale.

Moshiningwanima sha yooloka okwa lopotwa omulumentu gomimvo 42 i ikutha omwenyo mehuliloshiwike komukunda Eenghombo moshitopolwa shaMusati, nakusa okwa tongololwa oye Kafula Markus, ina thiga po omukanda gwaashoka she mu ikuthitha omwenyo.
Natango moshitopolwa shoka omwa lopotwa olutu lwomulumentu gomimvo 30 lwi itsuwa lwa endjelela momuti komukunda Oshitumbe, nakusa okwa tongololwa oye Simson Shuuya Leonard.

Moshitopolwa shaHangwena omwa lopotwa omulumentu a hulitha natango sho i imangeleke, okwa tongololwa oye Shilandu Jason Nghifikepunye a yambukile komukunda Ongha. Naye ina thiga po omukanda gwaashoka she mu i ikuthitha omwenyo.
Aapambele yoonakusa ayehe oya tseyithilwa nomakonakono gopolisi miiningwanima ayihe otaga tsikile.

LEAVE A REPLY

Please enter your comment!
Please enter your name here