Omaulikilo giipindindi mOshikuku

0
20

Victoria Kaapanda

ONGWEDIVA-Oshiluku shotango shomaulikilo giipindi moshikuku osha thikana, nomaishangitho gokukutha ombinga momaulikilo ngaka oge li metifa, omaulikilo gopaipindi otaga ka kala ko okuza 25 sigo 28 gaJuli nuumvo. Iipindi otayi ka tetekelwa kuulalelo wowina mboka tau ka ningilwa mOshikuku Town Lodge moshitopolwa shaMusati.

Paratus Nepolo ngoka oye e li omunashipundi gOshikuku Trade Association ota ti omaulikilo ngaka giipindi otaga unganekwa nokukwatelwa komeho kOshikuku Trade Association, ehangano ndyoka itaali lalakanene ovenisa yasha ndyoka lya li lya totwa po muSeptember 2017, nelalakano lyokunkondopaleka nokushonga oompito dhomahupilo mOshikuku nomomidhingoloko dhopopepi.
Nepolo ta ti kutya mokuunganeka omaulikilo gopaipindi ngaka, otashi ka kwathela aanangeshefa yomithika dha yooloka ya ulike nokutseyitha iilandithomwa nomayakulo gawo.

“Itashi tala ashike komaulikilo, ashike omukalo gokupala ondjila yuunangeshefa osho wo okuninga omakwatathano gopamangeshefelo. Muuyuni awuhe, omaulikilo ohaga pala ondjila opo aauliki yiipindi ya ninge omakwatathano, okutaambathana omikalo dhingi dhokungeshefa, osho wo okunduluka po uunongo uupe moongeshefa dhawo,” Nepolo ta yeleke ngaaka.

Ta gwedha po ishewe kutya Gazza Music Production (GMP), Remind Trading CC, Elelondoolopa lyaShikuku nOshikuku Trade fair oyo yamwe ya manga uukuni kumwe mokuyambidhidha iipindi mbika, ye ta ti natango mboka ya hala okugandja omayambidhidho ompito opo yi li natango.

Otapu ka kala oolefa dhoshali okuza mOshikuku kumboka ya hala okuya komaulikilo ngaka, okuza tuu esiku lyotango sigo olya hugunina.
“Iiyenditho opo tayi ka kala okuza mondoolopa mOshikuku, oshoka Oshikuku Town Lodge oyi li kokule nondoolopa kashona,” ta ti ngaaka.
Nepolo ta ti omaulikilo otaga ka tameka nuulalelo wowina mboka tau ka kala ko momasiku 25 Mai 2018. Oshitaafula shaantu ye li omulongo otashi ka kotha N$ 4000, manga mboka taya ke ya yaa li moongundu taya ka pulwa ya fute N$400 momuntu.

“Omiyelo odha egulukila mboka yah ala oku ishangitha okukutha ombinga muulalelo wowina osho wo momaulikilo. Oofooloma dhomaindilo ngashingeyi otadhi monika pethimbo ndika notadhi gandjwa kumboka taye dhi pula, oondando adhihe odha shunithwa wo pevi,” Nepolo ta ti.

LEAVE A REPLY

Please enter your comment!
Please enter your name here