Omugongo wu lilila oongoka hagu ku kwiinine

0
33

Maria Namupala

ONIIPA-Omukulugonale okwa popile mu gamwe gomomayeletumbulo gAawambo kutya omugongo wu lilila oongoka hagu ku kwiinine. Oshiwike sha ziko osha li shopandjokonona monkalamwenyo yomudhani goomuvi dhoshiwambo Raimo Kamati ngoka a tseyika nawa koyendji Zopa, sho a pewa omakwatho gopashimaliwa kaasamalia aanamutimahenda pOniipa.

Zopa okwa li a pula omakwatho nomayambidhidho kaanangeshefa oyendji moshilongo, kakele sigo oompaka ina yamukulwa onkene e li metegelelo. Zopa okwa li a pewa oshimaliwa shooN$50 000, okuza kehangano lyoVantaan Krinteinstopalvela, lya yambukile koFinland.
Nenyanyu okwa ti okwa pandula ehangano ndyoka sho lya kutha okashona mondjato yalyo noku mu yambidhidha a vule okudhana iinyandwa ye noku yi pititha manga yi li pethimbo, ta ti ke na iitya okwa pandula noonkondo, nokwe ya indile ya yambidhidhe woo yalwe mboka ya pumbwa omakwatho nga ye.

“Ngame mwene ondi li omudhani goomuvi dhomOshiwambo, nolundji onda pititha oomuvi dhandje tadhi monika komalungula nadhimwe odhi li muuCD, omolwonkalo yoshimaliwa onda kala tandi ende tandi shongola opo ando ndi pitithe oomuvi odhindji ngaashi shi li elalakano lyandje,” Zopa ta ti.

Omulumentu nguka okwa yambukile mOniipa, noha kala momudhingoloko gOniipa nOndangwa, okwa ti ohokwe ye yokudhana uumuvi oya tameke manga a li mepipi eshona, nolundji sho a li moondondo dhopetameko okwa li ehole okuninga iiyolithi, mbyoka a ti oye mu tsu omukumo opo a dhane okamuvi ke kotango mo 2004.

Dhimwe dhomoomuvi ndhoka a dhana ongaashi Kohi Yomuti – oshiluku shotango, oshitiyali noshititatu, Good Problema hoka ke holike koyendji nawulwe mboka a kwathelwa ngaashi kuNdjeke naadhini yiinyandwa yalwe ya za momudhingoloko gwOndangwa.
Okwa yelitha kutya okwa kala a taalelwa komashongo ogendji ashike nando oongaaka, ina sa uunye molwaashoka okwa hala oku ulika oshipewa noshitalenti she, “eshongo ndyoka lyokwaahe na iilongitho olya thiminike ndje opo ndi ye komalungula ngame ndi konge omakwatho nomayambidhidho, onda li nda mono po ehangano lya tumbulwa metetekolo ndyoka lyu uvaneke tali pendje oshimaliwa, opo ndi ikwathele mokupititha oomuvi dhandje odhindji,” Zopa ta ti.

Ta ti okwa kala kee na iilongitho yopashinanena, mbyoka ta vulu a kwatithe nokutula nawa omawi pomahala, dho oomuvi dhe dhi kale dhi li pethimbo notadhi nyanyudha aapulakeni naatali yadho. Ta ti otashi kumitha molwaashoka sho a indile ehangano ndyoka olya yamukula muule wethimbo efupi, nokwa li e etelwa oshimaliwa shoka oshiwike sha zi ko, nonande eindilo a li e li tula mo natango oshiwike osho tuu shoka.

Zopa ta ti oku na edhiladhilo opo monakuyiwa ya totepo ethigathano lyaadhani yiinyandw, mono taku ka talwa omunyandidhingi,ta ti shino ando otashi kala hashi ningwa aluhe pehulilo lyomumvo , ta ti aagundjuka naya kambadhale ya kale nokudhana uumovi yo ya gandje etumwalaka tali opalele okupitila miinyandwa yomaludhi ga yoolokathana.

Okwa indile ayehe mboka ye na ohokwe nehalo lyokudhana iinyandwa ye shi ninge yo ye ye puuyelele, molwaashoka anuwa oyendji ota ti oya holeka iipewa yawo no inaya hala oku yi ulika.

LEAVE A REPLY

Please enter your comment!
Please enter your name here