Onkeyama yaNdonga ya ti aakalimo takamitheni omavundakano moshilongo

0
12

Maria Namupala

ONAMUNGUNDO-Omukwaniilwa goshitunda shaNdonga tatekulu Kauluma Immanuel Eliphas Etitatu lyoshiwike shika okwa li i ithana omutumba gwiikundaneki, opo yi tseyithile nokugandja elondodho moshigwana omolwa omavundakano ngoka gi iteyela moshitunda moka.
Omukanda nguka gwa leshwa peha lye kuAmushanga Gomukwaniilwa Naeman Amalwa, ogwa ti Omukwaniilwa ye mwene ota lombwele oshigwana shaNdonga opo shi iyageke komapukitho ngoka taga inyenge mOndonga.

“Elalakano lyetu otwa hala okulombwela oshigwana kutya ombelewa ndjoka tu uvite tayi popiwa pOniipa taku ti oyelelo lyoshilongo, kayi li paveta naashino osha hala okutya kayi li woo papitikilo lyaNkeyama,” Hamalwa ta ti ngaaka.
Okwa yelitha kutya aakwashigwana otaya londodhwa kaaya ka fute iifendela kombelewa ndjoka tayi popiwa naamboka ya lopotwa ya futa nale nayo oye li mepuko, molwaashoka elelo lyoshilongo kali na oombelewa mbali, olyi na owala yimwe ndjoka yi shiwike nawa noya kala po anuwa.

“Shika otwa hala woo oku shi yelitha kutya omalenga ngoka ga patulula ombelewa kOniipa oga tidhwa mo miilonga kOmukwaniilwa no kage na uuthemba oku egulula ombelewa yimwe, kage na uuthemba wokulangeka, okufutitha iifendela yomagumbo nuundingosho, okwiithana kutya omalenga gomukwaniilwa nenge okulongitha edhina lyelelo lyopamuthigululwakalo,” Ta popi ngaaka.

Ekunkililo tali ukithwa moshigwana kutya mboka taya iyithana kutya omalenga gomukwaniilwa oga fala Omukwaniilwa kompangu nonkene a tegelelwa koshipotha kompangu yopombanda momasiku 14 Mai nuumvo, nonkene inaga pumbwa okulongitha edhina pambambo.
Aakwashigwana oya londodhwa opo ya tsikile nokulongitha ombelewa ndjoka ya kala po yoshilongo tayi adhika pOluno, yo inaya taambako omahongololo ngoka taya tsakaneke, naya tsikile okufuta iifendela yawo.

Amushanga gwelelo lyaNdonga Sakaria Nepando Amupanda okwa yelitha kutya okwa lopotwa yamwe yomaanamukunda ya ka futa iifendela yawo kombelewa ndjoka tayi popiwa yi li kOniipa, kakele yamwe sho ya mono kutya kayi li mondjila oya ka tala ko iifuta yawo noku yi fala kombelewa ndjoka tayi longo moshili nopaveta.

Oya uvaneke taya ka unganeka iigongi nokuya moshigwana ya gandje elondodho ndyoka lya zi mokana kOmukwaniilwa, sho oshigwana shi kale sha kotokela aateyipo yombili nelandulathano. Taya popi kutya ngaashingeyi oshilongo shaNdonga oshi li mevundakano nometopoko enene kakele elaka lyOmukwaniilwa ihali kondwa, ngele okwa popi oohapu nadhi landulwe.

Omasiku ga zi ko omalenga gahetatu ngoka ga kuthwa miilonga ngashi Vilho Kamanya, Joseph Asino, Fillemon Nambili, Tonata Ngulu, Kashona kaMalulu,Petrus Kauluma oshowo John Walenga ga kala nokuninga iigongi, moka ya ka thaneka ya egulule ombelewa yilwe molwaashoka oyi itaala kutya yo otaya longo moshili, no inaya tidhwa kOmukwaniilwa.

LEAVE A REPLY

Please enter your comment!
Please enter your name here