Osipana yOluno Correctional Service yu ulikile adhihe komutse gondjamba

0
7

Maria Namupala

OLUNO-Osipana yendiki lyoondholongo mOluno oyo ya sindana po ekopi lyuudhano wa Lalas, uudhano mbuka owo wotango tawu dhanwa mondoolopa yaNdangwa, nowa li wu unganekwa nowa yambidhidhwa komunangeshefa a tseyika nawa mOndangwa Timoteus Lalas Nghiwete.
Muudhano mbuka omwa li mwa kuthwa ombinga koosipana dhokatanga konkoompadhi dhi li 10, moka adhihe dha thigathana po nodha li tadhi ulike uunyakwa wadho ngele tashi ya kokuthanga okatanga haka moshili.

Omuunganeki guudhano mbuka Lalas ye mwene okwa yelitha kutya molwaashoka oku na ohokwe yuudhano, osha li she mu pendulile omadhiladhilo opo a kuthe oshimaliwa mondjato ye mwene ye uunganeke uudhano moka aadhani taya hangana nokutala mboka haya undula okatanga kokoompadhi.

Osipana yOluno oyu ulikile adhihe komutse gondjamba sho ya dhana edhingoloko lya hugunina nosipana yoHuhu City,mpoka pwa li iiti tayi teka moshili, kapwa li mwali ta tumbu mukwawo molwaashoka kehe gumwe okwa li ta lalakanene a faalele ekopi nomasindano galwe kaandjawo.

Osipana ndjoka ye ya kadhenga oya sindana ekopi, oombandi osho wo oshimaliwa shooN$ 3000, omanga osipana ndjoka ye ya puutiyali yoHuhu City ya pewa oombandi noshimaliwa shooN$2000, omanga ndjoka ye ya puutitatu yOngwediva City ya pewa oshimaliwa shooN$ 1000.
Uudhano owa li wa tameke Olyomakaya nowa hulu Osoondaha. Lalas okwa yelitha kutya muudhano wawo oya li ya kwatele mo ngaashi etanga lyomokambamba lyaakadhona oshowo oosipana dhoonakulwa aakulu, kakele inadhi vula we okudhana molwaashoka omaishangitho oga li taga ende taga shongola.

“Osha li sha thiminikendje unene opo ndi tulepo okapandi koshimaliwa shooN$ 11 000, hoka nde ka kutha mondjato yandje mwene nelalakano lyokugandja sha moshigwana, onda tala unene onkalo yaanangeshefa yetu momidhingoloko inaaya hala okuyambidhidha ngele tashi ya komaudhano ga yooloka, ohashi kala oshiwanawa okuhanganitha aagundjuka unene ngele tatu longekidha uudhano wontumba momidhingoloko dhetu,” Lalas ta ti ngaaka.

Okwa uvaneke kutya nonande shika oshikando shotango uudhano mbuka tau dhanwa mondoolopa ndjoka, hasho oshikando sha hugunina ashike ekopi ndyoka otali kala tali dhanwa omumvo kehe, moka natango tali kala tali sindanwa kwaamboka ye shi pondola.

Ta ti omumvo tagu ya otaya lalakanene opo ando oosipana dhaakadhona nadho dhi kuthe ombinga, yo taya hangana nokunyanyukilwa pamwe, ta ti uudhano owo owala hawu eta aagundjuka pamwe, okwa pula aanangeshefa ooyakwawo moshilongo nayo ya kuthe ko oongaku opo ya gandje shoka ye na, shi kwathele mokuunganeka uudhano momidhingoloko dhawo.

“Etameko aluhe moshinima nenge moshinyangadhalwa kehe ohali kala edhigu, nonkene molwaashoka opo twa tameke nomakwatho oga kala taga nyangwanyangwa, moshiluku muka otwa gandja owala ekopi, oombandi noshimaliwa, ashike moshikando tashi ya otwi inekela kutya otatu kala twa mona omakwatho mpaka naampeyaka tse tu gandje sha kola kaasindani,” ta gwedha po ngaaka.
Okwa gwedha po kutya monakuyiwa oya hala woo ya kale nomaudhano galwe ngaashi ovolleyball netanga lyomokambamba lyaakadhona, yo taya kala taya tsaathana omikumo ya yambulepo omaudhano momidhingoloko dhawo.

LEAVE A REPLY

Please enter your comment!
Please enter your name here