Shitana naJomolizo ya imbi pamwe

0
204

Pinehas Nakaziko

Ovenduka-Oombale osho dhi ihaka, sho aaimbi yaali dhingi mboka haya imbi omaimbilo gawo omawaanawa moshiwambo goAfro Pop noDancehall, Shitana naJomolizo ya tula uukuni kumwe opo ya tameke oku imba omaimbilo gawo pamwe noku eta po oshipandi shawo shoongalo dha dhenga mbanda. 

Ndika edhiladhilo lya li lya tulwa miilonga kuDragan Djokic a tseyika nawa Antonio, ngoka e na ehangano ndyoka lyoku imba nokukwatitha oongalo lyoDeal Done Records mOshilando. Elalakano lyaayimbi mbaka opo ya tameke oku imba pamwe omolwa ongalo ndjoka ya li ya imbi yedhina Kumininenge, ya li moalbuma ontiyali yaJomolizo, ya li ye shi enditha nawa noyahokiwa koyendji uule woomwedhi odhindji.

“Edhiladhilo ndika okwa li twe li eta po omvula ya zi ko nokwali twe li tula miilonga petameko lyaMaalitsa, mpoka opo twa li twa tameke okukwatitha omaimbilo getu,” Shitana ta ti ngaaka.

Okwa gwedha po ta ti ngashiingeyi oye li nale ya mana nomaimbilo agehe ngoka ge li ga imbwa mOshiwambo, Oshiingilisa, nomoSilozi. Oalbuma yawo otayi ka pita pehulilo lyomwedhi twa taalela notayi ka kala yi na oongalo 11.

Shitana okwa ti moalbuma otamu ka adhika oongalo ndhoka dha dhenga mbanda ngaashi Inolonda Ohonde, Emanguluko naOndakula, ndhoka tadhi ka gwitha oyendji kiipundi. Moalbuma muka oya kwathelwa oku imba kuKamati Ekanda, Glo naLiina, mboka ya eta mo omulyo goongalo omutoye lela.

Shitana okwa popi ishewe ta ti oye li yi ilongekidhila oku ka pititha okangalo kawo kamwe pehulilo lyomwedhi nguka, kooradio adhihe dhomoshilongo, notaya ka thaneka ishewe okaviidio kongalo Inolonda Ohonde. “Konima yoalbuma sho ya pwa, otatu ka enda konyala noshilongo ashihe, mpoka tatu ka kala nokutseyitha oongalo ndhoka dhi li moalbuma muka,” Shitana ta ti ngaaka.
Aaimbi mbaka oya holola kutya nonando oye li ya tameka oku imba pamwe ngeyika, otaya tsikile noku eta po ooalbuma dhawo oyo ayeke, ngaashi sha kala omukalondjigilile.

Oyendji oya kala nokutseya aaimbi mpaka omolwa oongalo dhawo ndhoka dha kala noku inyenga mpaka naampeyaka, unene tuu monooli yoshilongo.

Jomolizo oye e li omuhikingalo ngoka a kala noku nyanyudha piituthi oyindji mOngwediva, mwa kwatelwa omauliko giipindi gaNgwediva, moka a li a nyanyudha oyendji. Okwa li a tseyika noalubuma ye yotango muAguste 2016 yedhina Kaandjetu. Oongalo okwa li e dhi tameke mo 2009, moka a li ha ningi omikwelengendje dhaahikingalo aashona. Mo 2010 okwa li a kambadhala opo a tameke oku imba, nokwa li a imbi ongalo ye yotango yedhina Sisiwami moka a li kumagidhwa komumwayinakadhona opo i itule moongalo, oshoka oku na ewi ewanawa.
Omvula ya piti okwa li apititha oalbuma Epata Lange ndjoka ya kala noku inyenga nawa, nomo mwa li mu na ongalo ndjoka Kumininenge, Episaalomi lyaDavid naUusila Watika.

Shitana omuhikingalo ngoka a kala noku imba omaimbilo taga tungu, noku li e na ooalbuma dhe dhi li hamano. Omvula ya za ko okwa li a pititha oalbuma ye Exuikilo Yambo, moka mwa li mu na ongalo ndjoka yadhenaga mbanda ya imba pamwe naJomolizo yedhina Okulonga Nuudhiginini.

LEAVE A REPLY

Please enter your comment!
Please enter your name here