Taya ilongekidhile uudhano wawo wokomumvo

0
22

Maria Namupala

OMUTHIYA-Ngaashi shili omukalo ndjigilile kutya aanambelewa yoshikondo shelongo miitopolwa ayihe 14 moshilongo, ohaya unganeke uudhano moka aanambelewa oyo yene haya kutha ombinga nonuumvo uudhano mbuka owa thanekwa wu kaleko kuyele omwedhi twa taalela.
Omunambelewa muuministeli welongo moshitopolwa shaShikoto Ernest Kamali okwa yelitha kutya uudhano wawo oweetako omayulu, niitopolwa ine monooli yoshilongo otayiilongekidhile uudhano wawo mboka tati nuumvo owa thanekwa wuka kaleko koGobabis moshitopolwa shaMaheke.
Ehulilo shiwike oosipana ne dhaza miitopolwa ngaashi Oshikoto, Oshana, Omusati nOhangwena, oyali ya dhana mpokapale komaudhano kaMuthiya mpoka pwali omakondombolo ta gali ehete moshili.

“Uudhano wetu owa kwatelamo etanga lyokoompadhi etanga lyomokambamba lyaakadhona oshowo ano ovolleyball, molwaashoka ndika edhingoloko lyetu etiyali okwiilongekidhila uudhano mbuka, ihatu kala tatu lalakanene okusindana, elalakano lyetu otwahala opo tu kale twiilongekidha nawa opo sho tatu ka wayimina oosipana dhilwe dhaza kiitopolwa ya yooloka moshilongo, otuna ontseyo no tatu vulu okutaalela kehe osipana ndjoka tatu odhekelwa,” Kamali tati ngaaka.

Tati uudhano mbuka ohawu unganekwa omumvo kehe nelalakano lyokweeta aaniilonga muuministeli welongo pamwe, mboka yaza kiitopolwa ya yooloka, nokuya hanganitha, nelalakano woo lyokwiinyanyudha nokudheula omasipa gawo, yaa kale owala anuwa yeli moombelewa ihe ya kale taya tsakanene komaudhano.

Omunambelewa ta tsikileko tati oyali ya pendulilwa omaudhano konima yoomvula ne, no yali ya uvaneke opo ya gwanithepo ondjodhi yawo yo taya kala taya dhana omumvo kehe. “uudhano mbuka ohamuzi omusindani ngoka a dhengemo oosipana adhihe, naangoka ena iitsa yi vule ya yakwawo, oye woo haka sindanapo ekopi na yilwe oyindji, nuudhano ohawu dhanwa kiitopolwa ya yooloka omumvo kehe,” Tati ngaanga.
Omumvo gwaziko uudhano mbuka owali wa dhanenwa koMariental, hoka oosipana adhihe dhali dha holoka nawa. Olyomakaya mpoka oosipana odhali tadhuulike uunyankwa wadho, moka Kamali a holola kutya iitopolwa yawo yokonooli yoshilongo oyiilongekidha okutaalela kehe osipana tayi pewa.

Ta gwedhapo kutya olundji aaniilonga ihaya mono ompito okukutha ombinga momaudhano ga yooloka, noshikondo shelongo osha mono ompito yoopala okuunganeka uudhano wawo wokomumvo, nokunyanyukilwa pamwe, “olundji aanambelewa yetu ohaya zimbuka owala nokuya komagumbo, nonande yena ontseyo momaudhano gontumba oya kala yafa ya themenwa pevi, otashi nyanyudha okutala aaniilonga yetu yiitulamo momaudhano, noyendji kayeholo okuthigwapo nande,” ta tsikileko ngaaka.

Yamwe yomaadhani oyati ohashi kala sha simana uuna aaniilonga yena omalutu ga kola noga pama, taya popi kutya omaudhano ohaga tungu omalutu gaantu, yo taya tula uuluyi wawo pomahala, shoka taya ti otashi nkondopeke omalututu, okuga tungapo, go ga kale gena oonkondo ethimbo alihe, noku kala taya vulu okulongasha.

Oosipana ndhoka natango odha tegelelwa dhi kiitaalele ehuliloshiwike ndika pOutapi moshitopolwa shaMusati, shika tashi ningwa nelalakano lyokwiidheula nokwiilongekidhila uudhano wawo.

LEAVE A REPLY

Please enter your comment!
Please enter your name here