“Evi nali topolelwe ayehe, noshithike pamwe” Amupanda

0
90

Maria Namupala

OSHAKATI-Omukwateli komeho goAffirmative Repositioning Movement (AR) Job Amupanda okwa ti oya hala opo evi li topolwe shi thike pamwe, noli topolelwe ayehe kwaa na okagamambinga.

Iilyo yehangano ndika oya li ya ningi omahololodhilaadhilo Etine lyoshiwike sha zi ko, lya ningwa okutameka pokapale komaudhano, oya li ya gandja omukandanyenyeto gwawo poombelewa dhelelo lyondoolopa, noya kaya kompangu yopombanda mondoolopa ndjoka.
Oonakuninga ehololomadhilaadhilo lyopambili mboka oyendji yomuyo aagundjuka mwa kwatelwa nomwaalu gwaanona oya gandja omikandakemo dhawo poombelewa ndhoka, nomiyelo dhoombelewa ndhoka odha kala dha okuza potundi 08h00 sigo 12h00.

Okwa kundanwa kutya pomiyelo dhompangu opwali omukanda kutya ombelewa otayikala yapata ohela notayi patuluka nena.
Amupanda okwa ti omunyanyo gwawo ogwa landula omatamaneko kutya elelo lyondolopa yaShakati olya gandja oshipambu shevi modolopa ku Maphios Cheda ngoka ha longele oshikondo sho High Court Northern Division, nokuli omukwashigwana gwaZimbambwe.
O AR oyati oshinima shika uulingilingi, oya tamaneke woo Cheda kutya ota kutha aanamibia omahala gawo molwa uundikushi waanangeshefa noku longitha uulingilingi, noya holola kutya oshinima shoka osha puka unene.

Cheda okwa konekwa ta kutha aaNamibia omavi gawo, nokuga longitha muuwanawa we, moka ta tungumo oongeshefa dhe mwene nokwiiyambapaleka ye ta thigi ooyene yiipambu yomavi mboka pomitenya taya mono iihuna yaana omalukalwa naapambele yawo.
Ongundu yaahololi madhillaadhilo oya gandja omukanda kemo taguti Cheda nagandje oshipambu shevi kumwene gwalyo Patrick Shilongo, ngoka a adhikile amono omukuli okuza kombaanga a tameke okutungitha olukalwa lwe.

Job Amupanda oye akwatele komeho ekanka, opamwe na Dhimbulukeni Nauyoma na Goerge Kambala, mboka yeli aakokoli yo AR moshilongo, aagundjuka mboka oya popi kutya evi nali topolelwe aantu ayehe noshithike pamwe, inaaku talika oondikushi nenge oontumba yoongando molwa\shoka aantu ayehe oyena uuthemba okumona evi moshilongo shawo.

Oyali ya yedha omapulakata ga nyolwa omatumwalaka ga yooloka, moka limwe lyatya “otwa hala uuyuuki nelandulathano moshilongo shetu”, “iyagekeni uulungilingi onga aaleli.” Oya pula woo opo ngoloneya goshitopolwa shaShana Clemense Kashuupulwa a kuthwe miilonga molwaashoka oyi itaala anuwa kutya oye ena mo olunyala miilonga ayihe yuulingilingi mondoolopa ndjoka.
Taya popi kutya mboka yeli poombelewa dhoondondo dhopombanda mepangelo otaya longitha uulingilingi.

LEAVE A REPLY

Please enter your comment!
Please enter your name here