KAKU NA ESIKU LYAA NA EDHINA

0
47

Omasiku gane, getu thigila ondjokonona.
Omwedhi omutitano komvo, gw` etelela Luhodhi.
Omvo g` omilongo heyali nahetatu, gwa ya nomapendafule.
Ly` ohela halyo lyonena,nani ihaga faathana?
Ethimbo lyoshitumbetango, Nambudhi etelela Shikukutu.
Owala ye ya tayi koko oondjandjo,yi li pevi nopombanda.
Yayee yayee yayee.

Makutsi twa pulakenene,yayee na meme ya kukwee.
Omeho ngeno ga tale,olwiithi lwa tsinagala.
Dho omililo odha tema, ayihe ya halakana.
Shaningwa ng` epathimo lyeho, nenge olwaadhi lomvula.
Kapwali omwali ta tumbu omukwao,yayee engwangwano.

Evi olya kakamene,Omalutu ga ndjungwandjungwa.
Komindundumo, ha dhomvula tayi loko.
Ekunguluko lyali mo, ha lyo meya gefundja .
Olyo ombinzi tayi tika,ya aashitwa ya Kalunga.
Gondjembo okwali ta yaha kolutu, Gombele tatsu pomutima.
Gw`Ekaspeli ta lata komutse, g`Odhila ta umbu ooshela noomboma.
Oshali oshidhigu noshitilithi,shika osha pupyalele.
Yayee epiyagano.

YaToivo okwa tile,ekondjelomanguluko ele lyo elulu.
Okwa popi dhuuka,Cassinga na Vietnam oshilalo oshitalala.
Kashina siku shipole,nando pu pite omivo odhindji.
Ombinzi ya tikile esiku ndyoka , kayinasiku yi lote nenge yi kukute.
Otayi shisha esiku ne esiku, oshilalo tashi tolokanwa.
Oosa dha Cassinga na Vietnam, kadhina siku dhi hupulwe.
Yayee! edhipago lya kaanahenda.
Manga iilalo mbyo ya loloka …

Iita ya faalela oontana , dha Nelende lyuUgwanga.
Owala yaya nomakanda , ga Shongombe sha Amutenya.
Eso lyosheendelela,lya yambula no hiinina.
Waana mutanda kuna ngombe ,nge kuna mpaagona kuna Iilya.
Etheni ndi dholomote ,Nando tandi kokoma .
Ote lilile komwenyo, nda teng` omapendafule.
Galala ga vululukwa, ondahala ga penduke.
Ga lyemo miiyimati ye emanguluko.

Oh! Engathithi lyaamwameme, moombila dha Cassinga na Vietnam.
Ya ningi aahikololimbinzi,yali yena elalakano limwe.
Ombinzi yawo, emanguluko ya shasha.
Nando inayeli mona,elalakano olya adhika.
Ye omukaliko taka hokolola,ayehe yeshi tseye.
Itatu etha okuya lila oyali ye kongo lyetu.

Cuba okwa matukile, Angola naye uupathi alalele.
Taya kwathele oshigwana, tashi tselwa koombulu.
Dhali pevi nopombanda, dha lopotelwa kegoya.
Kaale ko poondjila,Kalegetse ye mwene.
Mbulu osho iyolitha,Nalunanga osho imemeha.
Ta nuka ye ta igidha ,esipa lyo ombunda lya teka po.
Dhika odha Nakalindi,hasho dhali twa patana.
Oshigwana sha hangana , ihashi gwile pevi.

Mpaka elima apitikepo, lyoku uupik` oshigwana.
Shimbombolok` iihuna , shika kondjele evi lyasho.
Mo Angola mwa kolele ,ndele noohanana odheyile.
Taya pula oshikulumbwati,Omota ni B tena.
Yo yeke dhipe Kapinya, omushiningwa kadhimbwa.
Nalunanga alunduka,pamwe nomalandwambongo.
Taye tuyi moshipala,SwAPO kayi sindane.
Ngeno yetu shololeke , tse tu shune omutse miipeta.
Kalunga keshi gwa gumwe , oha gandja ye ta yekulula.
Nashoka eku nunina , oteshikupe nethimbo lye lyoopala.
Siku lyoye siku ly` mukweni.

Pamba ihakwatha egoya, eenkondo otekupe ngele oto kambadhala.
Tse iihupe ya Cassinga na Vietnam, otwali twa tokola otoko.
Tu tsikile tatu kondjo , sigo okomukwaita gwa hugunina.
Tuna eimbilo tili ti: Keso nako okegumbo,ombila nayo ondjugo.
Shigwana sha Namimbia, Pamba okwa kondjo pamwe natse.
Naashoka sha pitipo, iha kwatelwa ngele ta tenge.
Nando shetu ehameka , otwa li kohi yo omagalikano.
Gootatekulu Ndumen, pamwe naaholimbili.
Noongerka adhihe mo Namibia, no muuyuni.
Mehangano taya imbi: Tate Kalunga tala ishigigwana…..

Gonale okwa popile,omukaliko te shi hokolola.
Tse iihupe ya Cassinga na Vietnam.
Anuwa! Katumushi.
Uupyu w` ekondjelomanguluko, otweu mona n` omeho.
Uululu walyo, otweu makela.
Uule walyo, otushi k` uhokolola.
Muukumwe tatu tumbula, onga Jesus tatu ti:
Omuwa ya dhiminapo oshoka kayeshi shoka taya ningi.
Aamwameme yaya , yaka dhilogela.
Omuwa: oomwenyo dhao pungula,oyali aakondjeli yombili.
Oomwenyo dhao hupidha,oyali aakondjeli yoshili.
Mekolo lyoye ya kuutumbika, oyali omapenda omawanawa.
Momawawa goye ya papatela,oyali aakondjeli yuuyuuki.
Naga vululukwe nombili,mapenda ga Namibia.
Eyigandjo lyayo mekondjo , lya eta esindano.
Otatuya dhimbulukwa, ethimbo nethimbo.
Itatu etha okuya lila,oyali aakondjeli manguluko ya shili.

Omutoti: Natalia N. Amunyela Sheya

LEAVE A REPLY

Please enter your comment!
Please enter your name here