Oshivilo shoCrayfish oshi-11 moLüderitz osha enda nawa

0
46

Tuulikki Abraham

Lüderitz-Oshivilo shoipindi shokomudo oshi-11 modoolopa yaLüderitz osha enda nawa. Oshivilo shoipindi osho hashi ufanwa oshivilo shoCrayfish, osha lukilwa oludi loshi oyo hai hangika ashike mefuta laLüderitz.
Oshivilo shoCrayfish odula yoneudo osha danwa koshi yoshipalanyole “Efuta letu eliko letu”. Oshivilo osha hovelele momafiku 26 April tashi hulu mo 02 May 2018.

Ovanageshefa va dja keembinga neembinga doshilongo ova li va mona omhito okuuya vaulike oipindi yavo momaulikilo oipindi okomudo modoolopa yokomunghulofuta, koumbuwanhu woshilongo moLüderitz. Ovaleli novakwashiwana vahapu okudja keembinga neembinga doshilongo navo ova li va mona omhito okuuya va tyapule oshivilo sha tya ngaha.

Ovanangeshefa vahapu ovo va li va kufa ombinga otavahokolola omauliko oipindi aenda nawa. Omunamido 27 Angela Amunime a dja kOndangwa ota tumbula kutya, omauliko oipindi okwa enda lela nawa. Amunime oo opo ta ende ko lotete koLüderitz ota ti okwa li e ya okulandifa oikulya noihongomwa yopamufyuululwakalo, ngaashi outwishi, omahandja, omaungu, omavanda, omalilo nosho tuu.
Mwene woTatsu Fashion Design Inga Boye, a dja kOvenduka ota tumbula kutya odula yoneudo oya li oshikando shaye oshititatu okukufa ombinga momauliko oipindi yokomudo modoolopa yaLüderitz.

Ota ti eedula adishe mbali 2016 no 2017, okwa mona kutya omauliko oipindi okwa li lela aenda nawa okuyelakanifa nodula yoneudo. Boye ota ti omauliko okwa enda nawa, ashike ovalandi inava fa ngaashi eedula mbali da pita.

“Ondi wete kutya otwa mona mo sha ndele otwa li tuvahapu unene, novanhu vahapu ottava landifa oinima ya faafana. Eedula mbali odo nda li nda kufa ombinga, omwaalu wovakufimbinga ovo tava landifa owa li wa ngabekwa. Odula yoneudo natango ondi wete ovaunganeki ova li ngoo va ngabeka omwaalu, ndele ope ke uya ovanageshefa vamwe veuya ashike voo kakwa li vashiivifilwa kutya ovatambulwa.
Shaashi otwa li tuvahapu, yoo odoolopa oishona, otwa mona mo sha ngaa hewa. Ashike oshivilo shoipindi osha li momhepo iwa nomakolofishi neeshi dikwao otwa lya yoo.” Boye osho a fatulula.

Oshivilo shoCrayfish osha patululwa pambelewa kOminista Yeeshi nEedjo domefuta Bernhard Esau, mOlomakaya 28 April 2018. Ovaleli okudja koitukulwa ya yooloka moshilongo ova li va mona omhito okukala poshivilo shoipindi shokomudo shoCrayfish oshi 11. OmuPlimiya wokoProvince yaNorthern Cape koSouth Afrika, Sylavia Lucas opamwe novaleli moshitopolwa shaye navo yoo ova li va mona omhito okukala moshivilo shoCrayfish moLüderitz.

LEAVE A REPLY

Please enter your comment!
Please enter your name here