Tjiuma a taamba ko nenyanyu oomina mOpuwo

0
44

Loide Jason

OVENDUKA-Mayola gwondoolopa yOpuwo Albert Tjiuma, okwa ti ngele oonzo odhi na ongushu yomangeshefelo ndhoka tadhi popiwa dhi li momudhingoloko gwawo otashi nyanyudha, oonzo ndhoka otaku popiwa kutya odhi li dha pumba noonkondo muuyuni, nongele odha pondolwa okutulwa miilonga nena nadhi gandje iilonga tango kaantu yomondoolopa ndjoka opo dhi wape okuyambulapo oshitopolwa shoka.
Okwa hokololwa kutya aniwa moshitopolwa shaKunene omwa monika omamanya goludhi ndoka haga vulu okundulukwa nokulumbakanithwa noonzo dhilwe opo dhi shite po oludhi loshitenda lwa kola na ihalu ndonyoka nuupu, lwo ihalu kwatwa kOndalu yaNelyanga. Onkene hadhi longithwa mokuninga ooindjina dhoondhila, osho wo iilongomwa yilwe yondilo.

Onkundana ndjika oye ya poluhayela oshiwike sha zi ko . Oonzo ndhika otadhi adhika pEpembe, ookilometa 87 kuuningininombugantu wOpuwo, mondjilakati moka manga ino adha Okangwati. Pehala limwe konyala ookilometa 65 manga ino adha Etanga ngele oto hingi okuziilila kOpuwo, osho wo limwe momudhingoloko gumwe gwaFransfontein, ndjoka kayi ili kokule unene noKhorixas. Oonzo dhimwe otaku popiwa dha lala pehala li li ookilometa dhi li 30 okuza kOpuwo, momudhingoloko gwEtanga
Tjiuma okwa ti kutya onkundana ndjoka otayi nyuwitha omakutsi na oshoka oshilongo shika oshina omwaalu gwaagundjuka guli pombanda ka guna iilonga.

“ Shoka tandi tsu omuthindo ooshoka kutya, aagundjuka yomoshitopolwa noshowo oshilongo ashihe koonono naya pewe iilonga tango oshoka out na omwaalu gwopombanda kagu na iilonga nonande oyendji yomuyo oye na oonzapo dhi li dha za kiiputudhilo yopombanda,” osho mayola a hokolola ngaaka.

Tjiuma okwa hokolola woo kutya ondoolopa ndjoka yili oshilandopangelo yoshitopolwa shoka oya tambulako nomaako gaali ehumokomesho na oya hala nokuli li tameke meendelelo ngaashi tashi vulika.

Ookampani ndhoka tadhi ningi omakonaakono odho Celsius Resources yaAustralia noNamibia Rare Earth ndjoka yi na omidhi dhayo koCanada. Celsius Resources oyo tayi konaakona momudhingoloko ngoka gu li ookilometa 30 okuza kOpuwo wa thinda kEtanga. Namibia Rare Earths ota konaakona omahala galwe gaali.

Oomvula dhi li omulongo dha pita po, Omukokoliplesidente Sam Nujoma, okwa li a thamuna kutya oondundu dhaKunenme otadhi vulu okukala dha holeka oonzo dhi na oshilonga nongushu kaaNamibia. Onkene momumvo 2008, Nujoma, ngoka e na onzapo yuulongelwe moGeology, pethimbo a li ta ningi iikonga yokuhila aahogololi ya hogolole oSwapo,
okwa li a kankamekitha endhagadhaga lye kombanda yoondundu ndhoka dha kunduluka Opuwo. Okwa li a londo e ta tatula omamanya gontumba, nokwa li a zi ko nomamanya ga ka ningilwe omakonaakono koolabola kutya ngiika oonzo dhinipo tadhi vulu okukala dhi li kohi yoondundu ndhoka.

Omukuluntuwiliki goCelsius Resources, Brandan Borg, okwa popi metumwalaka kutya kutya oonzo ndhika ‘dhoCobalt’ odhi li taku tengenekwa dhi thike pootona 126 100. Shoka sha hala okutya osha pitilila shoka okampani ya li ya tegelela.

Shika oshinima sha simana shoka tashi ka ninga Opuwo onga oshitopolwa sha simana shoonzo ndhika,” Borg ta ti. Ta gwedha po kutya iizemo otayi ulike kutya oonzo odhi li lela odhindji, onkene ope na ompito onene opo mu ka vule okukala oomina dhi vulithe puyimwe.
“Celsius Resources oya tala okutula po omina ya lelepala noyi shi oku inekelwa. Oshitopolwa otashi vulu okuningwa omina nuupu, oshi na engungumano lyopapolitika, sho osha gamenwa sho natango oshi na ishewe omatungilo ge li nawa.” Borg ta tsikile. Ta ti ishewe pethimbo iilonga yomina tayi ka kala yi li metifa, Opuwo oyi li pehala ewanawa nokufala ‘oCobalt’ koWalvis Bay mpoka tayi vulu okututwa mo moshilongo yu ukithwa kaalandi muuyuni awuhe koonono. Yo natango uudhigu wolusheno itawu ki igogonyena po pomina ndjika, oshoka olusheno ndoka halu thithwa okuza kegwo lyomeya gaRuacana oli li popepi lela.

Namibia Rare Earths naye ota ti omakonaakono pEpembe nomidhingoloko dhi li mbali dhilwe odhu ulika iizemo iiwanawa. Onkene okampani otayi ningi omakonaakono ga gwedhwa po, moka tayi ka longitha ooNelomba yomushindi gwiipilangi opo ya ka thaneke omathano okuziilila mokalemo, nelalakano opo ya toole mo euvoko lyomuule kutya oonzo ndika odhi ihanena ehala li thike peni sho dhi li kohi yoondundu ngaaka.

LEAVE A REPLY

Please enter your comment!
Please enter your name here