KOmatale oko kwa za aamwayinagona yAawambo nAaherero

0
211

oKomumbiishofi Shekutaamba V.V. Nambala

Otaku ndjokononwa Aaherero ya tembukile kuumbangalantuninginino okuza kehala lyokokule kOmatale, ehala ndyoka lyi li mondingandinga yaAfrica osho wo kuuzilo. Onkene oya li ya adha Namibia ya pitile kuumbangalantu koKaokoveld momimvo dho 1700.
Aawambo nayo wo oya li ye ya kuumbugantuninginino okuza kOmatale mondingandinga yAfrica lopomimvo 1300, ya landula ondjila ya faathana okupitila komulonga gwaKunene noya adha olukalwa lwawo momumvo 1775, moka ye li ngashiingeyi.

Ondjokonona itayi tu lombwele ashike kutya momvula moka Aaherero nAawambo ya thiki, ashike okokutya oye ya pamwe ethimbo alihe.
Onkene, oya pambathana, kokutya yo aamwayinathana. Ohashi popiwa aluhe kutya Kalunga (Ndjambi-Karunga) okwa shiti Mangundu nomukulukadhi gwe. Aamwayinamati yaali (yamwe ohaya ti aamwayinakadhona) oya li aavalwa yomezimo lyaMangundu. Uunona uyali waMangundu owa li tau ithanwa Nangombe naKazu (Kadhu nenge Kanzi).Kehe mpoka ya za, aamwayinathana mbaka oya kala pamwe, oya enda pamwe osho wo okuthindikilathana pamwe sigo taya thiki moNamibia.

Ope na omahokololo ogendji kutya aamwayina mbaka oya topoka ngiini. Ehokololo limwe otali ti mbaka yaali naantu yawo oya ziilila konooli sigo okoMaruru, nokutanauka okupitila mOshomeya sigo opomuti gOmumborombonga muumbangalantu waTsumeb. Pomuti ngoka oya topoka nombili ngaashi eyeletumbulo lyOshindonga tali ti aana yandimba ihaya kala oluhwa lumwe. Iigwana iyali oya li ya shitwa po ngaaka. Nangombe okwa ningi omuthithi gwAawambo, omanga Kazu a ningi gwAaherero. Ashike oya kala nekwatathano mondjokonoma yawo ngaashi tandi ke shi ulika mpaka. Pambepo, Aaherero nAawambo ayehe oyi itaala muKalunga, omushiti gwaayihe mwa kwatelwa naathithi.
Sho aamwayina mbaka ya topoka, oya kala ye na ekwatathano, unene tuu mokupindika. Sho aashangi ya li ya thiki mOwambo oshikando shotango mo 1851, oya li ya tsakaneke iipindi pokati kAaherero nAawambo . Oya li taya shingitha pokati kawo iiyela, osho wo oongombe. Aawambo momimvo dho 1850 oya li taya landitha ngaashi omagonga, iindjendje nosho tuu kAaherero yo taya pewa oongombe dhokumuna. Aatiligane yotango mOwambo momumvo 1851 oya lopota wo kutya mondjila yawo oya li ya adhika ketemba lyAawambo, osho wo ketemba ekwawo lyaakulukadhi naalumentu yaaherero aniwa yu uka kOwambo taya ka talela po. Momasiku 23 Mai 1851, omushingithi nonomukongo, Francis Galton, mondjila ye yokuya kOwambo okwa li a shanga ta ti:
“Onda li nda tsakaneke aakulukadhi yAaherero ye li 86, etata lyaamboka ya li ya kwiinina uunona tau kudhile, naalumentu yAaherero ye li 10. Tse otwa li 14, nAawambo oya li 24., shoka sha li sha eta omwaalu gwaantu 170. Oongombe dhomiinga dhi li 206 odha li tadhi hingwa, onga oshizemo shokupingakanitha nAawambo, nomwa adhika mu na oonzinzi dhi li ndatu ine lwaampoka.
Aaherero oya li muudhigu wokuyugwa iinima yawo komihoko dhopuushiinda. Yo natango taya yi ishewe muudhigu wuukoloni. Shika osha eta opo Aaherero ya kale ya andjagana nokutaandela moNamibia alihe, osho wo kiilongo yilwe ngaashi Botswana, Angola naSouth Africa. Ngu e shi ngele Aaherero mbaka omidhi dhawo kadhi li moNamibia olye mboka ya li ya monithwa iihuna kaaNdowishi nokufalwa kooCameroon? Ope na Aanama mboka ya li ashike ye shiwike komadhina, Seymour, Piccinin naPaul, ya li ya galulilwa moNamibia okuza koCameroon momumvo 1916.

Pethimbo ya li taya yugwa komihoko dhilwe, omukwaniilwa Maharero okwa li a yi kAawambo a ka konge ekwatho omolwa Aanama mo 1867. Onkene Aaherero yamwe oya ka mona omalukalwa mokati kAawambo. Momumvo 1887, Aaherero oyendji oya li ya yi kOwambo ya ya ontuku Aandowishi mboka ya li taye ya kolonyeke. Oontauki dhAaherero dhokoWaterberg dhaKambazembi odha li dha yi komukwaniilwa Nehale kOshitambi opo e ke ya gamene.

Otaku popiwa wo kutya pethimbo lyedhipago lyAaherero kAandowishi, oyendji oya li ya fadhuka po ya ya kuuzilo wOndonga, mpoka ya kala pomahala ngaashi Onamutenya, nElombe moshikandjohogololo shaNayena. Omishangwa otadhi ulike kutya muJanuali 1905, omukwaniilwa Salatiel Kambazembi gwaWaterberg okwa li a thiki komukwaniilwa Nehale nongundu yaakulukadhi 40 naalumentu 30. Omukwaniilwa Salatiel otaku popiwa kutya okwa li omumwayina gwaWilhelm Kambazembi, ngoka wo a li kuume kaNehale. Konima yiita yuuyuni yotango, Aaherero mboka ya li mOnayena oya li ya tembukile koKaokoveld, nokonima oya taaguluka okuya muAngola. Pethimbo olyo tuu ndyoka Omukwaniilwa Daniel Kariko gwaMaruru nakakukutu komatanga gaSamuel Maharero, oya li ya yi kOngandjela. Omukwaniilwa Kaindjikwe okwa li a yi komukwaniilwa Kambonde kaMpingana kuuninginino wOndonga (Onamayongo). Aaherero yamwe oya yile kOntananga mo 1904 okupitila mOkaukweyo, omanga yamwe ya li ya falwa kUukwambi onga oontauki, nokUukwanyama woo. Otaku tengenekwa Aaherero 400 ya li ya tembukile kOwambo petameko lyomumvo 1905.

Kakele kekwatathano ndika lya tumbulwa pombanda pokati kAaherero nAawambo, Aaherero oyendji oya li ya yi kOwambo onga aakwatelikomeho yaatumwa, aatonateli yomomagumbo, osho wo aahingi yomatemba. Onkene momambo ogendji goongerki, unene mOlukonda otamu adhika omadhina gAaherero ogendji ngaashi Gottlieb Tjeree, Alfeus Kaikove, Noa Ukombe Kamberipa nagalwe ogendji.
Ekwatathano pokati kAaherero nAawambo kalya li ashike mokupindika, ashike nopankalathano wo ngaashi okuhombolathana. Inashi tseyika nawa naana kutya Aaherero yangapi ya tungile mOwambo. Shoka tu shi osho shika kutya Aaherero oyendji oya kutha omadhina gOshiwambo nomazimo (ngaashi Aakwanekamba, Aakwananzi, Aakwambahu, nosho tuu) uule woomvula odhindji, ashike oye na tuu omidhi dhawo dhAaherero. Uuna taya hokanitha aanona yawo, ohaya tanta piituthi yawo kutya, ‘Tse aashimba-otatu shuna kOshimba yetu.’
Itashi vulu oku ethwa inaapu tumbulwa Otjeru. Aanafalama yopoOtjitoroa nOkarumue pokati kOutjo nOmaruru. Mo 1910, Aawambo, Aadamara naaHerero ye li 100 lwaampoka oya li taya zi mofaalama Otjeru. Oya kala aanafaalama mpaka okuza moomvula dho 1800, sigo ya li ya thiminikwa kepangelo lyaSouth Afica petameko lyoomvula dho 1930 ya ye koFransfontein, Otjituuo, Otjohorongo, osho woo koondoolopa ngaashi Otjiwarongo.

Mokati kawo omwa li oofamili dhAawambo ngaashi Nikodemus Ndinda, Cornelius Futika, Wilhelm Amporo, Kleopas Mbarandonga (Mukuju), Mika Bamm, Kaleb Kambanda, Gabriel Shangula (Iiyangula), Josua Iihuhwa, Emmanuel Shangula (Amutana), Kambwa Timoteus Mishinga, nayalwe oyendji.

Shika osho ondjokonona paufupi yekwatathano pokati kAawambo nAaherero okuza tuu sho ya zile komatale pondingandinga yaAfrica. Okukala kwawo pamwe oya kala nombili. Aaherero nAawambo oya pambathana shili. Ezimo limwe enene. Oya kala noku endela pamwe sigo ethimbo ndyoka ya li ya yiwa moshipala kuukoloni. Nemanguluko, ethimbo olya thikana ngashingeyi opo Aanamibia ya yooloka ya koleke uukwashigwana wawo.
Omumbiishofi Shekutaamba V.V. Nambala oha longele ELCIN. Oshinyolwa shika osha li sha nyanyangidhwa koPrime Focus muMai 2009.

LEAVE A REPLY

Please enter your comment!
Please enter your name here