Nambinga natango onkee ngaa tayi omapoli

0
60

Loide Jason

Omulumentu ngoka a patulula oshipotha shi na sha nefiko lyombashu ye kohonda ye onkulu okwa ti nonando opwa pita ethimbo ina longelwa omuyonena kuye onkene ngaa natango e li momalimbililo.

Frans Nambinga okwa ti nonande oku na omukumo kutya oshipotha shoka otashi konaakonwa kopolisi onkene ngaa natango ta lala ina kotha oshoka keshi kutya omutondi ngoka ota galuka uunake.

Okwa hokolola kutya ohonda ye ndjoka yi shiwike kedhina kuKundana ihe itayi vulu okutumbulwa kedhina oya kambadhala iikando iyali okutomeka ombashu ye omundilo .

Oshikando shahugunina ooshoka sha holokele omwedhi gwa zi ko shoka sha halutha Nambinga kutya omwenyo gwe nani ogu li moshiponga.
“Opolisi oya pulaapula ndje ngaa ashike natango ondi na ngaa omalimbililo kutya uunake omakonaakono ngoka taga ka pwa oshoka natango itandi kotha, oshili,” osho omulumentu ngoka a hokololele Kundana.

Frans Nambinga okwa hokolola ndhika sho ondunda ye ndjoka ha lala ya tomekwa omundilo oshikando oshitiyali kuwalye ihe ye oku li ta fekele omukiintu gwe ngoka e na naye okanona oshoka aniwa okwe mu ningila omatilitho ogendji noonkondo noonkambadhala dhedhipago iikando oyindji.

Omukiintu ngoka e shiwike nawa kedhina kuKundana ihe ita tumbulwa oshoka omapyopyo ngoka inaga kolekwa , aniwa oya li ya kala pamwe nomuholike gwe oomvula odhindji ihe aluhe ngele opwe ya okwaa tsa kumwe nena shotango ha ningi okukutha oshilwitho opo alwithe omumati.

“Kehe ashike ethimbo pu na oontamana shotango ha ningi okukutha ombele opo a tse ndje. Ihe olundji ohandi pondola oku mu vula oonkondo,” ta hokolola kutya okwa kala nokulya ta pi sho a kala mohole nomukadhona gwe ngoka a kala naye mombashu yimwe.
Shoka tashi nywitha omakutsi mehokolo ndyoka ooshoka kutya aniwa nduno omukiintu ngoka okwa kala nokuhepeka Nambinga nomalaka noshowo oku mu kuthila uundini womahooli mboka wa kala noku holekwa koshi yiikutu mondjato .

“Onda kala nokuhaluka oshoka omukiintu oye tuu ngoka okwa kala nokulombwela okanona ketu kokamati kutya okwa hala nda sa opo ya tameke okukwata oshimaliwa shoothigwa shoka hashi kwatwa kehe komwedhi. Sho ta lombwele okanona hoka omomakutsi gandje ihe onda li nda idhidhimike ndaa mu longele iilonga yuushadha,”osho a ti ngaaka.

Okwa ti shoka okwa li she mu kutha momutumba e ta ka lombwela efamilia lye opo a wape okupewa omayele ngoka tage mu kwathele ina longa nande uushadha washa ngaashi mboka tawu longwa kaalumentu aakwawo moshilongo.

“Okwali woo nda taalelepo ombelewa yaMonica Gender Violence Solution moka nda li nda pewa ehungomwenyo kugumwe gwoomaanambelwa mboka Philipus Tuhafeni Petrus. Shoka nasho wo osha kwathela ndje mokushunitha ondjahi yandje pevi,” osho a hokolola ngaaka.
Ombelewa ndjoka ya popiwa pombanda ohayi ungaunga aluhe nomahepeko gaalumentu ngoka taye ga ningilwa kaakiintu moshikandjohogololo shoka.

Nanando Nambinga okwa patulula iipotha yi li iyali a patululila ngoka ta fike po ombashu ye onkee nga opolisi ya ti kutya omakonaakono oge li metifa

LEAVE A REPLY

Please enter your comment!
Please enter your name here