Natu kaleni netumba momayithano getweni

0
27

Okwa li pe na ethimbo limwe sho iilonga yuulongisikola, uupangi osho wo uusita woongeleka ya li ya tseyika nawa onga omaithano. Kokutya aantu mboka oya li haya longo iilonga yawo neitulemo osho wo nelandulathano. Ngashingeyi ohokwe yetu oyi li peni momayithano getu? Kehe ngaa milonga moka to adha aantu nena oto adha mo aantu ye na ombepo ombwiinayi, inaaya simaneka yakwawo, unene tuu aakuluntu moshigwana, aantu yaa na omikalo. Aantu mboka yaa na ko nasha nokulonga iilonga yawo. Aantu mboka haya lombwele mboka ye na okuyakula taya ti: “Ngame onda vulwa. Galuka ngula.”

Otatu popi aantu ya longwa noya li ye na okampito kokuhogolola omaithano gawo, aantu ya ya koosikola mpoka aakuluntu yi idhipagele po, yo ye na elago ya mono iilonga konima sho ya mana omailongo gawo.

Natu dhimbulukweni kutya muuyuni wonale, okuninga omupangi, omuuvithi nenge omulongisikola oyo ashike oompito dhomaithano dha li dha egulukila aaluudhe pethimbo lyepangelo lyokatongotong.. Okwa li wo pe na iilonga yilwe, ngaashi okukala omuyakuli moombelewa, shoka kasha li sha simanekwa nando oshoka osha li tashi gandja nokuulika efano lyomuntu to longele kumwe nepangelo lyokatongotongo yo naakolonyeki oya li ya gandja iilonga yoludhi nduka onga ofuto kumboka taya vulu oku inekela.

Uupangi, uulongisikola osho wo okuninga omuuvithi oga li ogo omaithano moka aantu haya yi mo ye shi kutya yo oya hala okuninga oonginiya, oondokotola nenge aadhindi ashike kakwa li tashi pitikwa pethimbo ndiya lyonale. Onkene oya ningi aalongi, aapangi naasita, noya li taya yakula aantu moshili, nonando omathimbo ga li omadhigu ngaaka. Aapangi oya li ye na ombili yo ye na esimaneko uuna taya panga aavu

Aalongisikola oya li ye shi ninga oshinakugwanithwa shawo kutya kehe omunona e li mongulu yawo otaye ke mu pa ompito opo a vule okumona elongo lyopombanda. Aalongi oya li ye li yi itula mo, oya li ye li onga aakuluntu kuunona yo oya li aalongi. Osha li sha pumba omulongi a ye miihulo nokanona ke li mongulu ye nenge posikola ye. Aavali oya li ye shi shi kutya uuna okanona kawo itaake shi enditha nawa kosikola, nena omulongi ote ya paandjawo e ye e ya lombwele. Uuna omupangi a panga omuntu a za komukunda gwawo, omukunda aguhe ohagu nyanyukwa, oohapu oombwanawa okwa li tadhi taandele kutya okanona kangadi oka panga ntumba nawa. Oshigwana osha li hashi nyanyukwa uuna sha mona omulongi a zala nawa ye oti ihumbata nawa, nohaya pula uunona ngele ohawu longwa komulongi ngoka ye shi kutya okwa valwa kulye

Omusita oye kwa li ha kandula po omaudhigu agehe momukunda, okwa li omuhungimwenyo, ye okwa li ha popi noonkolwe ndhoka hadhi dhenge aakulukadhi yawo, nokugalikanena aakalimo yomomikunda mboka ya fa ya li taya zi mo mondjila yawo. Opwa li etumba. Ashike ngashingeyi kashi ko we. Ombepo yokuyakulathana nayi tu galukileni. Otwa pumbwa okumona uuntu wetu. Kashi shi ashike oondjambi dhetu ethimbo kehe

LEAVE A REPLY

Please enter your comment!
Please enter your name here