Okugandja okuna elago

0
18

Maria Namupala

ONDANGWA-Ositola yiitungitho yaCashBuild oshiwike sha zi ko oya gandja oshindji koosikola ndhoka tadhi adhika momudhingokolo gwOndangwa, shika osha ningwa okupitila methigathano moka mwa kuthwa ombinga koosikola ndhoka.

Omunambelewa omukuluntu mostola ndjoka Robine Jacobs okwa yelitha kutya ohaya longekidha ethigathano lyomasindano aluhe konima yoomvula hamano, moka haya hiya oosikola dhomimidhingoloko moka mu na oositola dhawo opo dhi kuthe ombinga.

Jacobs okwa ti nuumvo oya gandja elombwelo opo oosikola ndhoka dha hala okukutha ombinga dhi thaneke oshilimbo shomutima tashi ithanwa Art Heart CashBuild, moka kehe ongundu yaalongwa ya thaneke mo tamu tothwa ndjoka kadhenga yi vule adhihe dha kutha ombinga.
Ta gwedhapo kutya ehangano olyiitaala momupopyo ngoka ha guti okugandja okuna elago komeho gokutaamba nonkene ya toloka ya gandje moshigwana nokepipi eshona shoka sha pitile momathigathano ga yooloka.

“Molwaashoka ethigathano lyetu halyo lyotango nuumvo otwali twa gandja oshimaliwa shooN$ 15 000, koosikola hetatu konyala adhihe ndhoka dha kutha ombinga, iilongitho yosikola ngaashi oopena, oompya na yilwe oyindji,” Jacobs ta ti.

Kakele koshimaliwa shoka ehangano lya gandja koosikola ndhoka oshali, odha li woo dha pewa omapapa mwa kwatelwa noonzapo nomakopi, aalongwa mboka ya longa nawa oya pewa oonzapo nayilwe oyindji.

Molwaashoka oosikola ndhoka dha li dha gongala odha li dha kutha woo ombinga muudhano wopamuthigululwakalo, ndjoka ya li yu ulike nawa noya zala omuzalo gwa faathana oya pewa woo omagano.

Pethimbo lyiidhano yomuthigululwakalo oya li ya humbata noku ulika yimwe yomiilongitho mbyoka hayi longwa moCash Build. Oosikola ndhoka dha pewa omagano ongaashi Akuniihole, Omwandi gwElago, Shinime Shiivula, Otala, Amunganda,Iindangungu,Ehangano oshowo Olukolo.

Jacobs ta ti yamwe yomaalongwa mboka ya thaneka oya li ya pewa oombandi dhiikushu, oshingoli oshowo oshisilveri, nelalakano lyokuyatsa omukumo ya tsikile nuudhiginini, ta ti otaya tsikile nokugandja moshigwana, yo taya yambidhidha nokutsakaneka epangelo ondjilakati, pethimbo ndika sho epangelo lyi iyadha lyi li monkugo yi na onkambe.

Okuuvaneke taya tsikile nokugandja omayambidhidho mpoka sha pumbiwa, noya tala unene koshikondo shelongo, shoka tashi dheula nokundungika epipi eshona ndyoka olyo lyi li aaleli yokomongula.

Jacobs okwi indile opo oosikola odhindji dhi kuthe ombinga methigathano ndyoka, yo taya imonene oshindji okuza kositola yawo, ta ti shika ohashi ningwa nelalakano okugandja ompito kaalongwa ya tale mpoka ya thikama nuunongo wawo wokuthaneka, oshowo wiinyandwa niidhano yopamuthigululwakalo.

LEAVE A REPLY

Please enter your comment!
Please enter your name here