Okwaana oonzo dhopashimaliwa eshongo enene maahikingalo

0
36

Maria Namupala

RUACANA-Nonande aahikingalo oyendji taya kambadhala okweetasha tashi nyanyudha noku nyuwitha omakutsi goyendji, yamwe oyiiyadha monkalo yombumbwe yoonzo dhopashimaliwa ndjoka tayi ya katitha okupititha nokuya komeho nokwiimba oongalo ngaashi shili ondjodhi yawo.

Omuhikingalo a tseyika nawa monooli yoshilongo Joel Kalilo nedhina lyokuhika oongalo Lil Joe ota lalakanene okuyambulapo oongalo moshilongo. Moonkundathana ndhoka twa ningi naye oshiwike shika okwati okwa nyanyukwa oku kala gumwe gomaahikingalo aaNamibia.
Lil Joe omumati goomvula dhopokati, okwa valelwa momukunda Okaungudhiya momudhingoloko gwaRuacana, ye mwene okwa kokela moWalvis Bay naakuluntu ye. Okwa yelitha kutya nonande yena omalalakano gokupititha ooalbuma odhindji ngaashi tashi vulika yo ya taandelithe etumwalaka pamukala goondjimbo, oyena omashongo ogendji ngoka ta ge yiimbi okuya komeho niipewa yawo.

“Ngame mwene meputuko lyandje onda kala ndahala oku ninga omuhikingalo, ashike inandi mona ompito nondjila ndjoka ndina okulandula petameko, ookuume kandje oyali ya tsundje omukumo nokulombwelandje ndi tameke onga tandi idheula ngame ndi tale ngele tandi shi pondola,” ta thamuna ngaaka.

Okwa ti okwa kala ena ompumbwe yoshimaliwa opo a pitithe oalbuma ye yotango, ashike eshongo ndyoka olyemu tula pevi nolyeeta a kale inaa pititha oalbuma nenge yimwe, nonande ena uungalo a pititha kookamwe.

“Nonande nda taalelwa keshongo ndika itandisi uunye no itandi sholola ondina okwiimba oongalo, aluhe uuwanawa ihawu zi pokapala ka yela owuna okukondja sigo wa sindana, esiku limwe onandi ka mona aasamalia aanamutimahenda taya kwathelendje oshimaliwa ngame ndi pitithe oalbuma yandje, ondina omukumo mwaayihe tandi longo no tandi lalakanene, Lil Joe ta gwedhapo ngaaka nomukumo.
Okwa yelitha kutya okwa sindana omapapa ogendji pethimbo ali mondondo onti-12, moka a kwatelamo ngaashi ethigathano lyaahikingalo mosikola yawo, ethigathano lyokuulika iitalenti yawo.

Wumwe womuungalo mboka a pititha ongaashi Super love, Fishes in the sea, okuna woo okamusic video taka monika koYoutube. Okwa pula moshigwana opo shi mu yambidhidhe a vule okupitha oalbuma ye ndjoka tati ina vula okupititha omolwa iikwa niipangitho kaayipo.
Ta yelitha kutya olundji oha kala uuvite etumba molwashoka otaya longele kumwe naahikingalo ooyakwawo, ya yambulepo ehangano lyaahikingalo moshilongo yo aaNamibia otaya ulike ohokwe yawo mokuhumithakomeho oongalo dhaaNamibia.

Okwali woo a pandula Nampongo ngoka e mupa uunongo, opo a vule a ulike oshipewa she, tati ota tsikile nokugandja etumwalaka moshigwana naangoka ta vulu okukuthamosha ta kuthamo.

LEAVE A REPLY

Please enter your comment!
Please enter your name here