Omugundjuka a tota osikola yokuthaneka

0
65

Loide Jason

WINDHOEK-Omugundjuka gwepipi lyopokati ngoka e li omukalimo gwomolukanda Havana moKatutura moVenduka oku li a nduluka po osikola yokuthaneka.

Frans Nambinga ngoka okwa ti okwi ilongo okuthaneka omathano ngoka omanga a li omushona lela a li kosikola yopevi.
Ngashingeyi nguka oku na osikola ndjoka hayi dheula aanasikola ooyakwawo nkene ye na okuthaneka ethano lyomuntu, omatungo nenge kehe shimwe shoka tashi vulu okuthanekwa.

Ngashingeyi nduno nguka oku na osikola ye ndjoka yi li molukanda ndoka lwa tumbulwa pombanda mpoka opo ha dheulile ayehe mboka ye na ehalo oku shi ninga.

“Ngashingeyi ondi na po omunasikola gumwe ngoka ta hokitha, okwa ndopa ondondo onti-12, ihe ngashingeyi mokuthaneka nokumbambeka omathano ngoka ota hokitha, ano eshi shi nawa. Ngashingeyi otandi dhilaadhila opo ndi mu shangele ombapila ndjoka yi li nawa tayi vulu oku ke mu taambitha koshiputudhilo shopombanda shedhina College of Art,” osho a popi ngaaka.

Nambinga okwa li woo a hokolola kutya oku uvite uunambano sho aavali oyendji mboka ya eta uunona wawo wu dheulwe ye mu galukila e taye mu lombwele kutya uunona mboka ngashingeyi otawu longo nawa moosikola unene miilongwa mbyoka yi na sha nuunongo.
Shika okwa ti kutya oshiputudhilo she ohashi pula ashike oondola 50 komwedhi ngele omuntu ota dheulilwa okuthaneka.
Nambinga okwa hokololele Kundana kutya okwa li a tsuwa omukumo komulongi gwe gwokoongundu dhopevi ngoka a li he ya longo oshilongwa shoSocial studies.

“Oshili omusamane ngoka okwa li ehole okuthaneka nokwa li ha ithana kehe ngoka e na ohokwe mokuthaneka a ye e ke mulonge konima yosikola. Ngame onda li gumwe gwomuyo onkene nda longitha uunongo mboka noku wu dhiginina,” osho Nambinga a hokolola ngaaka
Oshili otandi pandula omulongi gwandje ngoka oshoka okwa li a tsu ndje omukumo woo ndi kuthe ombinga momathigathano ngoka ge na sha nokuthaneka shoka nda ningi ee tandi vene omathigathano ogendji.
Shoka woo sha tsu ndje omukumo mokuya komeho naashika ooshoka kutya onda li nda hogololwa opo ndi ka kalelepo oshilongo koKiina mokuthaneka ndele woo tandi zi ko nekopi.

“Onda li nda tokola opo uunongo mbuka ndi wu longithe ndi wape okulonga woo yakwetu mboka ye wu pumbwa moshilongo,” osho a hokola ngaaka ye ta yolo mo kashona.

Ngashingeyi Nambinga okwa ti kutya aniwa ota indile moshigwana ngoka e na iilongitho yi na sha noArt yi gandje koshiputudhilo shoka opo yi wape okulongithwa kaanasikola mboka taya hiti posikola mpoka.
Okwa ti osikola ndjoka ompeempeka noya totwa ashike momasiku 22 gaMaalitsa nuumvo.

LEAVE A REPLY

Please enter your comment!
Please enter your name here