Omukokoliplesidente a pewa omagano kuVernier Investment

0
40

Victoria Kaapanda

OSHAKATI-Vernier Investment okwa gandja omagano giipakete yoohii, nelalakano lyokuyambidhidha evalo lyomukokoliplesidente Sam Shafiishuna Nujoma , omagano goohi oya li ye ga gandja esiku lyedhimbuluko lyaCassinga omasiku sho ga li 04 Mai nuumvo, sha ningilwa pombelewa yoSwapo mOshakati.

Evalo lyomukokoliplesidente Nujoma otali ka kala ko momasiku 12 Mai nuumvo, sho ta ka gwanitha oomvula 89. Oshituthivalo otashi ka tyapulilwa pegumbo momukunda gwe moka a velelwa mOkahao moshitoplwa shaMusati.

Omushinapundi goVernier Investement Robert Shimooshili, okwa popi a ti yo pamwe na Camoposatu Investment oya li ya tokola opo ya tule uukuni kumwe opo ya vule okuyambidhidha koshituthivalo shomukokoliplesidente nomaludhi goohi ngaashi Horse Mackerel, Dentex oshowo Hake dhongushu yiimaliwa yi thike N$ 15 000 nomagano ngoka otaga adhika mostola yoohi ndjoka yi li onga oshitayi shawo tayi ithanwa Oshakati Cold Storage po Continental Number 1 mOshakati.

Shimooshili ta gwedha po kutya oshi li sha simana notashi nyanyudha kuyo okukwathela nakashona hoka ya gandja okukwatha mevalo lyomukokoliplesidente. Oshoka okwa lwila noku eta ombili moshilongo shaNamibia.

“Evalo lyomukokoliplesidente nali tsikilwe okudhimbulikiwa opo wo uunona wu shuwe esimano lyomuplesidente kwa li Sam Nuujoma nosho wo wu tseye kutya ngele taku popiwa Nujoma olye , nowu landule wo moompadhi dhe”. Shimooshili ta ti.
Omusimanekwa Pendukeni Iivula-Ithana ngoka a li oye omupopi a simana gwesiku okwa ti ye omukwaSwapo lela, no kape na esiku a ze mo moSwapo. Iithana ta ti oshali she mu kumitha nayi oku uva ombelewa yoSwapo tayi tungwa koMariental niimaliwa yi thike poomiliona heyali.

Iivula ta ti okuwete sha puka lela noonkondo, sho epangelo tali longitha oshimaliwa shi thike mpoka, okutunga ombelewa omanga oshilongo shi li monkalo ombwiinayi yoshimaliwa .

Ta pula kutya iimaliwa yi thike mpoka otaye ke yi kutha peni, omanga oshilongo tashi lili noshili mompumbwe yoshimaliwa nale. Oku wete kutya oshimaliwa oshindji nayi okulongithwa ashike okutunga ombelewa.

LEAVE A REPLY

Please enter your comment!
Please enter your name here