Young Chiefs a pewa yimwe nomiiyagaya opamwe noosipana oonkwawo mbali dhoChiefs

0
29

Shipi Elago

OSHAKATI-Kati kalukula hwanduka ndjila ngele ya hulu galuka, olweendo lwosipana ndjoka oyo awike ya kalela po oshitopolwa shokonooli moliha yopombanda moshilongo yoMTC Namibia Premier League (NPL) Young chiefs oyi li yi iyadha tayi yalula oonyothi konima sho ya li ya pewa yimwe nopevi kosipana yaUNAM osoondaha ya za ko mOshakati.

Young Chiefs okwa li e ya muudhano mboka e li kohulo yegonga ashike okwa li e na ompito yaandjuka okwiikaleka moliha ashike okwa li a dhana okalimba komakutsi konima sho a li a ethele mo ookoola mbali muule wetatadhingoloko lyotango nokudhenga ongundu yaatali ndjoka ya li ye ya momwaalu omunene pomutima.

Aayambidhidhi mboka oyendji ya kala noku ondamena komalungula okutala nkene osipana yoBlue waters ya li tayi shi enditha kombinga hwiyaka oya li ya dhengwa pomutima koYounga chiefs unene tuu sho yu uvu kutya Blue Waters okwa li e li kohi yoondhimbo dhaAfrican Stars moka a li noku li a tulwa 3-1 okuya pokafudhepo.

Edhengo lya Blue Waters olya li ngeno lya opalela Young Chiefs oshoka andola ngele Young Chiefs okwa li a sindana nena okwa li e na okuhupa okakuya koPremier liha oshoka Blue Waters okwa li e na owala iitsa 32 omanga Young Chiefs a li e na 31.
Ashike Young Chiefs okwa li a tsikile nokudhana onkoshi komakaha sigo omokati kedhingoloko lyahugunina nando okwa li e na oompito okwa li a thanga e na uumbanda wu vule naambu waKanakule.

Sho ku na oominute 20 Young Chiefs okwa li a tula mo etanga limwe no ku eta eyalulo lyi kale 1-2 ashike Ronnie Kanalelo okwa li a komanda aamati ye opo ya tule ko ekumba konima naashika osha li sha tula onkalamwenyo yaYoung Chiefs muudhigu.

Etango olya li lya lembe nondjendi niipala yaamboka ya li pokapale ye ya okuulika uukwa wanankali naYoung Chiefs oya li ya tameke okunika uupongo omanga oomwenyo dhawo dha tameke oku lindimana oshoka oya li ye wete kutya uudhano woPremier liha owu li pokusheka miitopolwa yokonooli notashi vulika ya ka kale ashike taya uvu oPremier liha ngokatana komiilya.

Omuthitu gwaniimbungu inaya konda yo iimbungu ota yi lili nale , okahiya kahugunina oka li ka hende kehe gumwe a li pokapele komutima naayambidhidhi oya li ya ende okanamunoka okuthiga po okapale oshoka Young Chiefs okwa li a tsuwa ko iilyaaka koPremier liha.

Ashike okakuya koPremier liha ina ka faalela ashike Young Chiefs oye awike ashike oka li wo ka faalele oosipana adhihe dhokoNooli mbali dhooChiefs. Chief Santos naRundu Chiefs mboka wo nayo ya li ya pewa iimbale opo ya shune kooliha hoka ya li ya yambukile.
Okuzamo koosipana ndhika moPremier liha oshili eyambeko enene koosipana dhokuushimba oshoka shika otashi ti itadhi ka matuka we iinano iile okuya kevi lyiimpungu, oshinima shoka tashi ka kwathela oondjato dhawo oshoka ohadhi longitha oshimaliwa oshindji okuya koRundu, Oshakati noTsumeb.

Ngashiingeyi Young Chiefs oku na okushun koFirst Division pwaa na malimbililo noku na oku ka lwa a tula ombunda moshihwa ngele okwa hala a galukile moPremier liha.

Oyendji oya li ya tula ombedhi melelo lyaYoung Chiefs ndyoka lya li lya ningi yawomba yaadha elolo, uungame nosho wo okungwanyagula mboka ya li ya shishimba nosipana petameko.

Okukala koYoung Chiefs moPremier okwa ninga omahepu ngashiingeyi noshitopolwa shokonooli ngashiingeyi otashi ligamene koshipala shomushiti pamwe taku zi ekwatho opo ishewe ya kale nokutala omawudhano ngaka moondoolopa dhawo.
Oosipana dhoka dhi li komalwilo oku tala ngele otadhi yi koPremier Liha ongaashi Onambula United, Ongwediva City,Africa Motto, KK Palace noUNAM Ogongo.

LEAVE A REPLY

Please enter your comment!
Please enter your name here