Ann Singer ta ka pititha okangalo ke omwedhi twa taalela

0
9

Pinehas Nakaziko

WINDHOEK-Omusindani gwomakopi ogendji moshilongo, Annastasia Linus ngoka a tseyika nawa nedhina lye moongalo Ann Singer okwa holola kutya ota ka pititha kamwepo komuungalo we omwedhi twa taalela, onga ehwahwameko lyoongalo ndhoka tadhi ka kala dhi li moalbuma ye ontiyali.

Ann Singer okwa ti ke shi naana okangalo hoka ta ka pititha, oshoka oku li e li oombinga mbali, noku na uungalo uyali mpoka ta ka hogolola kutya ota pititha keni. “Ondi na uungalo uyali mboka wa pwa nale ngaashi Twalenge naIineya, mboka wu na omulyo gwoongalo omutoye nowu li tau ka nyuwitha omakutsi gaapulakeni oyendji,” Ann Singer ta ti ngaaka.

Uungalo auhe mbuka owu li wa ningwa omikwelengendjo kuJoe-K okuza koZimbwabwe. Ann Singer ngoka a kala a mwena po uule woomvula mbali okwa ti shika itashi ti kutya ita imbi we, ashike okwa kala ashike a tula ombunda moshihwa, moka a kala nokuninga omaimbilo omape, nokutsa uukuni kumwe naahikingalo yopondje yoshilongo opo a etepo oongalo ndhoka dhi na ongushu.

“Ngame natango ondi li mostudio te longo nuudhiginini, nonda hala okupititha oalbuma yandje omvula ndjika. Paife ondi li nokuli nda mana okukwatitha omaimbilo gandje ge li gaheyali, moka omo tandi ka hogolola okangalo hoka tandi ka pititha pamwe nokavideo kako,” Ann Singer ta ti ngaaka.

Ann Singer ngoka ishewe a li a tsu etsokumwe nehanagno enene lyoku eta po omaimbilo lyomoSouth Africa lyoMabala Noise omvula ya za ko sho a li a topoka noDeal Done Records, okwa gwedha po ishewe ta ti ye onkene ta tsikile nokuninga omaimbilo ge ngoka omawanawa, ga imbwa mOshiwambo nomelaka lyOshiingilisa.

Muungalo we mbuka uupe, Ann Singer oku li a longa pamwe naahikingalo yomoSouth Africa naNigeria, mwa kwatelwa Moz-Kidd.
Ann Singer okwa li a wayimine ehangano lyoongalo manga a li omushona lela. Oalbuma ye yotango ndjoka kwa li ya dhenga mbanda okwa li yedhina Bullet Proof, ya li ya piti mo 2016. Petameko lela Ann Singer okwa kala nokuimba naahikingalo ngaashi Mushe, Berthold naWaka.

Ann Singer okwa li ishewe a tilitha oyendji sho a li a sindana omakopi gane mo 2016, ngoka a li asindana mehangano lyokugandja omakopi kaahikingalo dhingi yomoshilongo (NAMAs).

LEAVE A REPLY

Please enter your comment!
Please enter your name here