Ekopi lyuuyuni lyokatanga kokoompadhi lya puma ko

0
20

Shipi Elago

ONGWEDIVA-Sha mana omumvo omasiku, ko kwa kalelelwa ku na sha ko kwaa ziwa ku na omulombo, ethigathano ndyoka hali talika kaantu omayovi muuyuni lyokatanga kokoompadhi masiku lya thiki na oku na ashike nokuli omasiku omashona opo oshitunda shaRussia shi ka taambe ko omangungo gaaholi yokatanga kokoompadhi moshilongo shawo.

Iilongo 32 ya za momanenevi gatano otayi ka tya pwaka muudhano mboka tawu ka tameka momasiko sho taga ka kala 14 Juni sigo 15 Juli omvula ndjika opu ku talike ngoka ta ka kutha po oshishani shokatanga kokoompadhi muuyuni.
Sho nduno ku na owala omasiku taga yalulwa Kundana ota kala noku ku etela oshiwike kehe muule wiiwike mbyoka ya hupu ko oshipala shiilongo yomomanenevi gatano.

Kehe enenevi olyi na ongongahangano ndjoka hayi kalelwa po kiilongo yontumba kekopi lyuuyuni. Oongongahangano nhika ongaashi nee, CAF yiilongo yaAfrica, AFC yiilongo ya za koAsia, CONCACAF North America, Central America naCarribean, CONMEBOL yaSouth America, UEFA ngoka a kalela po iilongo yaEuropa. OCEANIA ina kalelwa po omvula ndjika.

UEFA oye a kalelwa po kongundu yiilongo oyindji yi thike po 14 omanga Africa, Asia na outh America kehe gumwe ota ka tuma owala iilongo itano yeNorth America ta tumu itatu.

Africa kohi yongongahangano yoCAF ota tumu iilongo ye ngaashi tayi landula mpaka; Nigeria, Morocco, Egypt, Senegal naTunisia.
Nigeria:Osipana yokatanga kokoompadhi yaNigeria oya tseyika nawa noshilukadhina The Super Eagles noyi li pehala 50 muuyuni pamusholondondo gwaFIFA.

Nigeria okwa li a dhana mekopi lyuuyuni lwotango mo 1994, na oku li a dhana mo iikando yi li itano ngashiingeyi naashika otashi ka kala oshikando oshitihamano.

Oshikando sha hugunina i ihula okudhana mekopi lyuuyuni osha li mo 2014 sho ekopi ndika lya li koBrazil.
Ngashiingeyi Nigeria oku li ta dhewulwa komudhewuli Gernot Rohr ngoka e li omvalele yaNdowishi na oku li e na ontseyo muAfrica konima sho a li a dhewula iilongo ngaashi Gabon,Niger na Burkina Faso.

Gernot okwa li a tameke okudhewula Super Eagles mo 2016 nokwa li e ya pe okatekete koku ya koRussa konima sho ya li ya sindana po uudhano wawo womalolelo gwokuya kekopi lyuuyuni.

Nigeria ota ka kwatelwa komeho kuKapatein John Obi Mikel ngoka e na ontseyo noonkondo mokati kokapale na oku li omudhani omukulu gwoChelsea na oku li a sindana UEFA Champions League nosipana tuu ndjoka onkene ota ka kwatela komeho aadhani aakwawo.
Morocco: Oshilongo shomuumbugantu waAfrica oshi shiwike nawa noshilukadhina The Atlas Lions na oshi li sha dhana mekopi ndika iikando ine ngashiingeyi moka oshikando shotango sha li mo 1970 noshikando sha hugunina osha li mo 1998.
Morocco ota dhewulwa komudhewuli Herve Renard ngoka e shiwike nawa konima sho a li a sindanitha Zambia ekopi lyiigwana yaAfrica, oyendji otaya dhimbulukwa nawa okahema ke okatokele.

Kaptein Medhi Benatia oye e li a talika onge omudhani a nika oshiponga mosipana ndjika.
Egypt: Oshilongo shomuumbugantu waAfrica shoka sha tseyika nawa The Pharaohs oshi li sha kuutumba pehala eti-31 muuyuni naashika otashi ka kala oshikando oshitatu okuya kekopi lyuuyuni.

Oshikando shotango aantu yaPharaoh ya li ya yi kekopi ndika osha li mo 1934 na oya li yi ihula okuya ko mo 1990.
Omudhewuli gwawo oye Hector Cupe ngoka e li omvalele yaArgentina na oye e ya kwathela okumona ompito yoku ya koRussia kekopi lyuuyuni konima sho ya li yi ihula okuya ko mo 1990.

Mohamed Salah omudhani dhingi gwoLiverpool oku li a talika oye ta ka pa Egypt oshinge onkene uudhano wa Egypt kawu shi kupitilila po omuntu.

Senegal : Oshilongo Senegal osha tseyika nedhina Lions of Teranga no shi na ashike ontseyo yokudhana mekopi ndika yomvula yimwe konima sho sha li sha yi ko kekopi ndika oshikando shotango mo 2002 moka sha li sha ningi ondjokonona noku ya kedhingoloko etitatu lyahugunina, oshinima shoka sha li inashisha ningwa nando onale koshilongo shaAfrica.

Sadio Mane ngoka e li omudhani gwoLiverpool a nika oshiponga oye ta ka kwatela komeho oshilongo she.
Tunisia : Oshilongo Tunisia nasho oshi li muumbugantu waAfrica noshi li shi na oshilukadhina The Eagle of Carthage, kekopi lyuuyuni osha ya ko iikando ine, oshikando shotango mo 1978 na okwa li i ihula ko mo 2006.

Tunisia ota ka dhewulwa komudhewuli Nabil Malou na oye ta ka kambadhala a tale ngele genongo ota ga fe ngaa tuu gongombe.

LEAVE A REPLY

Please enter your comment!
Please enter your name here