Oimbuluma kai na ndjabi

0
24

Efyo lomulumenhu omunyasha oo a xulifa oshivike eshi moVenduka eshi vati a dipawa kopolisi, oli li ondombwedi kutya oimbuluma ihai futu. Oshifokundaneki oshimwameme, shoNew Era, osha li sha shanga kombinga yefyo laSakaria Amateta ‘Kablou’ ngaashi a li a shivika nawa. Opolifi oya li ya popya kutya Kablou okwa yashwa eshi a li a kufila mo ovapolifi ombele, shaashi vati va li tava kendabala okumu manga po. Eshi vati osha landula eshi Kablou a tofwa mo kovatalelipo vamwe ovo vati va nyekwa oinima yavo keengangala da homata. Pefimbo e li, ita tu ka dula okupopya noyelele kutya oshike sheendapo opo opolifi iya she omunhu ou. Pakutala nawa, oshi li kutya kapuna ngeno efyo lomunhu la pumwa oku hafelwa. Ovanhu aveshe ovanhu ashike koshipala shaKalunga. Ashike paife otuwe eshi vamwe ta vati efyo lomumati ou ola eta epupaleko monghalamwenyo yavo. Eshi omanga omumati ou ena ookaume kaye, novakwamuhoko waye, tava kwena omunhu wavo oo evafiyapo.

Ovo va li va pepelelwa ovovo ta vati kutya ovali oihakanwa yaye, no vayandja omahokololo nghee omulumenhu ou, neengangala dikwawo dahomata, eva nyeka oinima momaumbo avo.

Oshililongomwa koshinima eshi kovanyasha aveshe vopaife oshosho ashike kutya okukala u hole oimbuluma, efiku limwe ona i ke ku etela ngoo, ove u ka kanife nomwenyo woye, momukalo tawu kwenifa nayi ovo vekuhole nookaume koye.

Out na yoo okudimbulukwa kutya nonande oshiwana shina omapulo nomawedelepo, nomalilaano nehafo lanakupwe, aishe ya etifwa kefyo laKablou, omakonaakono opolifi moshikumungu omu natango otaa twikile, sho oshiwana shi mone omanyamukulo komapulo nomadilaadilo mahapu oo shi na, shaashi kape na nande oumwe eli pombada yoveta.

Opolifi oilile po okuamena omaliko neemwenyo dovakwashiwana, mwa kwatelwa eemwenyo davo vene, ye Kablou naye okwa li e na oufemba, onga omunhu OmuNamibia nomwenyo waye owa li wa amenwa kekotamhango.

Oshinenenima moshikumungu eshi, oshosho kutya oshidjemo shoulingilingi noubotsotso kashi na efiku shi ka kale shiwa, naluhapu omafyo oipundjamenye oo haa kala ondjabi yoimbuluma.

LEAVE A REPLY

Please enter your comment!
Please enter your name here