Omunandholongo i ikeka nekende sho ehalo lye inaali gwanithwa

0
151

Loide Jason

WINDHOEK-Omunandholongo gumwe okwa iyehameke koshama sho i itsu nekende ye mwene sho aniwa aapolisi inaya gwanitha po ehalo lye.
Sem Iipinge ngoka e li omunandholongo kondjedhililo yedhina Oluno Correctional Services aniwa okwa indile aapolisi ye mu fale opo egeelo lye lyi talululwe ihe okwa lombwelwa kutya otashi ningwa ihe kashi shi meendelelo ngaashi ta pula.
Shika aniwa osha etitha nduno nguka opo i itete nokatandu kekende lyekuma ndyoka pondjeedhililo mpoka.

“Sho nduno a lombwelwa kutya ota falwa nale shoka oshe mu geyitha e ta itete ,” osho omukuluntu gwondholongo moshilongo Hafeni Hamunyela a hokolola ngaaka momulombo ngoka a shangele Minista gwoshikondo shoka oshiwike sha zi ko.
Iipinge okwa li a monika ondjo moshipotha sheyugo kwa homatiwa nokwa li a tumwa kodholongo hoka oomvula ntano omumvo gwa zi ko kompangu yopevi kEenhana moshitopolwa shaHangwena .

Moshiningwanima sha yooloka omukulukadhi gwepipi lyopokati okwa li a kwata ta yakele oshimaliwa shi thike poondola 50 mondhongo komona ngoka e li mondholongo.

Oshiningwanima shika osha holoka kondholongo yedhina Swakopmund Correctional Facility. Aniwa oshimaliwa shoka osha li sha adhika sha holekwa moshifokundaneki shoka Emmy Ganuseb a li ta faalele omona.

Sho aniwa a pulwaapulwa kopolisi nguka okwa popi kutya oshimaliwa okwe shi tula mo oshoka omona Ashley Ganuseb okwe mu lombwele e shi ninge .

Hamunyela okwa ti omakonaakono moshinima shika oga tameka noge li mokati.
Ganuseb okwa li a pewa egeelo lyoomwedhi omilongo 30 kompangu yopombanda moSwakopmund sho a yugu a homata nuumvo muJanuali.
Hamunyela okwa ti kutya oshiningwanima shimwe woo sha holoka ooshoka omunandholongo gumwe a pangwa koshipangelo shondjedhililo sho a yagwa kumukwawo noshipeta shonyala koshama.

Omunandholongo Paul Bruiner okwa li a tsu mukwawo Otfried Stefanus nonyala omanga ye li mondjeedhililo yedhina Hardap Correctional Facility , momasiku sho ga li omilongo 25 gaApiilili nuumvo.
Stefanus okwa li a ningi oshilalo kolupanda lokolulyo hoka a yagwa nokwa li a pangwa nangashingeyi onkalo ye otayi hokololwa yi li nawa.

Shoka aniwa sha etitha okuyagwa hoka inashi shiwika natango.
Bruiner okwa li a pewa egeelo lye lyomodholongo sho a monika ondjo mokweehameka olutu lyomuntu noshowo oku iyaka modholongo . okwa li a pewa egeelo lyoomvula hamano modholongo momumvo 2015 mompangu yopombanda yaMarietal , omanga Stefanus a li a monika ondjo mekwatonkonga nokwa pewa oomvula hetatu momumvo 2015 mompangu yaKeetmanshop.

LEAVE A REPLY

Please enter your comment!
Please enter your name here