Omunyasha te shi pondola mounafaalama

0
12

Martin Ashipala okwa li ashike e na omido 17 eshi a efa po ofikola, a xulila ashike mOndodo Onihetatu. Ngaashi naanaa ovanyasha vakwao ovo ve li mefimbo omo a li, Ashipala okwa li e wete ofikola ya li emanepo lefimbo sho osho she mu etela opo a ka konge oilonga.

Ashike onghalo inai enda ngaashi ye a li a dilaadila, oilonga oyo a li ta dulu okumona okwa li ashike yokulonga mokamini kopOmuthiya. Ashike ei nayo inai mu endela nawa, okwe ke li hanga a kutwa ta landifa ombelela pomunghulo wopate.
Omunyasha ou okwa li te lipula kutya koushimba xwepo. Okwa fiya po onooli ndele ta i koushimba waSwakopmund oko a ka kala ashike ta kosho eetuwa. Konima yeedula dinini moSwakop okwa dja mo ndela ta ka longela keefaalama momudingonoko waSwakopmund noLuderitz. Ashike okwa mona kutya okutekela oimeno hako oilonga a li a hala, eshi sha eta a efe po oilonga.

Monghalo yaye yokuhe na omutumba okwa ka shakena nameme Sara Elago oo a shiivika nawa ongha embale nomwoongeli wovanyasha ovo tava nyengwa konghalamwenyo, noku mu idilila kendiki lezulonghalo laye olo li li konyala eekilometa 180 okudja mOkahandja. Omanga a li oko, meme Elago okwe mu pa eshivo lounafaalama, oo wa kwatela mo noikunino.
Okumeme Elago, Ashipala a dimbulula kutya mboli oku na ohokwe yoikunino unene tuu okulima nokumeneka oimati noihape ngaashi ospinach, omadama, ounavamudesha nomaludi mahapu eendungu.

Eshi oshe mu eta nokuli a alukile keumbo nokupula ovakulunhu vaye ve mu pe okanhele mepya omo a tameka oshikunino shaye.
“Ondjila yange kaya li ipu nonande natango ohandi longo, natango kashi pu,” ta ti ngaho.

Ashipala okwa ka tota opoloyeka yaye yoshikunino mo2017. Ashike mupya munene, oshikunino osho odula oyo inashi mu etela sha, shaashi oikunomwa yaye aishe oya li ya hanaunwa po kokapuka. Ashike ponhele yokufya ounye omunyasha ou okwe ya po nedilaadilo opo a kune eembuto daye moshuunda, omo e di kufa eshi da mena noku di twika moshikunino eshi oumeno va kola nawa.

“Ohandi tona oilongomwa yange lumwe moshivike noku i landifa kovanhu momukunda wetu, novomodoolopa yaMuthiya. Ohandi mono mo oshimaliwa shi fike lwopoN$200 mefiku,” osho Ashipala oo paife e na omido 25 a ti.

Ta ti eshongo olo e na olovakwashiwana ovo have mu yolo ngee ta landifa oilongomwa yaye. Vamwe ohava kala tava popi ongeshefa yaye nai tava ti oha landifa oinima yondilo osho nokuli hashi eta efimbo limwe opo a kanife ovalandi. Ashike eshi itashi mu shunifa omutwe moipeta, nokwa pandula shaashi ope na ovanhu ovo have mu yambidida noku mu kwafela mokulonga oilonga yaye.
Okwa tula ominino dokutekela moshikunino shaye, edi nana kopomba meumbo lovakulunhu vaye, nopaife oku li ta dilaadila ngeno opo a mone omakwafo okudilila kOumisteli Woukashikekookanhu opo a dule okutamununa mo oshikunino. Okwa li yo e na elalakano lokudeula ovakwashiwana pomudingonoko waye ovo navo va hala okuninga oukunino vavo.

Ashike ondjodi yaye inai ninga yoshili shaashi efiku a li a ka ninga eindilo, okwa hanga nale eemhito domaindilo da pwa po. Omaindilo vati ohaa ningwa pokati kaApiilili naMaalisa, hamu kufwa ashike ovanhu ve li mu keshe oshikandjohoololo ashike ye eshi a ya ko okwa hanga nale omwaalu waavo tava pewa oilongifo wa wana. Ashike eshi inashi mu shololifa.
Ashipala ta yandje etumwalaka kovanyasha vakwao ta ti nave li kaleke kokule noikolwifa ndele tave litula mo moinima oyo tai va kwafele monakwiiwa.

“Ohandi udu ovanhu tava ula nge vati ohandi mane po efimbo eshi nde litula moshikunino. Efimbo naanaa lalye handi mane po?. Ovanyasha natu puleni omakwafo kovadali vetu novakulunhu vamwe moshiwana [opo tu ete po oinyangadalwa ngaashi eshi],” osho a kumaida ovanyasha vakwao ngaho.
Josephina Mwashindange omunailonga wokuandjakaneka ouyelele Mouministeli Womauyelele kOshitukulwa shaShikoto

LEAVE A REPLY

Please enter your comment!
Please enter your name here