Oondjamba dha hanagula omapya monooli

0
53

Loide Jason

OVENDUKA-Oshipumbu shoondjamba dhi thike 30 odha hanagula po omapya gaakwashigwana komikunda mbali dhi li moshikandjohogololo shaTsandi moshitopolwa shaMusati.

Oshiningwanima shika osha holoka oshiwike sha ziko okuza Etitatu sigo Olyomakaya omanga oondjamba ndhika inadhi hingwa po pomahala ngoka kaanambelewa mboka haya ungaunga nuushitwe noshowo niimuna ya gamenwa.

Sha ikololela kuuyelele mboka wagandjwa ku kansela gwoshitopolwa shoka omusimanekwa Junias Amunkete okwa ti kutya omapya ngoka ga hanagulwa po oge li gahetatu na osha ningilwa pomikunda dhi li mbali, Onkushi noshowo Omongothitu.

“Ngame onda talelapo omikunda ndhoka mbali mpoka pu na omagumbo ngoka ga ningilwa omuyonena momapya ashike oondjamba ndhoka odha yona tuu moshili unene ngaa iilyaalyaka noshowo iilya yomahangu oya lika ihe oya fa ashike ya munwa,” osho kansela Amunkete a ti ngaaka.

Okwa hokolola kutya oondjamba odha li odhindji sho dhi iteyele pomikunda ndhoka ihe ota pandula nampongo sho inadhi hinda aantu.
“Kalunga ota pandulwa oshoka nonande ndhika odha yona po iipalutha, inadhi guma aantu na kapu na omuntu a mona oshiponga nonande oya li ya haluka oshoka iimuna mbyoka iitilithi nale pashitwe,” osho kansela a hokolola ngaaka.

Okwa popi wo kutya okwa inekela kutya aakwashigwana mboka ya longelwa omuyonena otaya pewa ombili kepangelo naashoka hashi gandjwa po ngele oshiponga sholudhi ndoka sha holoka.

Ashike onda hala okupandula aanambelewa yuuministeli mboka oshoka oya yamukula mbala nokuya pehala ndyoka opo ya ka hinge po oondjamba ndhoka.

“Nonando oondjamba ndhoka odha li dhi li moshipumbu oshinene mwa kwatelwa uundjambona , mbaka oya pondola okukala ye dhi hinga mo momikunda ndhoka dha longela omuyonena, shika otashi hokitha na onde ya pa omapandulo omanene,” osho kansela a tambula ko iilonga yaanambelewa.

Ashike sho Kundana woo a popi nayamwe yomaakwashigwana mboka ye li popepi nomikunda ndhoka nayo woo oya koleke ndhoka dha popiwa kukansela kutya aanambelewa mbaka oya yamukula mbala naashoka taya ti kutya osha keelela oshipumbu shika shi yonagule unene.
Aanamukunda mbaka ngashingeyi otaya indile uuministeli mboka wu kale ngaa ngeno wa sa oshisho iimuna mbyoka yi kale inayi panuka ko sigo mbaka taya mana okuteya iilikolomwa yawo yomomapya.

Sho Kundana a ningi onkambadhala opo a popye nomunambelewa ngoka a uthwa okupopila ko uuministeli mboka, Romeo Muyunda, ongodhi ye kaya li mo mombepo ye ina yamukula okatumwalaka okafupi hoka ka tumwa kongodhi ye yomekwamo.

LEAVE A REPLY

Please enter your comment!
Please enter your name here