Ovana vamee Shau aveshe vane otava lemana

0
35

Tuulikki Abraham

AUS-Omunamido di li 49 Veronica Shau, e li momukunda oAus moshitopolwa sha//Kharas ota indile evatelo moshiwana, shi mu yambidide nande onomayele kutya na ninge ngahelipi ile na yuke peni opo a dule okumonena oludalo laye evatelo.
Shau ota hokolola e na ovana ve li vane, ovamati vavali noukadona vavali, oshiveli shokaadona oshi na eedula 24, nonghelo okaadona ke na omido di li 14.

Ota hokolola kutya ounona vaye aveshe vane, nonande ovali va dalwa vehe na nande oulema washa, aveshe paife ova hovela tava kwatwa kounghundi womesho nomaulu taa kanifa eenghono.

“Kaadona wange ou woshiveli oku na eedula di li 24 paife, ounghundi owe mu hovela omanga el i poprimafikola okudja modula 2005 tau ende ngaa tau kulu, eshi a kaya mondodo 10, ounghudi owa enda tau humu komesho, fiyo a mana ondodo yaye 12. Paife oku li ashike meumbo, omesho ke wete ko nawa, ota minikile ashike, momaulu kee na eenghono nota ende ta yambididwa. Onghelo yange nayo okaadona keedula 14 paife.Onghelo yange nayo oi li meumbo paife, eshi ounghundi womesho nomaulu ehe na eenghono tau ende tau humu komesho, ofikola okwa xulila ashike mondodo 6 odula ya dja ko mu Juli. Paife oku li meumbo, nokulya oha pewa, olutu kali na ashike nande eenghono, yee ke wete ko vali nandenande, ota yambididwa mukeshe shimwe.

Eendokotola oda lombwela nge kutya kadi wete kutya oupyakadi owa etwa koshike, nghene twa dja hatu kondjo noshipangelo moLüderitz hatu tuminwa koKeetmanshoop ndele fiyo okOvenduka, paife ndokotola okwa ka lombwela ngaa nee oukadona vange ovo ndi li navo meumbo kutya ova kwatwa koulema nokwe va nyolela ombapila opo ve ke li nyolife, va kale hava mono omayambido oo haa pewa ovanhu ve na oulema,” Meme Shau ta popi nomutima wa ponga

Okwa tumbula kutya, okwa yile keembelewa a ka nyolife ounona vaye ovo ve li vavali voukadona, ashike ine shi pondola fiyo opapa, omolwondjila yokuya keembelewa koKeetmashoop opo pe na oshinhano sheekilometa da koya po200.

Ota hokolola kutya, ovamati vaye vavali ovo ve li natango mofikola navo kave li naana nawa. Ota ti omumati weedula 23 ou a shikula oshiveli oku li te lihongo koUnivesiti yaNamibia, e li modula yaye yaxuuninwa te lihongele oundokotola woinamwenyo ashike naye okwa kwatwa kounghundi womesho, nomaulu ota ti otaa kanifa eenghono. Ota ti ounghudi waye owa hovela modula 2013, eshi a ya koUniversiti.
Omumati oo a shikulwa konghelo e na eedula 18 paife oku li mondodo 11 koRosh Pinah, ashike naye okwa kwatwa kounghudi womesho nomaulu taa kanifa eenghono.

Mee Shau ota tumbula kutya, okwa ninga eenghedabala opo a ye komunambelewa melelo lomukunda oAus Elizabeth Koopman, e mu nyolele ombapila oyo tai dulu oku mu pefa omavatelo. Shau ota ti pavatelo lombapila oyo oha dulu ngoo okumona mo sha, nande itashi henene eemhumbwe, shaashi kape na ou ha longo, omushamane okuli mopeendjela, yee Shau ke na oilonga ya sha.

LEAVE A REPLY

Please enter your comment!
Please enter your name here