Uudhano woFIFA TV games wa totwa mOngwediva

0
30

Shipi Elago

ONGWEDIVA-Ongeshefa yoNENO Electronics System ndjoka hayi landitha iikwamawudhano yopawutekinika Olyomakaya ga za ko oya li ya unganeke uudhano woFIFA TV Games mboka wa li wa nana konyala oohiinina ye vule po 20.
Oohiinina ye li pokati komimvo 12 sigo 20 oya li tayi inika komakombo muudhano mboka konyala wa li wa kutha oowili heyali opo wu mono omusindani.

FIFA TV Games uudhano wokatanga kokoompadhi mboka hawu dhanwa kantu yaali moka kehe gwumwe ta hogolola osipana ye na ohaya dhana na oyo nee haya wilike aadhani okupitila muushina mboka wu na uumbande hawu inyengitha aadhani na ngele ito inyengitha aadhani yoye nuupenda nena oto pewa yimwe nomiiyagaya.

“Uudhano mbuka owu holike kuunona unene nohawu kwathele oku pendula po omadhilaadhilo gokanona shoka hashi kwathele mekoko lyomadhilaadhilo,”Natalia Shalauda gumwe gomaawunganeki ta ti.

Okwa ti oya li ya unganeke uudhano mbuka konima sho ya li ya pewa eziminino kolutu halu lele uudhano wokomalungula Namibia Electronic Sport Association.(NESA) “Ongongahangano yoNESA oya li ye tu uvanekele kutya ngele otwa unganeka uudhano wu li pamuthika nena otaya ka eta oshitayi shuudhano mbuka konooli opo iitopolwa yilwe moshilongo yi kale wo hayi ya yi dhanene koshitopolwa shokonooli yoshilongo,”Natalia ta ti.

Okwa ti uudhano mbuka owu li hawu dhana onkandangala miitopolwa yokuushimba onkene otashi kala etumba ngele uunona wokonooli nawo otawu ka kutha ombinga muudhano mbuka pomuthika gwopashigwana.

Uunona mboka hawu kutha ombinga muudhano mbuka ohau futu ashike kohulo yoonyala okashona komayishangitho koN$ 20 hoka haka kwathele oku landa oondjambi dhaasindani.

Okwa ti elalakano okukaleka uunona wi ipyakidhila no ku wu kaleka kokule nomapandaanda ngoka ge li eshongo enene kuunona woshilongo shetu oshoka ohaya ilongo mo iinima mbyoka tayi vulu okuteyagula onakuyiwa yawo.

Hilarion Niipare oye a yangata po ekopi lyuudhano mbuka ndyoka lya li lya tentekwa ombandi yoshingoli nokapandi koodola 120, omanga Kondja Uushona a li e ya pehala etiyali nokukutha po ombandi yoshisiliveli noodola 50 ye Virimuje Mariine teya pehala etitatu oku kuutumba kombandi yoshikushu noodola 30.

Uudhano mbuka ota wu kala ha wu kala ko kehe omweedhi omanga ya tegelela eziminino lyaNESA ngele otayi eta uudhano mbuka konooli.

LEAVE A REPLY

Please enter your comment!
Please enter your name here