Ekopi lyuuyuni olyi na ko ashike omasiku 21

0
14

Shipi Elago

Ongwediva – Omasiku hamale sho iilongo 32 yomuuyuni tayi ka ninga shishaki shandjila okuya koRussia opo yi ka tale ngoka ta ka sindana po ekopi lyuuyuni ndyoka hali holoka aluhe konima yomimvo ne.
Sho omasiku taga nduungile guuka komukunda lili kundana ota kala noku ku etela oongundu dhiilongo mbyoka tayi ka kalela po omanenevi gawo koRussia.

Oshiwike shika otatu ku etele iilongo yongongahangano yiilongo yaSouth America ndjoka hayi ithanwa CONMEBOL.
South America ota ka tuma iilongo yi li itano kekopi lyuuyuni ngaashi tayi landula mpa; Argentina, Brazil, Uruguay, Colombia naPeru.
Argentina: Oshitunda Argentina oshi li shi na ondjokonona ngele otashi ya pokatanga kokoompadhi noshi li sha mona ompito okudhana mekopi lyuuyuni omimvo 16 moka ye li ya pondola oku ninga enyakwa lyuuyuni iikando yi li iyal,i lwotango mo 1978 nolutiyali mo 1986.
Argentina okwa li gumwe gwomiilongo yotango ya li ya dhana ekopi ndika lwotango mo 1930, noku li a thikama pehala etitano momusholondondo gwa-FIFA.

Omudheuli ngoka ta ka kwatela komeho Argentina oye Jorge Sampaoli ngoka e li omvalele yaArgentina.
Lionel Messi oye natango ta ka kala onani yopekoka mosipana yaArgentina sho ta ka dhana mekopi ndika oshikando oshitihamano noyendji oye wete kutya osho tashi kala oshikando shahugunina shaMessi okudhana mekopi lyuuyuni oshoka oomvula nadho otadhi ende tadhi mu nyenyetele.

Messi oku li omudhani gwosipana yaSpain, Barcelona, noku li a sindana epapa lyomudhani dhingi lya-FIFA iikando itano.
Argentina okwa li I ihula kekopi lyuuyuni mo 2014.

Brazil : Brazil oku li a thikama pehala etiyali momusholondondo gwaFIFA noyendji mboka haya popilile oye wete kutya oku li gumwe gwomiilongo mbyoka tayi ka gandja uupyu nuumvo.
Ekopi lyuuyuni Brazili okwe li dhana iikando 20, noku li a sindana iikando itano, mo 1958, 1962, 1970, 1994 nokwa li i ishula okusindana mo 2002.

Okwa li gumwe gwomongundu yiilongo mbyoka ya li ya toto po ekopi lyuuyuni mo 1930 noku li gumwe a dhana mekopi ndika iikando oyindji e vule iilongo iikwawo.
Omudheuli ngoka ta ka kwatela Brazil komeho oye Adenor Leonardo omunamimvo 57 ngoka a tseyika nawa noshilukadhina Tite noku li omvalele yaBrazil.

Neymar oye ta ka kwatela komeho ongundu yaadhani yaBrazil opo ya ka tale ngele genongo ota ga fe tuu gongombe hwiyaka koRussia.
Shika otashi ka kala oshikando oshitiyali Neymar ta dhana mekopi lyuuyuni noyendji oya tegelela opo a ka dhane a tula ko emanya ye e etele oshilongo she esindano.

Colombia : Oshilongo Colombia oshi li pehala eti-16 momusholondondo gwa-FIFA noku li a dhana mekopi ndika iikando itano nota ka kwatelwa komeho komudheuli Jose Pekerman ngoka e li omvalele yaArgentina.
James Rodriguez ngoka e li oye omudhani gwoAdidas gwokomumvo omutulimo gwookoola oye ta ka humbata onyeka yuupendafule yaColombia nota ka longitha ontseyo ye yokutula mo ookoola opo a kwathele oshilongo she.
Colombia okwa li a dhana mekopi lyuuyuni lwotangotango mo 1962 nokwa li iihulu okudhana mo 2014.

Peru: Oshilongo shaPeru oshi li sha thikama pehala eti-11 melandulathano lyiilongo yomuuyuni lya-FIFA noku li a dhana iikando yi li ine mondjokonona ye.
Peru oku li ta galukile mekopi lyuuyuni konima yomimvo 36 konima sho a li i ihulu okudhana mekopi lyuuyuni mo 1982.
Ricardo Gareca oye ta ka komanda omatanga gaPeru konima sho a li a ningi ondjokonona okufala Peru kekopi lyuuyuni konima yomimvo odhindjidhindji.

Jefferson Farfan oye a talika ta ka gandja omulilo nando oku na omimvo 33, naandika otali kala ekopi lye lyuuyuni lyotango.
Uruguay: Ekopi lyuuyuni Uruguay okwa li e li wayimina mo 1930 sho ekopi ndika lya li lya dhanwa lotango nolya li lya dhanenwa moshilongo she moka oye wo a li a ningi oshilongo shotango okusindana ekopi ndika nokwa li e li ifola oshikando oshityali mo 1950.
Omudheuli Oscar Washington ngoka e li omudheuli a dheula ethimbo nuule konima sho a li a fala osipana ndjika kekopi lyuuyuni koItaly mo 1990, te yi fala koSouth Africa mo 2010 , koBrazili 2014 nota ka ya koRussia nuumvo.
Uruguay ota ka kala a tala maadhani ye yaali Luis Suarez naEdison Cavani mboka ye li ya nika oshiponga na kapu na okadhila kaake ya shi.

LEAVE A REPLY

Please enter your comment!
Please enter your name here