Endiki lyuundjolowele lyomashenge lya patuluka mOkuryangava

0
72

Victoria Kaapanda

WINDHOEK – Namibia okwa patulula endiki lyokuandjaganeka onkalo yuundjolowele womashenge, osho wo aantu yalwe yuukwatya ngamboka, taya ithanwa (LGBTI) moWindhoek oshiwike sha za ko.

Esiku kwa li taku tyapulwa oshituthidhimbulutho shesiku lyi li ompinge naamboka ye na uumbanda nuutile kombinga yuushenge, olyo wo esiku endiki ndika lya tsuwa oshipatululo mokupatulukila omashenge. Esiku ndika ohali dhimbulukiwa muuyuni opo li ete koontundulu oontondolo dhokutonda nomahepeko taga ningilwa omashenge. Ohali dhimbulukiwa nduno momasiku 17 Mai omumvo kehe.
Iigwanahangana oya li ya tula po esiku ndika onomenawina mo 2004 nelalakano lyokuhila aatulipo yomilandu, aaleli yomithika nuukwatya wa yooloka, omahangano taga gamene uuthemba womuntu, osho wo aakwashigwana ayehe ya kale ye li uupathi nomathindilokongudhi taga ningilwa omashenge.

Esiku ndika otali dhimbulukiwa omolwa oolopota odhindji dhomiyonena nomahepeko taga ningilwa omashenge ge li omukalondjigilile miitopolwa ayihe muuyuni, mwa kwatelwa Namibia.

Iigwanahangana tayi popi kutya olundji omashenge oga taalela oontondo dhokutondolwa ngele tashi ya keliko, pankalathano nomithigululwakalo. Opo ku kwashilipalekwe kutya kape na ngoka a patelwa pondje, oonkatu odhi na okutaagulukwa opo ku teyagulwe po omainda ngoka ga tulilwa po aantu yuukwatya mbuka wa zi nokutumbulwa pombanda.
Nonando ongawo, osha li sha simana opo aantu ya mange uukuni kumwe ya koleke onkalo yuundjolowele nenge omayakulo guundjolowele womashenge.

“Ongomuwiliki omukuluntu nongeshenge katokote lyotango moNamibia, osha li euvaneko nondjodhi yandje kaakwashigwana yandje okunawapeka onkalo yetu, onda li nokuli nda kutile ehangano tali ithanwa Right for All Movement (RAM) moNamibia muMaalitsa 2011, ndyoka tali popile uushenge nuuthemba waantu mboka ye na uukwatya ngawandje, osho wo ku dhimbululwe uuthemba nuukwatya wetu paveta, osho wo ku humithwe komeho onkalo yuundjolowele momandiki goshigwana naangoka gopaumwene. Oshinima shika osha nyanyudha ndje noonkondo. Okupitila mokumanga uukumwe pamwe nehangano lyoNamibia Planned Parenthood Association (NAPPA), Life Line Childline nomahangano galwe ngoka haga gandja omayakulo gomahungomwenyo, shoka sha simana kaantu yetu, otatu vulu okulwitha oontondo ndhika dhokutondola, ngele tashi ya kuundjolowele womuuluyi osho wo onkalonawa yomashenge.” Wendelinus Amutenya osho a li a lombwele Kundana ngaaka nenyanyu enene.

Ta ti aniwa omandiki ogendji guuhaku inaga tala ko oompumbwe dhomashenge onga dhi na oshilonga nenge ongaantu uuna taya kongo omakwatho, nolundji oha ye ya loko noohapu tadhi ya sheke.

“Onkene ongoshilyo sho-DAN nongomukuluntuwiliki gwo-RAM otu uvite uuntsa sho ehangano lyetu ndika enene OutRight Namibia lya patulula endiki ndika tali gwanitha po oompumbwe dhaantu yetu.” Ta kuthile ko Kundana ngaaka.

LEAVE A REPLY

Please enter your comment!
Please enter your name here