Esiku lyokoopaleka lya puma ko… yamwe oya tameka nale

0
37

Maria Namupala

ONAYENA – Omolwetseyitho lyomutse gwoshilongo Omundohotola Hage Geingob, ngoka a totha mo esiku lyo25 Mai li kale lyowina lyokoopaleka oshilongo ashihe, aakwashigwana koombinga noombinga oyi imanga kumwe noya taalela epala lyondjamba okukaleka omidhingoloko dhawo dha yela nodhi na uuyogoki.

Oshiwike sha zi ko aakalimo yomomudhingoloko gOnayena oya li ya tokola opo ya opaleke omudhingoloko gwaywo, noya tameke niikonga yawo yokwoopaleka oshiwike sha zi ko. Gumwe gomaaopaleki Mateus Kagola okwa yelitha aakalimo yomOnayena nkene ya li ya longekidha esiku lyowina mono ya li ya tokola ya opaleke Onayena oshowo pomudhingoloko aguhe.

Oya li ya tameke okwoopaleka momukunkulo aguhe gongeleka moka tamu monika mu na oomwiidhi oshowo iiyagaya oyindji.
“Otwa li twa tula uukuni kumwe onga aakalimo yomoshikandjohogololo opo tu opaleke ehala tse tu tale mpoka tatu thiki, Otwa li twa mono kutya ehala olya kaka noonkondo noombaapila odha halakana owala nehala alihe, notwa li tu wete kutya ngele itatu opaleke kapu na ngoka te ya e tu opalekele omahala getu, nongele itatu tula iinima ayihe pomahala nena otatu endekele owala,” Kagola ta ti ngaaka.

Ta ti oya uvu elombwelo lyomupelesidente noya tokola opo ye shi ninge manga esiku ndyoka inaali thika yo taya kala taya opaleke esiku kehe, nokukaleka omidhingoloko dhawo dha yela nodhi na uuyogoki mboka wa pumbiwa pomahala agehe.

“Inatu kaleni owala twa tega epangelo li tu longele uuwanawa tse itaatu wu longo tse yene, onkee natu longeni ngaashi tatu vulu tse tu gandje iiholelwa iiwanawa kaanona mboka taya putuka, tse inatu kala owala twa tegelela epangelo li tu lombwele twoopaleke natu kuthii ko oongaku tse tu kale tatu opaleke ethimbo kehe omidhingoloko dhomalukalwa getu,” ta tsikile ko ngaaka.

Kansela goshikandjohogololo Onayena Iyambo Indongo okwa thamuna kutya yo otaya lalakanene uuyogoki momidhingoloko dhawo adhihe , noya hala aatalelipo ayehe taya ende momidhingoloko dhawo ya kale yu uvite etumba noya nyanyukwa sho ya tala omahala gawo ga yela. Ta gwedha po kutya oku uvite etumba omolwa eitulemo lyaakwashigwana miikonga ayihe nkene ya li ya tokola ya tameke niikonga mbika. Ta ti otaya kala taya unganeke iikonga yokwoopaleka , yo ya kwashilipaleke kutya omahala gawo oga yela, ta gwedha po kutya inaya hala owala ya kale taya opaleke kondje, nomagumbo gawo naga kale ga yela noge na uuyogoki ethimbo kehe.

Kansela okwa holola kutya ndino etameko owala ashike oya thaaneka opo ya kale taya longekidha iikonga yokwoopaleka moka taya kala woo taya kwatele mo oosikola dhomomudhingoloko, okwa pula aakwashigwana ye ya wayimine ongula moshikonga shokwoopaleka tashi kala ko oshilongo ashihe.

LEAVE A REPLY

Please enter your comment!
Please enter your name here