Etumbalo neshunduko lyOmukwaniilwa Kandjimi Hawanga gwaaKwangali

0
17

KuShampapi Shiremo naBartholomeus Mpasi

Molwomapulaapulo omape ishewe taga holoka kombinga yeso lyOmukwaniilwa Kandjimi Hawanga gwuUkwangali ngaashi ga li ga yumudhwa komulongelwe Ndumbah Kamwanyah moshinyolwa she shoka sha li sha shangwa moshifo shoThe Namibian, 11 Mai 2018, osho wo molweitulemo lyaakwashigwana moshinima shika, otwa pulwa oshinyolwa shetu shoka sha li tango sha nyanyangidhwa koshifo shoNew Era shomasiku 26 November 2010 opo shi nyanyangidhululwe.

Omukwaniilwa Kandjimi Hawanga oye gumwe gomaantu mboka inaaya tseyika nawa ongomuleli gopamuthigululwakalo ngoka a li a ndjika oonyala mevi okukondjitha omapangelo guukoloni gaNamibia naAngola. Omishangwa nomahokololo gopakana, otadhi ulike omalugodhi nomaipumomumwe ngoka a li a taalele pamwe naantu ye, sho ya li taya ikanyuna uukoloni wAaputu, Aandowishi, osho wo wEpangelo lyaSouth Africa.

Omukwaniilwa Kandjimi okwa li a valwa komuwagona gomuKwangali Siremo nomusamane gOmukwanyama gwedhina Shikongo. Sho omuwagona Himarwa a li i ithanwa ko kUukwambi pehulilo lyoomvula dho1880 opo a ka kuthe po oshipundi kumumwayinakadhona ngoka a li e na uukolele tau nyangwaanyangwa, Omukwaniilwa Mpande yaHaimbili yaHaufiku, Kandjimi Hawanga, pamwe namumwayina gomukuluntu Sirongo nomumwayinakadhona Muharwa nayo oya li ya thigi po Oukwanyama opo ya ka ze nahekulu Rurova, popepi naampoka tapu ithanwa ngashingeyi Fort Cuangar.

Omundohotola Romanus Kampungu okwa shanga kutya moomvula dho1890, ekondjelo okuya okukutha po ehala lyahe Himarwa olya li lya tata lya indula: Mbaka oya li Kandjimi, Sirongo naSiteketa.

Sho a sindi aakondjithi ye, Kandjimi okwa ningi omuleli gwuUkwangali pohulo yomimvo dho1890. Okuza esiku ndyoka, Kandjimi Hawanga okwa kala a simana noku na ongushu miinima yAakwangali sigo eso lye moGrootfontein momasiku 19 Maalitsa 1923.
Shi ikoleela kondjokonona ndjoka yi li moongulu dhomangulilo giinyolwa naandjoka yopakana, oshinyolwa shika otashi lalakanene oku ulika iiningwanima moka Omukwaniilwa Kandjimi a li a wilike iita yi li ompinge nuukoloni, unene tuu wAaputu. Oku ulika omaiuvo gaakolonyeki osho wo nkene aantu ye taye mu dhimbulukwa.

Oshinyolwa otashi tala wo muule koshiningwanima sheso lye lyiipundjamenyemoGrootfontein onkene pamukalo nguka otashi hiyi woo aapekaapeki yalwe ya kwathele mokupukulula nokukandula po oshinima shika tashi limbilike.

Oonzo dha simana ngaashi aakuluntu yAakwangali, ngaashi Omukwaniilwa Daniel Sitentu Mpasi (1999) naAlex Muranda Hamunyela (2003) oya kala noku endulula ehokololo lyonkalamwenyo yaKandjimi Hawanga. Ehokololo lyaKandjimi Hawanga olyo ndyoka lyomulumentu a thikama nokundjika oonyala mevi e li ompinge nuukoloni wAaputu, Aandowishi osho wo epangelo lyaSouth Africa.

Sigo oompaka, kape na nando omunandjokonona a pyokoka nawa a konaakone omapopyo ngaka neitulomo okukwashilipaleka nomishangwa dhaakolonyeki. Monkalamwenyo ye, Omukwaniilwa Kandjimi Hawanga okwa longa pamwe nohamba Mandume yaNdemufayo (yOukwanyama) naSheetekela (gwAambadja) mboka wo nayo ya li yi ipupu mumwe nomapangelo guukoloni gAputu naSouth Africa.

Onkene, oluhepo lomapekaapeko gaalongwantu miilonga yomukondjelimanguluko nguka olwa pumbwa okutalululwa.
Oshiholelwa, omupopyo gumwe ogo nguka kutya Hompa Kandjimi okwa kala nokwiidhenga mumwe naaputu moFort Cuangar mboka ya li taya monitha aantu iihuna okupitila mokuthiminikila aantu iilonga inaaye yi hala. Shimwe shomwaambika ooshi ya li haya humbatithwa aanambelewa yAaputu kuumbete wokumvululukwa uule wiinano iile. Mokugamena aantu ye, Omukwaniilwa Kandjimi Hawanga okwa li a nukile pomutenya noku takela omunwe aanambelewa yAaputu poFort Cuangar molwa oshinima shika.

Omukwaniilwa Sitentu (pethimbo lyomapuaapulo mo1999) okwa hokolola kutya molwonkalo ye yokwaatsa kumwe nayo Aaputu oya shoneke ekwatopo lyomukwaniilwa Kandjimi Hawanga. Oya li ye mu hiya a ye nayo koLubango moka ya ti otaye ke mu pa iinima oyindji yoshiEuropa, omanga etompelo lyoshili lya li lyoku mu dhipaga manga e li mela lyondjila okuthika hoka. Otaku popiwa kutya manga a li mondjila okuya koLubango, Omukwaniilwa Kandjimi ngoka a li a yi netemba lye noonani okwa li a yakelwa ko kombinga yompangela yAaputu yoku mu dhipaga.

Onkene okwa li e ya yepe okupitila mOukwanyama moka a kala okathimbo manga inaa shuna kUkwangali. Oshinima shika osha li sha eta opo a kanithe esimaneko lye neinekelo lye mAaputu, shoka a galuka okwa tameke okugandja omalombwelo kAakwangali mboka ya li ye li handiya ka lyomulonga gwaKavango, ano kombinga hoka kwa li taku lelwa kAaputu, ya taaguluke omulonga ye ye kombinga yAandowishi momumvo 1910. Uutondwe mbuka owe ya puuyelele sho a kala nokuningilwa oonkambadhala dhomadhipago odhindji.

Tashi tsikile mOshiwike tashi landula

LEAVE A REPLY

Please enter your comment!
Please enter your name here