Ongundu Iita yaKadha ya pumbwa eyambidhidho

0
25

Shipi Elago

Oshakati – Ongundu ndjoka ya tseyika nawa Iita yaKadha oyi li ya pumbwa eyambidhidho lya kwata miiti opo yi humithe komeho iiyimbo yawo noku yi pungula nawa muukola womawi yo yi adhike nokoohiinina.

Ndhika odha li dha hololwa komukuluntuwiliki gwondu ndjika tatekulu Paulus Amutenya gwaMalakia.
“Ongundu yetu otayi pula nawa komeho, kakele komukundu gwoshimaliwa ngoka tagu tu imbi opo tu kwatithe iiyimbo yetu tse tu yi tule muukola mboka hau siikilile omawi onkene pethimbo lyongashiingeyi iiyimbo yetu oyi li ashike momitse dhetu nakayi na we mpo ya pungulwa naampoka omuntu gulwe ta vulu oku yi pulakena uuna ya hala okuuva iiyimbo yetu,” tatekulu Amutenya gwaMalakia ta ti.
Onkene ota indile aanangeshefa koombinga ne dhoshitunda Namibia opo ye ya pe eyambidhidho naashoka ye na dho oontanto dhomuthigululwakalo dhi vule oku huma komeho opo nomapipi tage ya ga adhe po sha.

“Ongundu ndjika oya totwa po kunakusa tatekulu Iita yaKadha nooyakwawo pethimbo lyonale ye yi totela komina yokawe, ano ko-CMD niiyimbo oyindji oya totelwa pombala, oontanto dhongundu ndjika odhi na omatumwalaka ga yooloka, yimwe otayi popi ethimbo lyuukoloni, omanga yimwe otayi popi iituthi yomanyanyu ashike ohatu yi imbi twa ndjanga oshoka otwa thigilwa uupenda kutatekulu Iita nooyakwawo mboka wo kaye li momwenyo nenge ye li momwenyo ndele itaya vulu we molwuukulupe,” Amutenya gwaMalakia ta ti.

“Iiyimbo ongaashi ‘Tshongola nge omwe mu mona mu mangeni’ otayi holola onkalo yuupika nkene aantu yevi ndika ya li ya kenyanana onkalo yuukoloni yomutondi mbulu ngoka a li kee na nando ohenda nolukeno lwoshigwana shika,” Amutenya ta tsikile.

“Tatekulu Iita yaKadha okwa li a thigile ndje ongundu ndjika nonda li nda taamba ko oshinakugwanithwa opo ndi yi humithe komeho naana ngaashi ya kala mewiliko lyatatekulu Iita yaKadha, nolundji ohandi si oshimpwiyu opo kehe mpo ongundu ndjika tayi yi ndi kale nangame wo opo ndi li opo lela iinima yi ende nawa , ngaashi ngaa Iita kwa li ha ningi, oshoka monale ngele Iita kepo siku ndyoka iinima kaya li naana hayi ende nawa,” Amutenya ta tsikile ko ye ti ikolomona nokuli.

Otu na iilyo ya konda po 30 moka tu na mo wo okamwaalu koomeme mboka twe ya tula mo opo ya mwenyeke oontanto noondigolo osho wo okutangumuna, yamwe noondambo omo haya yi. Ota indile mboka ye na ehalo opo ye ya wayimine, aanona naakuluntu ayehe otaya taambwa ko opo oontanto dhi humithwe komeho dho kaadhi sindike koongalo dhiilumbu ndhoka odho dha lambwa kaanona yoshilongo shika.

Tatekulu Amutenya ota holola kutya okwa wayimina ongundu ndjika lwopomimvo dhomilongo heyali ndele sigo oompaka iiyimbo yawo oye yi ungula owala momitse kapu na nando shoka ya tula muukola womawi, onkene ta ti oya hala ngaa ngoka te ya tulile ko uukaya kombiga yo ya wape okupititha nando ongundu yiihikomwa yawo yi li muukola wopashinanena mboka naantu koohandimwe taya vulu okwiilandela opo ya kale taya inyanyudha niiyimbo mbika gwo omuthigululwakalo tagu yambuka po.

“Ashike nando ongawo ongundu yetu otayi pula komeho notandi indile wo oonkulungu koombinga ne dhoshilongo opo dhi tote po oongundu dhoontanto opo ya kale ye na sho haya ningi unene tuu mboka ya longa oshoka iinima ngambika otayi kelele wo elongitho nayi lyiikolitha oshoka ethimbo olindji omuntu oto kala wi ipyakidhila niinima yi na oshilonga noto kala owala wu na okathimbo okashona okukala poondingosho,” Amutenya ta ti.

Ongundu ndjika olundji iiyimbo yawo ohayi holoka komapandja gwoSocial Networt hoka hayi tulwa ko owala kaantu oohandimwe mboka haye ya kwatitha noofunguna uuna taya dhana oontanto ngele opoohango nenge opiituthi yilwe ngaashi ya li taya mwenyeke oshituthivalo shomukokolipresitende Sam Shafiishuna Nujoma.

LEAVE A REPLY

Please enter your comment!
Please enter your name here