Oosikola mbali mOhangwena tadhi ka pewa olusheno loonte dhoketango

0
44

Maria Namupala

EENHANA- Opoloyeka yoPromotion of Renewable Energy moNamibia (PREN), oya totha mo oosikola mbali moshitopolwa shaHangwena, tadhi kala dha pewa olusheno lwoketango mbala. Shoka osha thamunwa Omaandaha kEenhana komukwatakanithi gopoloyeka ndjoka Rodney Seibeb.
Seibeb okwa thamuna kutya oosikola ndhoka tadhi mono uuwanawa mboka wolusheno lwoketango odho Omauni Combined oshowo Ondjambayonghalu, adhihe tadhi adhika moshitopolwa shaHangwena.

Pethimbo a li ta gandja olweendo lwopoloyeka naashoka ya thaneka koshikondo shelongo moshitopolwa shoka, okwa ti okwa konekwa oosikola odhindji moshitopolwa kaadhi na olusheno, noya totha mo manga ndhoka, opo aalongwa yeendele pamwe nethimbo.
Omukwatakanithi ta ti oosikola otadhi ka mona uuyelele wolusheno lwetango, opo ya vule ya kale taya longitha ookompiuta, nokunyanyangidha iipumbiwa yosikola molwaashoka ngaashingeyi ohaya longo nuudhigu omolwa okwaahe na omalusheno moosikola dhawo.
Okwa gwedha po kutya iikwa niipangitho yolusheno nduka otayi kotha oshimaliwa shooN$ 170 000 kehe notadhi longwa kehangano lyoCentral Technical Supplies koshimaliwa shooN$80 000, ta ti adhihe otadhi kala dha pwa okulongwa muule womwedhi nguka, dho dhi vule okulongithwa.

Seibeb ta ti oli na uulethimbo woomvula 10-25 lwaampoka, ta ti opoloyeka yoPREN oye ya puuyelele omumvo gwa zi ko nokwa tegelelwa yi ye pehulilo omimvo tagu ya, ta gwedha po kutya shika oshe ya konima sho omapekaapeko ge eta puuyelele kutya oosikola odhindji ndhoka kaadhi na olusheno otadhi adhika monooli yoshilongo.

“Onda hala oku shi yelitha mpaka kutya oosikola hamano (6) otadhi ka tothwa mo moshilongo adhihe, opo dhi pewe olusheno lwoketango, tashi ningwa woo mekwatelokomeho lyiikondo ya yooloka, konima yaandhoka dhomOhangwena, otatu ka hogolola mbali koshitopolwa shaMusati noKunene, nambali otadhi ka ulikwa koshitopolwa sha Zambezi,” Seibeb ta popi ngaaka.

Ta tsikile ko kutya PREN ota lalakanene okutsakaneka epangelo ondjilakati, nokugandja omayakulo ngoka taya vulu okugandja moshigwana ya tala konkalo yeliko lyoshilongo ndjoka tayi nyengathana pethimbo ndika.

Okwa ti otaya kambadhala okuyambula po nokunkondopeka elongitho lyoonkondo dhomevi, opoloyeka otayi kwatelwa komeho koHanns Seidel Foundation, ndjoka ya pewa oonkondo kUumisteli Welongo, Uunkulungu Nomithigululwakalo oshowo Uuministeli Woomina Niikwankondo. Okwa uvaneke taya kondjitha okukandula po onkalo yokwaahe na omalusheno moosikola dhomoshilongo, molwaashoka okwa konekwa odhindji dha taalelwa keshongo lyokwaahe na omalusheno notadhi longo nuudhigu omolwa omilema.

LEAVE A REPLY

Please enter your comment!
Please enter your name here