Osekundoskola yaHaimbili Haufiku ya kwathwa koSanlam

0
40

Maria Namupala

EENHANA – Ehangano lyoSanlam Namibia olya gandja shimwe shomiipambuliko yalyo kosekundeskola yaHaimbili Haufiku, ndjoka tayi adhika moshitopolwa shaHangwena, shika osha ningwa okupitila mopolohalama yoSanlam’s Blue Ladder Schools.

Osikola oya pewa oshimaliwa tashi ihilile pomiliona yimwe, opo yi longulule nokwoopaleka omatungo gaali, limwe lyongulumambo, ongluu moka tamu adhika ookompiuta oshowo ongulu moka hamu pungulwa iilongitho yuunongononi nuudhindoli.

Omunambelewa omukuluntu moSanlam Tertius Stears pethimbo ta gandja omagano ngoka oshiwike sha piti, okwa totha mo kutya ehangano olya tokola li gandje oshimaliwa shoka kosikola yi vule okwoopalekulula omatungo, nosha ningwa onga oshitopolwa shetyapulo lyoomvula 100 dhehangano.

Omandiki oga gandjwa momake goshiputudhilo shopaungomba shEenhana, naashika okwa ti osha pitile mopolohalama ya tumbulwa metetekelo ndjoka a ti otayi kala ko oshilongo ashihe uule woomvula ndatu, tayi lalakanene okulongulula omatungo moosikola dha yooloka moshilongo.

Stears ta gwedha po kutya opolohalama otayi lalakanene okunkondopeka omatungo goosikola moshilongo, shoka ta ti otashi ningwa woo nelalakano okuhwepopeka iizemo yaalongwa moosikola dha yooloka, yo taya kala taya kongo omauyelele ga pamba iilongwa yawo uuna taya nyengwa.

“Ehangano olya totha mo osikola ndjika lya tala kiizemo yiilongwa yawo, noya mono kutya oya pumbwa okuyambulwa po molwaashoka ohaya longo nuudhiginini ethimbo kehe, nosikola oya monika kutya oyo kadhenga moshitopolwa shoka nonande tayi nyengwa okwoopalekulula omatungo gawo,” ta popi ngaaka.

Omukuluntu gwelongo moshitopolwa shoka ngoka naye a li pegandjo lyomakwatho ngoka, Isack Hamatwi, okwa holola olupandu lwe, ta ti ehangano olya longa oshindji okukwashilipaleka kutya oondjodhi dhawo odha tsa molwaashoka oyo aaleli yokomongula noya pumbwa okunkondopekwa.

Hamatwi ta kwashilipaleke kutya omatungo ngoka otaga kala ga pwa okoopalekwa nokulongululwa okuya pehulilo lyaJuni nuumvo, go taga vulu okulongithwa kaalongwa ethimbo kehe.

Oosikola odhindji ndhoka dha pumbwa omakwatho moshilongo otadhi ka tothwa mo opo dhi mone nokutyapula uuwanawa okuziilila koBlue Ladder Schools Programme. Aalongi naavali mboka ya li poshiindingili oya holola enyanyu lyawo, noya gandja olupandu lwawo lwa sheywa kehangano ndyoka.

LEAVE A REPLY

Please enter your comment!
Please enter your name here