Shipwata oye ethamba dhingi mOndangwa

0
74

Maria Namupala

ONDANGWA – Nonando hasho oshikando she shotango ta ulikwa ontana dhingi, osha li enyanyu enene kuye sho a pewa ishewe esindano ndika lyomukadhona kaaku na we mOndangwa. Saara Shipwata ngoka e li omulongwa momvula yahugunina ti ilongele uulongi moshiputudhilo shaHifikepunye Pohamba mOngwediva, oku ulikwa oye ontana dhingi mOndangwa omasiku ngaka.

Shipwata omukadhona gwomeho omatokele ga fa oondago, okwa li miikogo sho oye a tothwa mo kutya oye ethamba dhingi mokati kayakwawo methigathano lyontana dhingi mOndangwa, methigathano moka omwa li uunangula 12, mboka wa dhengwa mo kontana ndjoka.
Pethimbo ta zalekwa oshishani shontana dhingi okwa holola enyanyu lye, Shipwata omunamimvo 22 nokwa tseyika koyendji mokukutha ombinga momathigathano guukadhona dhingi moshilongo.Okwa yelitha kutya oku na oondjodhi oonene okuyambula po oshipewa noshitalenti she.

“Ngame mwene ondakala nehalo nohokwe yokukutha ombinga momathigathano ngangoka manga nda li mepipi lyomimvo omishona lela, ondi na omathaneko okukutha ombinga momathigathano pauyuni monakuyiwa, ngame ndi yeluthe epandela lyaNamibia mokati kiigwana yuuyuni”. Shipwata ta tsikile ko.

Ethamba ndika olya yambukile kOlupumbu, nokwa hita oondondo dhopevi moshilandopangelo, okwa mana ondondo onti-12 mosekundeskola yaShakati mo 2014. Okwa sindana iishani nomapapa goludhi nduka poompito odhindji. Okwa li omukadhona dhingi moUNAM Hifikepunye Pohamba mo 2015 no 2016, Miss Helao Nafidi 2016, Miss Northern Campus 2017, ontana dhingi mOshikuku, naandyoka a sindana lyontana dhingi mOndangwa.

Ontana dhingi ndjika oya dhimbulutha ayehe mboka ya kuthile ombinga methigathano ihe inaya sindana ya tseye kutya. “Aluhe ngele omuntu to yi methigathano lyontumba ohapu kala omusindani nomundopi,nonande kapu na ngoka ha kala a hala okuthigwa po,
otandi kumike ayehe yaa kale nuumbanda, ihe ya kale aakuthimbinga momathigathano,” Shipuata ta ti ngaaka.
Okwa ti okukala nomukumo otashi fala oyendji komahala ga yooloka moshilongo, okwa ti aakuluntu ye oye mu tsu aluhe omukumo, netsomukumo lyawo olye mu koleke opo a kale a landula oshipewa she.

Omuunganeki gwethigathano ndika Da Silva Peuyelenga okwa ti ethigathano olyeenda nawa, omwa li muulikwa woo Melanie Mathews oye 1st princess, Taleni Andrex 2nd princess omanga Selma Kalola a ulikwa miis personality na Ivone Tjongarero miss photogenic.
Shipwata okwa pula ayehe ye na ehalo okukutha ombinga ya kale nokuulika iipewa yawo, opo oondjodhi dhawo dhi tse. Ta ti oontana odhindji nadhi kale dhi na eitaalo muyo yene.

LEAVE A REPLY

Please enter your comment!
Please enter your name here