Ta palutha iimuna niikulya ya longwa momapakete

0
26

Victoria Kaapanda

OSHIKUKU – Omulumentu omunyasha Roderick Haraseb okwa toto po opoloyeka tayi ithanwa Oshikuku Animal Feed Research yokupalutha iimuna nomapakete. Opoloyeka ndjoka otayi adhika mOshikuku moshitopolwa shaMusati.

Opoloyeka ndjoka oyiimuna ngaashi oongombe oshowo iikombo, niimuna mbyoka oya lukwa omadhina ngaashi Ndiina, John nosho tuu. Oya topolwa miigunda ya yooloka oshoka ohayi paluthwa sha yooloka nelalakano okundhindhilika nkene iiviha yiinamwenyo mbyoka tayi lunduluka shi ikolela kiipalutha mbyoka tayi paluthwa nayo.

Haraseb ngoka oye a toto po opoloyeka ndjoka yokupalutha iinamwenyo niipakete omvula ndatu dha ka pita nonando omvula ya zi ko opo ya tameke okulonga, okwa lombwele onzonkundaneki ndjika kutya iimuna okwe yi topola miigunda ya yooloka, nelalakano okundhindhilika ngele iipakete otayi palutha ngaa shili nenge otayi shunitha oshiviha pevi.

“Oongombe onde dhi topola miigunda iyali moka dhi li mo mbali kehe moshigunda. Moshigunda shimwe ohandi dhi pele mo ashike iipakete ya nyanyulwa nawa, oshowo oshigunda oshikwawo ohandi dhi pele mo wala omwiidhi golusiana, sho osho ngaa nda topola wo iigunda yiikombo”. Haraseb ta ti.

Ta gwedha po kutya okwa ndhindhilike kutya iimuna yomoshigunda shoka ha palutha niipakete ashike, oyi na iiviha oyindji lela nomalutu giimuna oga paluka lela ge vule iimuna mbyoka hayi li omwiidhi golusiana.

Okwa yelitha nawa kutya elalakano lye okuya po nedhiladhilo lyokutekula iimuna niipakete, okwe ya po nalyo sho a mono kutya iipakete ohayi zi momiti noshowo iimuna ohayi li nayo omafo gomiti. Okwa li a tokola opo a kuthe onkatu opo e shi ningile omalolelo a tale ngele otashi zi, ashike nani okwa mono kutya iipakete oyo tayi liwa kiimuna shi vulithe omwiidhi.

Opoloyeka ndjika oyi li uukumwe nelelo lyondoolopa yaShikuku, noya kwathele opoloyeka ehala mpoka ya ningi oshigunda mOshikuku Extention 4, noku yi kwathela niiyenditho oshowo nomakwatho galwe.

Iikulya mbyoka ya nyanyulwa nawa kokashina, oya li ya topolelwa wo aanafalama yamwepo kopoloyeka ndjika, opo yi mone wo uuyelele wa gwedhwa po ngele iikulya mbyoka otayi palutha tuu shili.

Nongashingeyi opoloyeka oya tegelela omayamukulo okuzilila kaanafalama aashona mboka ya li ya pewa ya ka ninge omalolelo iimuna yawo ngele oya mona ngaa elunduluka lya sha.

Opoloyeka ndjika oya kuta aanilongo ye li yahetatu, noyi li metifa okutunga ofakitoli onene yokunyanyula omapakete, ano iikulya yiimuna oshowo mboka taya vulu okukwathela ofakitoli yi thikamepo. Noya inekela pehulilo lyomvula ya kale ya mana yo ya vule okukuta natango wo aanilonga oyendji.

LEAVE A REPLY

Please enter your comment!
Please enter your name here