VomoAus, Koes naAroab va topolelwa eeshi

0
17

Tuulikki Abraham

Lüderitz – Ovakalimo vomoAus moshikandjohoololwa sha!Nami#nus osho yo vomoKoes nomoAroab moshikandjohoololwa shaKeetmanshoop komikunda ovo ve li momhumbwe yeendja ova topolelwa eeshi kuMayola wodoolopa yaLuderitz Hilaria Mukapuli oshivike sha ya.
Eeshi odo da topolwa oda yandjwa kehangano lopashiwana lokuyula eeshi Seaflower Group. Omunambelewa omukulunhupitifi woSeaflower Group Mike Nghipunya odula yo 2016 okwa yandje eeshi deetona di li 6, dongushu yoN$170 000 okupitila mombelewa yaMayola modoolopa yaLüderitz opo di dule okutopolelwa ovanhu ovo ve li momhumbwe yeendja modoolopa yaye.

Oshivike sha Mayola nosheendo shaye ova pewa oipakete i li 700 yeeshi doludi lobaby hike nofillet nove di topolela ovakalimo vomo Aus, moshikandjohoololwa sha !Nami#nus , osho yoo ovakalimo vomoKoes nomoAroab moshitopolwa shaKeetemanshoop komikunda.

“Eeshi oda pewa ombelewa yange opo nd itopolele ovo ve li momhumbwe yeendja, modoolopa yaLüderitz, ohatu yandje eeshi edi komaumbo ovakulupe opavali oo e li modoolopa yetu, ohatu yandje keefikola nohatu topolele yoo ovanhu ovo va didlikwa ve li momhumbwe yeendja.
Otwa mona yoo kutya osha pumbiwa, tu tale yoo moshitopolwa ashishe sha//Kharas, shoo osho nee u wete twa twaalela yoo ovakalimo vomoAus osho yoo moshikandjohoololwa shaKeetmanshoop Komikunda. Otu na yoo omafaneko tu twaalele ovakalimo vokoKarasburg. Odula 2016 otwa li twa topolela ovakalimo vomo Bethanie noBerseba.” Mukapuli osho a yelifa.

Mukapuli okwa tumbula kutya eeshi edi ohave di pewa alushe konima yeemwedi di li hamano opo va topolele ovo ve li momhumbwe, ashike okwa tumbula kutya ove na omhumbwe yosheendifo okufikifa eeshi kwaavo ve li kokule.

Ota tumbula kutya, ngaashi va dula okufikifa eeshi odo da topolelwa ovakalimo moKeetmanshoop Komikunda, ove shi ninga nosheendifo sha longekidw kuKansela woshikandjohoololwa oko kwa talwa eeshi.

Mukapuli ota indile ovo ve na ovanhu ve na omhumbwe yeendja moshitopolwa sha//Kharas, va kwatafane nombelewa yaye opo va dule okuninga omalongekido, va dule okutwaalelwa eeshi odo hadi yandjwa kombelewa yaMayola konima yeemwedi di li hamano, okudilila kehangano lokuyula eeshi lopashiwana Seaflower Group.

LEAVE A REPLY

Please enter your comment!
Please enter your name here