Aanangeshefa aagundjuka mOshikoto ya pewa omiliona N$1,4 …Omanga oongeshefa oompe dha kuta aantu 73

0
164

■ Desie Heita

WINDHOEK – Aanangeshefa aagundjuka naakwashigwana ya mona iihuna mOshikoto oya li ya pewa oshimaliwa shi vulithe pomiliona N$ 1,4 okuza kOshikoto Regional Council, netompelo lyokunkondopeka oopoloyeka dhaakwashigwana miikandjohogololo yawo. Iimaliwa mbika oya li ya gandjwa pokati kaApilili 2017 naMaalitsa 2018, noya li ya gandjwa moshigwana okuzilila koshiketha shepangelo nokuuministeli wa yooloka, sha li sha ningwa okupitila moombelewa dhelelo lyopashitopolwa.Omayambulepo omape mOmuthiya oga egulula oompito dhiilonga dhaantu 73. Moka aantu ye li 64 ya mono iilonga moChoppies Supermarket, ositola ompe yoLewis oya li ya ya kutu aaniilonga 9.
Ngoloneya Henok Kankoshi osho a li a thamuna pethimbo a li ta gandja oshipopiwa she shokumumvo shopashitopolwa oshiwike shika.

Kankoshi okwa li wo a nyakukwa okulopota kutya ombepo yuunangeshefa mOshikoto oya vuka, moka oongeshefa oompe 130 dhi ishangitha moshitopolwa.

“Ongonkatu yotango yokutseyitha oshikonga shokulanda iilongomwa mbyoka ya longwa moNamibia, Uuministeli wIipindi nomayambulepo yOongeshefa dhopetameko oyi ipyakidhila nokugongela omalolelo giilongomwa mbyoka ya longwa moshilongo yi vule okutulwa mokaatoloko. Oongeshefa dhopetameko odha li dhi ikundiwa nadho, ashike hamano ashike dhomudho dha li dha ningi omaindilo gadho,” Kankoshi ta ti.

Elelelo lyopashitopolwa olya li lya longitha oomiliona N$ 14,2, okupitila melelondoolopa lyaNiipa, okutula mo olusheno mondoolopa osho wo omeya miitopolwa yontumba yondoolopa. Ngashingeyi, Elelondoolopa lyOniipa olyi li metifa okugandja oteendela yoomiliona N$ 13 dhokutunga oombonge oonene dhElelondoolopa. Oteendela ndjika otayi ka eta omwaalu ngoka gwa longithwa moku eta omayakulo mOniipa gu ye poomiliona N$ 27,2.

Omiliona N$ 1,4 oya li ya andjagakanekwa okufuta oopoloyeka oonshona dhoshigwana miikandjohogololo mbika: Nehale lyaMpingana, Omuthiya, Omuntele, Okankolo, Onyaanya, Eengodi, nOnayena. Ngoloneya ta ti.

Oshimaliwa shi thike pooN$634,616 osha li sha yi shu ukilila momikunda moka nedhiladhilo lyokutota po oopoloyeka miitopolwa yomuushayi. Oshimaliwa osha kwathela oopoloyeka ntano ndhoka tadhi ulike tadhi vulu oku eta po oompito dhiilonga ngaashi okoonga iipilangi, okufoloma oondhopi, omakala niikuni, iilongomwa tayi longwa miipa nuunafaalama,” Kankoshi ta ti
Ta ti oopoloyeka odha li dha tothwa mo konima sho kwa ningwa ekwatathano lya kwata miiti naakwashigwana osho wo noombelewa dhopashikandjohogololo.

“Oskema yokupa aantu iilonga kuushayi oya li ya yi ondjila onde okukumika onkalo yuunangeshefa mokati kaakwashigwana yokiitopolwa yokuushayi. Oombapila dhomaindilo odha li dha ningwa okuza kiikandjohogololo ya yoolokathana, shoka shi li endhindiliko lya yela kutya aakwashigwana oyu uvite ko esimano lyokungeshefa nankene taku vulu okukandulwa po oluhepo,” Kankoshi ta ti.

Konyala oshimaliwa shi thike pooN$528,846 osha li sha pewa oopoloyeka hetatu. Oopoloyeka odha li dha tothwa mo nokukwathelwa nelalakano lyoku eta po oompito dhiilonga miitopolwa yokuushayi mo tamu imonenwa iiyemo.

Iimaliwa mbyoka ya za kooministeli oya kwatela mo N$43,000 mbyoka Uuministeli wAagundjuka wa li wa gandja koongeshefa dhi li heyali moshitopolwa. Oshikoto Regional Youth Forum, shoka shi li kohi yoNational Youth Service osha li sha gandja oshimaliwa shika onga omikuli okupitila moCredit for Youth in Business.

Uuministeli wUuthikepamwe nonkalonawa Yuunona owa longitha N$235,704.92 miinyangadhalwa mbyoka tayi eta iiyemo moopoloyeka dhi li 14 miikandjohogololo ayihe. Oyendji mboka ya li ya mono uuwanawa mbuka aakulukadhi, oshoka oya li ya mono oshimaliwa shi thike pooN$176,778.23. Shika osha ningwa oshoka omusindalandu guuministeli mbuka ogwa yela, tagu ti iimaliwa oyindji nayi pewe aakulukadhi.

Aanangeshefa aagundjuka ye li 62, ya za kOnyaanya, Olukonda nOkankolo oya li ya mono ompito yomadheulo ga li ga kwashilipalekwa koRegional Youth Forum. Elalakano lyomadheulo ngaka okunkondopeka aagundjuka mboka ye na nale oongeshefa nenge ya hala oku dhi tameka. Omadheulo ohaga kwashilipaleke kutya aagundjuka oye na uunongo nontseyo.

Ongeshefa yimwe yi li mewiliko lyookomitiye oya li wo ya totwa mOkankolo yi li mekwamo lyoHarambee Prosperity Plan, niilyo yokomitiye otadhi ka pewa omadheulo nokupewa iilongitho. Shika otashi ka kotha N$143 385.98

Aagundjuka ye li yatano oya li ya pewa omadheulo mopolohalama yoLeadership Management ndjoka ya kwashilipalekwa koDundee Precious Metals Tsumeb, tashi kotha ooN$35 385.98

LEAVE A REPLY

Please enter your comment!
Please enter your name here