Eewawa lyAagundjuka yoSwapo lya hala Sahrawi a manguluka

0
29

■ Komutoolinkundana

WINDHOEK – Eewawa lyaagundjuka mongundu tayi pangele, Swapo, olya holola omadhilaadhilo galyo ongula yOmaandaha, kutya oya hala Sahrawi a manguluka oshoka osho ashike oshilongo shaAfrica inashi manguluka natango nonando osha kolonyekwa nale oshita niilongo iikwawo yaAfrika mbyoka ya mona nale omamanguluko.

Eindilohololomadhilaadhilo lyawo olya li lya gandjwa okupitila mUuministeli Womakwatahano gOpaigwana. “Eindilo lyetu otali wilikwa kondjuulukwe yaayehe yuuthemba womuntu,”osho omukanda gwa lesha ngaaka. Oshilyo showewa lyaagundjuka, Meryam Nghidipo okwa lombwele Nampa kutya epataneko lyawo pamukalo gwokuholola omadhiladhilo olya tsakanene netalelopo lyopapangelo lyapresidente gwaSahrawi Arab Democratic Republic moNamibia, Brahim Ghali.

Ghali okwa li a thiki mOsoondaha konima sho a li a hiywa kupresidente Geingob nokwa thigi po Namibia mEtiyali. Omukanda otagu ti Morocco okwa kala nokukaleka omahogololo gomalolelo kombinga yaWestern Sahara okuza mo 1991, nomolwetompelo ndyoka, oya hala okunkondopekulula onkatu yepangelo lyaNamibia. “Otwa hala okunkondopalekulula onkatu yepangelo lyaNamibia mokukwashilipaleka kutya aantu yaWestern Sahara otaya tyapula emanguluko lyawo,” Nghidipo ta ti. Ota pula Iigwanahangana yi tule miilonga omatokolo mbala ngaashi tashi vulika.

Omupresidente gwaSahrawio okwa ti ota kongo eyambidhidho opo ya vule okusindana ya wape oku ipangela yoyene.
Sahrawi oshilongo shi li moWestern Sahara shoka tashi kondololwa koshilongo oshikwawo, ano kuMorocco, nando oshi li sha ithikamena kusho shene.

Ashike omupresidente gwaNamibia Hage Geingob okwa ti Namibia oku li u uvite uunambano sho Ghali a tokola opo a taalele po oshilongo shika.

Geingob okwa ti yo otaya yambidhidha oshilongo shika opo shi vule okwiipangela sho shene ngaashi naanaa ya kala taya yambidhidha iilongo iikwawo mbyoka woo ya kala nokuyambidhidha Namibia opo a kale a mona emanguluko.

“Onkene etalelopo ndika otali nkondopaleke uukuume wetu pokati kiilongo mbika iyali. Sho Namibia a li ta lwile emanguluko ye Western Sahara okwa li ta kondjitha okukala ena mo olunyala mepangelo lwiilongo mbyoka ya hala oku ipangela yo yene,” Geingob ta ti ngaaka.
Omutse gwoshilongo Namibia ogwa hokolola kutya ye okwa hala oshilongo shoka sha mona emanguluko ngaashi naanaa wo Namibia naye woo a li ta yambidhidhwa a mone emanguluko.

LEAVE A REPLY

Please enter your comment!
Please enter your name here