Ino shi kwata, shi lopota

0
57

■ Maria Namupala

EENHANA – Opolisi moshitopolwa shaHangwena otayi kunkilile oshigwana shi iyageke okudhana nokuhedha popepi niinima kaayi shiwike, shika oshe ya konima sho kwa lopotwa okanona kokamati ka hulitha sho ka li taka dhanene oshinima kaake shi shi shoka sha topa moshitopolwa shoka.

Omupopiliko gopolisi moshitopolwa shoka Warrant officer Kaume Iitumba okwa popi ndhoka moonkundathana ndhoka twa ningi naye Etiyali lyoshiwike shika, ta ti otashi etitha ohenda molwa aakwashigwana mboka ihaaya tila okuguma nokudhana niinima kaaye yi shi nando.

Okwa ti okamatyona hoka ka tongololwa kutya oko Petrus Shitani komimvo 11 oka li taka dhana noshinima shoka ki itsu mepya lyawo komukunda Epinga momudhingoloko gwOmundaungilo.

Ta ti oshinima shoka oya kala taye shi dhanene noye shi fala megumbo lyawo, moka ya kala taye hi dhenge sigo sha topa nokweeta oshiponga shoka, nakusa okwa sile pehala lyoshiningwanima, nokwa tononwa okwaako kwe.

Iitumba ta ti uunona utatu owa hupa nowa falwa koshipangelo shEenhana hoka tawu mono epango, ta ti mboka owu li pokati koomvula 5-7, ta yelitha kutya oshinima shoka otashi monika sha fa oshikuti shaSouth Africa, nosha nika oshiponga noonkondo.

Okwa kunkilile aavali ya lombwele aanona momagumbo yi iyageke okudhana nokuguma iinima mbyoka kaaye shi molwaashoka oya nika oshiponga, ta ti natango onkene momidhingoloko tamu monika iitopitha mbyoka ya li tayi longithwa pethimbo lyekondjelomanguluko, ta ti nonande yimwe ya li ya kuthwa mo nokutopithwa onkene mu na yimwe ya hupa po inaayi monika.

Okwa gwedha po kutya uuna ya mona iitopitha niinima kaaye yi shi naya kale ya tseyithila opolisi meendelelo, yo ya tale kutya otaye shi ningi ngiini, dho oomwenyo dhaantu dhi gamenwe, ta ti naya iyuthe kelombwelo kutya ino shi kwata shi lopota.

Iitumba ta tsikileko ta ti moshiningwanima sha yooloka opolisi moshitopolwa shoka oya li ya topitha nokuhanagulapo iitopitha ya adhika komukunda Oshikwiyu Shomaumbo moshikandjohogololo Engela mOsoondaha.

Ta ti mbyoka oya li yi itsuwa kaanona taya takamitha iimuna Olyomakaya noya li ya tseyithile aavali mboka ya notheleko opolisi, okwa ti iinima ngambyoka oya nika oshiponga yo inayi pumbwa okudhanwa nayo.

LEAVE A REPLY

Please enter your comment!
Please enter your name here