NPL ta gwayeke aantu omahoka komilungu “Asino”

0
78

Shipi Elago

OSHAKATI – Olya ninga natango ethimbo lyokomumvo sho mboka ya longa nawa mokatanga kokoompadhi taya ka pewa shoka yi ilongela moshituthi shegandjo lyomapapa ga-NPL ndyoka tali ningwa ongulohi yonena moshilandopangelo.
Ashike aavongokononi yomawudhano oye li ye wete kutya oshituthi shika kasha na omwago nooshindji osha pumbwa okuningwa opo mu gwedhwe omapapa ogendji.

Hafeni Asino ngoka e li omutoloki gwomawudhano okwa li a holola kutya oshituthi sha-NPL oshi li sha kanitha ongushu na inashi wapa we oku ithanwa oshituthi ashike nashi pewe edhina limwe.

“Onduuvite kutya ewiliko lyo-NPLolya pumbwa oku gwedhela omwaalu gomapapa okuyelekanitha nomwaalu guupapa uushona mboka taya gandja anuwa otaya pandula aadhani mboka ya longa nawa, ashike moshili shoshene otaya gogo ashike aantu omahoka komilungu oshoka oya thiga ko omahala ogendji inaga pewa omapapa,” Asino ta ti.
Egandjo lyomapapa lyonena ota li ka gandja owala komudhani ngoka a tula mo ookoola odhindji, omudhani dhingi gwokomumvo, omudhani dhingi a hogololwa kaadhani aakwawo.

Omudhewuli dhingi gwokomumvo naye woo ta ka pewa epapa omanga oshiluku oshikwawo ooshoka shaahikihiya moka mu na omuhikihiya gwokomumvo dhingi nosho wo omuyeluli gwokapandela dhingi, nuudhano owa za pondje.
Ashike Asino oku uvite kutya iikondo oyindji mokapale oya liwa oshipungo oshoka NPL okwe yi thiga ko iikondo ngaashi omukwati dhingi, omudhani gwomokati kokapale dhingi, omudhani gwokonima dhingi, osipana ndjoka yi na aayambidhidhi ya nuka po, nosho wo omudhani omupe gwokomumvo.

“Ngele omolwonkalo yoshimaliwa ndjoka ya nayipala , omolwashike inaya kaleka shike omapapa ngaka ,shi vulithe sho ta ya pe po owala aadhani yamwe omapapa nokuthiga ko yamwe?,” Asino ta pula.
Okwa ti wo oshikumungu shokuhogololola mboka ya longa nawa kutya kasha na uuyuuki oshoka sigo oompaka kapu na ngoka e shi kutya olye e na oshinakugwnithwa shokuhogolola ngoka ta ka sindana po omapapa ngaka.
“Epapa ndyoka lya yela olyo ndyoka lyomudhani e na ookoola odhindji opuwo, oshoka ndyoka oli iyeleka nale ashike galwe oge li ga tula oyendji momalilimbililo, oshoka kaku shiwike kutya omilandu dhini hadhi longithwa okutotha mo omusindani gwepapa,” Asino ta tsikile.

Omudhani ngoka a tula mo ookoola odhindji oPanduleni Nekundi gwoAfrican Stars sho a li a tula mo oshipandi shookoola 15 nokwa tegelelwa a ka pewe okapandi koo N$ 50 000.
Epapa lyomudhani dhingi gwokomumvo otali ka kondjelwa kuDynamo Fredricks (Black Africa), Panduleni Nekundi( African Stars), naMarcel Papama (Unam). Naangoka ta ka wayuka mo ta ka pewa okapandi koo N$ 30 000.
Mbaka yatatu natango otaya ka kondjela epapa lyomudhanidhingi a hogololwa kaadhani aakwawo moka omusindani ta ka fala okapandi koo N$ 20 000 kegumbo.

Marley Ngarizemo(Young African), Gergard Hengari (Mighty Gunners) naBobby Samaria (African Stars) otaya ka ninga shanamutango kepapa lyomudhewuli dhingi gwokomumvo ngoka ta ka mbendekwa okapandi koo N$ 20 000.
Jackson Pavaza (Otjozondjupa) , Willem Haitembu (Otjozondjupa) naNehemia Shooveleka (Ohangwena) otaya ka kondjela epapa lyomuhikihiya dhingi ngoka ta ka wayuka mo nokapandi koo N$ 10 000.
Matheus Nevonga (Hardap), Sem Shingeve(Otjozondjupa), Eneas Shikongo (Khomas) otaya ka kondjela epapa lyomuyeluli gwokapandela dhingi nota ka pewa okapandi koo N$ 5000.

LEAVE A REPLY

Please enter your comment!
Please enter your name here